Sing Unto the LORD a New Song

¹Hlabelelani kuJehova ihubo elisha, nihlabelele kuJehova, mhlaba wonke.

²Hlabelelani kuJehova, nibonge igama lakhe, nimemeze insindiso yakhe imihla ngemihla.

³Landani inkazimulo yakhe phakathi kwabezizwe, izimangaliso zakhe phakathi kwabantu bonke.

⁴Ngokuba mkhulu uJehova, udumisekile kakhulu; uyesabeka phezu kwabo bonke onkulunkulu.

⁵Ngokuba bonke onkulunkulu babezizwe bayizithombe, kepha uJehova walenza izulu.

⁶Udumo nobukhosi kusebusweni bakhe; amandla nenkazimulo kusendlini yakhe engcwele.

⁷Mnikeni uJehova nina mindeni yabantu, mnikeni uJehova inkazimulo namandla.

⁸Mnikeni uJehova inkazimulo yegama lakhe, nilethe umnikelo, ningene emagcekeni akhe.

⁹Khulekani kuJehova, nihlobe ubungcwele; thuthumela ebusweni bakhe, mhlaba wonke.

¹⁰Thanini phakathi kwabezizwe: “UJehova uyinkosi,” izwe lihlala liqinile, lingenakushukunyiswa; uthetha amacala ezizwe ngobuqotho.

¹¹Malijabule izulu, umhlaba uthokoze; maluhlokome ulwandle nokugcwala kwalo.

¹²Mawename amasimu nakho konke okukuwo, ijabule imithi yonke yehlathi

¹³ebusweni bukaJehova, ngokuba uyeza, yebo, uyeza ukwahlulela umhlaba; uyakwahlulela izwe ngokulunga, nezizwe ngokuthembeka kwakhe.