Cast Thy Burden

¹Kumholi wokuhlabelela. Ngogubhu. IMaskili likaDavide. Lalela, Nkulunkulu, umkhuleko wami, ungazifihli ekunxuseni kwami.

²Ngizwele, ungiphendule; ngiyayaluza ekukhaleni kwami, ngiyabubula

³ngenxa yezwi lesitha, ngenxa yokucindezela komubi; ngokuba bagingqela okubi phezu kwami; bangizingela bethukuthele.

⁴Inhliziyo yami iyathuthumela phakathi kwami; amavuso okufa angehlele. 55:4 AmaH. 18:4.

⁵Ngifikelwe luvalo nokuqhaqhazela; ngikhwelwe ngukwesaba okukhulu.

⁶Besengithi: “Sengathi ngingaba namaphiko njengejuba; ngabe ngindizela ekudeni, ngihlale khona.” 55:6 Jer. 9:2.

⁷Bheka, bengiyakubaleka, ngiye kude, ngingenise ehlane. Sela

⁸Ngabe ngiphuthuma indawo yokuphepha emoyeni ovunguzayo nasesiphephweni.

⁹Bachithe, Nkosi, uphambanise ulimi lwabo, ngokuba ngibonile ubudlwangudlwangu nokuxabana emzini. 55:9 Gen. 11:9.

¹⁰Imini nobusuku bahamba bezungeza phezu kwezingange zawo; okubi nokushinga kuphakathi kwawo.

¹¹Ububi buphakathi kwawo; imbandezelo nenkohliso akusuki esigcawini sawo.

¹²Ngokuba akusiso isitha esingiklolodelayo; ngabe ngiyakuthwala; akusiye ongizondayo oziphakamise phezu kwami; ngabe ngamcashela;

¹³kepha nguwe ntanga yami, mhlobo wami nomngane wami. 55:13 2 Sam. 16:23.

¹⁴Sasihlalisana kamnandi; sasiya endlini kaNkulunkulu kanye nebandla elithokozayo.

¹⁵Ukufa makubazume, bashonele endaweni yabafileyo besezwa, ngokuba ububi busezindlini zabo nasezinhliziyweni zabo. 55:15 Num. 16:23.

¹⁶Mina ngizakukhala kuNkulunkulu; uJehova uzakungisindisa.

¹⁷Kusihlwa nasekuseni nasemini ngizakuzikhalela, ngibubule, abeselizwa izwi lami. 55:17 Dan. 6:10.

¹⁸Uyawuhlenga umphefumulo wami ngokuthula, bangasondeli kimi, ngokuba baningi abamelene nami. 55:18 AmaH. 56:2.

¹⁹UNkulunkulu uzakuzwa, abaphendule, yena okhona kwaphakade. Sela Yibona kambe okungekho kubo ukuphenduka, nabangamesabiyo uNkulunkulu.

²⁰Ubeka isandla ngakuye ohlalisene kahle naye; udumazile isivumelwano sakhe.

²¹Umlomo wakhe ubushelezi kunephehlwa, kepha inhliziyo yakhe iyimpi; amazwi akhe athambile kunamafutha; nokho ayizinkemba ezikhokhiweyo. 55:21 AmaH. 57:4; 59:7.

²²Phonsa phezu kukaJehova umthwalo wakho, uzakukuphasa; akayikuvuma naphakade ukuba olungileyo azanyazanyiswe. 55:22 Math. 6:25; Luk. 12:22; 1 Pet. 5:7.

²³Wena Nkulunkulu uyakubaphonsa egodini lokubhubhisa; abantu begazi nenkohliso abayikufinyelela nasenxenyeni yezinsuku zabo; kepha mina ngizakwethemba wena.