I Will Sing of Mercies

¹IMaskili lika-Ethani umEzra. Ngiyakuhlabelela ngomusa kaJehova kuze kube phakade, ngomlomo wami ngazise izizukulwane ngezizukulwane ukuthembeka kwakho.

²Ngokuba ngithe: “Umusa uyakwakhiwa kuze kube phakade; ezulwini uyaqinisa ukuthembeka kwakho.”

³Ngenzile isivumelwano nokhethiweyo wami, ngifungile kuye uDavide inceku yami ukuthi:

⁴“Ngiyakuqinisa inzalo yakho kuze kube phakade, ngisakhe isihlalo sobukhosi ezizukulwaneni ngezizukulwane.” Sela

⁵Izimangaliso zakho, Jehova, ziyadunyiswa ngamazulu, ukuthembeka kwakho ebandleni labangcwele.

⁶Ngokuba ngubani osemafwini ongalinganiswa noJehova na? Ngubani phakathi kwamadodana kaNkulunkulu ongafaniswa noJehova na?

⁷UNkulunkulu uyesabeka kakhulu emhlanganweni wabangcwele; umelwe ukuhlonishwa yibo bonke abangakuye.

⁸Jehova Nkulunkulu Sebawoti, ngubani onjengawe na? Unamandla, Jehova, nokuthembeka kwakho kuyakuhaqa.

⁹Wena uyabusa ukukhukhumala kolwandle; uma kuphakama amadlambi alo, uyawathulisa.

¹⁰Wena uchobozile uRahabi njengobuleweyo; uhlakazile izitha zakho ngengalo yakho enamandla.

¹¹Ngelakho izulu, ngowakho umhlaba; izwe nokugcwala kwalo, kukho konke ubeke isisekelo.

¹²Inyakatho neningizimu wakudala wena; iThabori neHermoni kuyajabula egameni lakho.

¹³Ingalo yakho inobuqhawe, isandla sakho sinamandla, esokunene sakho siphakeme.

¹⁴Ukulunga nokwahlulela kuyisisekelo sesihlalo sakho sobukhosi; umusa neqiniso kuyahamba phambi kobuso bakho.

¹⁵Sibusisiwe isizwe esikwazi ukuhlabelela ngenjabulo; siyahamba, Jehova, ekukhanyeni kobuso bakho.

¹⁶Egameni lakho siyathokoza usuku lonke; ngokulunga kwakho siyaphakanyiswa.

¹⁷Ngokuba wena uyinkazimulo yamandla abo; ngomusa wakho uphondo lwethu luyaphakama.

¹⁸Ngokuba isihlangu sethu singesikaJehova; inkosi yethu ingeyoNgcwele ka-Israyeli.

¹⁹Ngaleso sikhathi wakhuluma ngombono kubo abakholwayo bakho, wathi: “Ngibekile usizo eqhaweni, ngiphakamisile okhethiwe phakathi kwabantu.

²⁰Ngifumene inceku yami uDavide, ngimgcobile ngamafutha ami angcwele.

²¹Isandla sami siyakuba naye siqinile, ingalo yami iyakumqinisa.

²²Isitha asiyikumahlula, nendodana yobubi ayiyikumhlupha.

²³Ngiyakuchoboza izitha zakhe ebusweni bakhe, ngihluphe abamzondayo.

²⁴Ukuthembeka kwami nomusa wami kuyakuba naye; egameni lami luyakuphakama uphondo lwakhe.

²⁵Ngiyakubeka isandla sakhe phezu kolwandle, esokunene sakhe phezu kwemifula.

²⁶Uyakungibiza ngokuthi: ‘UnguBaba, unguNkulunkulu wami nedwala lensindiso yami.’

²⁷Ngiyakumenza abe yizibulo nophakamileyo kunamakhosi omhlaba.

²⁸Ngiyakumgcinela umusa wami kuze kube phakade; isivumelwano sami soba siqinile kuye.

²⁹Ngiyakwenza inzalo yakhe ime kuze kube phakade, isihlalo sakhe sobukhosi sibe njengezinsuku zezulu.

³⁰“Uma abantwana bakhe beshiya umthetho wami bengahambi ngezahlulelo zami,

³¹uma bephula izimiso zami bengagcini imiyalo yami,

³²ngiyakuhambela izono zabo ngenduku, namacala abo ngemivimbo.

³³Kepha umusa wami angiyikuwususa kuye, ngingaphikisi ukuthembeka kwami.

³⁴Angiyikwaphula isivumelwano sami, nokuphumileyo ezindebeni zami angiyikukuguqula.

³⁵Ngafunga kanye ubungcwele bami, angiyikuqamba amanga kuDavide.

³⁶Inzalo yakhe iyakuma phakade, isihlalo sakhe sobukhosi sibe njengelanga phambi kwami.

³⁷Iyakuma phakade njengenyanga nanjengofakazi othembekileyo osemafwini.” Sela

³⁸Kepha usumlahlile, wamala, wamthukuthelela ogcotshiweyo wakho.

³⁹Uchithile isivumelwano senceku yakho, wadumaza umqhele wayo, wawuphonsa emhlabathini.

⁴⁰Udilizile zonke izindonga zakhe, wazenza izinqaba zakhe zaba yincithakalo.

⁴¹Bonke abadlula ngendlela bayamphanga; waba yihlazo kwabakhelene naye.

⁴²Uphakamisile esokunene sabamelene naye, wajabulisa zonke izitha zakhe.

⁴³Futhi ubuyisele emuva usiko lwenkemba yakhe, awumvumelanga ukuma ekulweni.

⁴⁴Ususile inkazimulo yakhe, wawisa phansi emhlabathini isihlalo sakhe sobukhosi.

⁴⁵Ufinyezile izinsuku zobusha bakhe, wamthela ngamahloni. Sela

⁴⁶Koze kube nini uyakuzisitha, Jehova, nentukuthelo yakho ivutha njengomlilo, na?

⁴⁷Khumbula ukuthi isikhathi sami singakanani nokuthi wadalela ize bonke abantwana babantu.

⁴⁸Ngubani oyakuphila engayikubona ukufa, akhulule umphefumulo wakhe emandleni endawo yabafileyo, na? Sela

⁴⁹Nkosi, uphi umusa wakho wakuqala owawufungela kuDavide ngokuthembeka kwakho na?

⁵⁰Khumbula, Nkosi, ihlazo lezinceku zakho nokuthi ngithwele esifubeni sami ihlazo lezizwe eziningi kakhulu,

⁵¹ezisola ngalo izitha zakho, Jehova, ezisola ngalo ukuhamba kogcotshiweyo wakho.

⁵²Makabongwe uJehova kuze kube phakade. Amen, Amen.