Our Eternal Dwelling Place

¹‘n Gebed van Moses, die man van God. Here, U was vir ons ‘n toevlug van geslag tot geslag."

²Voordat die berge gebore was en U die aarde en die wêreld voortgebring het, ja, van ewigheid tot ewigheid is U God."

³U laat die mens terugkeer tot stof en sê: Keer terug, o mensekinders!"

⁴Want duisend jaar is in u oë soos die dag van gister as dit verbyskiet, en soos ‘n nagwaak."

⁵Weggespoel het U hulle; hulle word ‘n slaap; in die môre is hulle soos die gras wat weer uitspruit:"

⁶in die môre bloei dit en spruit weer uit; in die aand sny ‘n mens dit af, en dit verdor."

⁷Want ons vergaan deur u toorn, en deur u grimmigheid word ons verskrik."

⁸U stel ons ongeregtighede voor U, ons verborge sondes in die lig van u aangesig."

⁹Want al ons dae gaan verby deur u grimmigheid, ons bring ons jare deur soos ‘n gedagte."

¹⁰Die dae van ons jare—daarin is sewentig jaar, of as ons baie sterk is, tagtig jaar; en die uitnemendste daarvan is moeite en verdriet; want gou gaan dit verby, en ons vlieg daarheen."

¹¹Wie ken die sterkte van u toorn en u grimmigheid, ooreenkomstig die vrees wat aan U verskuldig is?"

¹²Leer ons om ons dae so te tel dat ons ‘n wyse hart mag bekom!"

¹³Keer terug, HERE! Tot hoe lank? En ontferm U oor u knegte."

¹⁴Versadig ons in die môre met u goedertierenheid, sodat ons kan jubel en bly wees in al ons dae."

¹⁵Maak ons bly na die dae waarin U ons verdruk het, na die jare waarin ons onheil gesien het."

¹⁶Laat u werk vir u knegte sigbaar word en u heerlikheid oor hulle kinders."

¹⁷En laat die lieflikheid van die HERE onse God oor ons wees, en bevestig die werk van ons hande oor ons, ja, die werk van ons hande, bevestig dit!"