Under His Wings

¹Yena owakhile ekusithekeni koPhezukonke nohlezi emthunzini kaSomandla

²uthi kuJehova: “Uyisiphephelo sami nenqaba yami noNkulunkulu wami engimethembayo.”

³Ngokuba yena uyakukhipha ogibeni lomcuphi nasobhadaneni olubhubhisayo.

⁴Ngezimpaphe zakhe uyakukusibekela, uphephele phansi kwamaphiko akhe; ukuthembeka kwakhe kuyisihlangu nehawu.

⁵Awuyikwesaba ivuso lasebusuku, nomcibisholo ondizayo emini,

⁶nobhadane oluhamba ebumnyameni, nesifo esibhubhisayo emini enkulu.

⁷Bayakuwa abayizinkulungwane ngaseceleni kwakho, nabayizinkulungwane eziyishumi ngakwesokunene sakho, kepha akuyikufinyelela kuwe.

⁸Uyakubuka nje ngamehlo akho, ubone ukuphindiselwa kwababi,

⁹ngokuba uthi: Jehova, uyisiphephelo sami; oPhezukonke umenzile abe yinqaba yakho.

¹⁰Awuyikwehlelwa ngokubi, nesifo asiyikusondela etendeni lakho.

¹¹Ngokuba uyakuyaleza izingelosi zakhe ngawe, zikulondoloze ezindleleni zakho zonke.

¹²Ziyakukuthwala ngezandla, ungaqhuzuki ngonyawo lwakho etsheni.

¹³Uyakunyathela ingonyama nebululu, unyathele phansi ibhongo lengonyama nodrako.

¹⁴Ngenxa yokuba enamathele kimi, ngakho ngiyamkhulula; ngiyamphakamisa ngokuba elazi igama lami.

¹⁵Uyakungibiza, ngimphendule; ngiyakuba naye esosizini, ngimkhulule, ngimdumise.

¹⁶Ngiyakumsuthisa ngobude bezinsuku, ngimbonise insindiso yami.