Sing Aloud

¹Kumholi wokuhlabelela. NgeGititi. Elika-Asafa. Halalisani uNkulunkulu amandla ethu, nimemeze ngokujabula kuNkulunkulu kaJakobe.

²Hlabani ihubo, nithathe isigubhu nehabhu elihle nogubhu.

³Bethani icilongo ekwethwaseni kwenyanga nasekuhlanganeni kwenyanga ngosuku lomkhosi wethu.

⁴Ngokuba kuyisimiso kwa-Israyeli nomthetho kaNkulunkulu kaJakobe.

⁵Kungubufakazi abumisayo kwaJosefa mhla ephuma ezweni laseGibithe. Ngizwa ulimi ebengingalwazi luthi:

⁶“Ngasusa ihlombe lakhe emthwalweni, izandla zakhe zakhululeka eqomeni lokuthwala.

⁷Wakhuleka usosizini, ngakukhulula; ngakuphendula ngisekusithekeni kokuduma, ngakuvivinya ngasemanzini aseMeriba. Sela

⁸“Zwanini, bantu bami, ngizakufakaza kini ukuthi: O Israyeli, sengathi ungangilalela!

⁹Makungabikho kuwe unkulunkulu omunye, ungakhuleki kunkulunkulu wabezizwe.

¹⁰Mina nginguJehova uNkulunkulu wakho owakukhuphula ezweni laseGibithe; khamisa umlomo wakho, ngiwugcwalise.

¹¹“Kepha abantu bami abalalelanga izwi lami, u-Israyeli akanginakanga.

¹²Ngase ngibayeka enkanini yenhliziyo yabo ukuba bahambe ngokuthanda kwabo.

¹³“Sengathi abantu bami bangangizwa, u-Israyeli ahambe ezindleleni zami.

¹⁴Bengiyakuthobisa masinyane izitha zabo, ngiselulele isandla sami kwabamelene nabo.

¹⁵Abazondi bakaJehova bebeyakuzithobela kuye, kepha isikhathi sabantu bami besiyakuba khona kuze kube phakade.

¹⁶Ubeyakubapha ukolweni omuhle; yebo, bengiyakubasuthisa ngezinyosi zasesiweni.”