My God, Why Hast Thou Forsaken Me?

¹Kumholi wokuhlabelela. Indlela: Indluzelekazi yokusa. Ihubo likaDavide. Nkulunkulu wami, Nkulunkulu wami, ungishiyeleni na? Ukude namazwi okubububula kwami nokusindiswa kwami.

²Nkulunkulu wami, ngikhala emini, kepha awuphenduli, nasebusuku, ngingabi nakuthula.

³Kepha wena ungoNgcwele ohlezi ezibongweni zika-Israyeli.

⁴Obaba bethu babekwethemba; babethemba, wena wabakhulula.

⁵Bakhala kuwe, bakhululwa; bethemba wena, abaze bajabha.

⁶Kepha mina ngiyimphethu, angisiye umuntu; ngiyisithuko sabantu, ngiyindelelo yabantu.

⁷Bonke abangibonayo bayangiklolodela, baphukule imilomo, banikine amakhanda,

⁸bathi: “Zinikele kuJehova; makamsindise, amkhulule, njengokuba emthanda.”

⁹Impela nguwe owangikhipha esizalweni, wangikhoselisa ngasemabeleni kamame.

¹⁰Ngaphonswa phezu kwakho kwasesizalweni; unguNkulunkulu wami kwasesizalweni sikamame.

¹¹Ungabi kude nami, ngokuba inhlupheko iseduze, nosizayo akakho.

¹²Izinkunzi eziningi zingibunganyele, ezinamandla zaseBashani zingizungezile.

¹³Zingikhamisele umlomo wazo njengengonyama edwengulayo nebhodlayo.

¹⁴Ngichithiwe njengamanzi; onke amathambo ami enyele; inhliziyo yami injengengcina, incibilikile phakathi kwezibilini zami.

¹⁵Amandla ami omile njengodengezi; ulimi lwami lunamathela olwangeni lwami; ungibeka othulini lokufa.

¹⁶Ngokuba izinja ziyangibungayela; umbonda wababi ungizungezile; izandla zami nezinyawo zami bazibhobozile.

¹⁷Ngingabala onke amathambo ami; bayabukela, bangibuke bengiklibhizela.

¹⁸Babelana izingubo zami, benzelana inkatho ngesambatho sami.

¹⁹Kepha wena Jehova mawungabi kude, wena mandla ami, shesha ungisize.

²⁰Sindisa umphefumulo wami enkembeni, ukuphila kwami emandleni ezinja.

²¹Ngisindise emlonyeni wengonyama; nasezimpondweni zezinyathi uyangizwa.

²²Ngiyakushumayeza abafowethu igama lakho, ngikudumise phakathi kwebandla.

²³Nina enesaba uJehova, mbongeni; nina nonke nzalo kaJakobe, mdumiseni, nimesabe nina nonke nzalo ka-Israyeli.

²⁴Ngokuba akadelelanga, akanengwanga yinhlupheko yohluphekayo; akamfihlelanga ubuso bakhe, kepha nalapha ekhala kuye, wezwa.

²⁵Kuyakuvela kuwe ukudumisa kwami ebandleni elikhulu; izithembiso zami ngiyakuzigcwalisa phambi kwabamesabayo.

²⁶Abamnene bayakudla, basuthe; abafuna uJehova bayakumdumisa; inhliziyo yenu mayiphile kuze kube phakade.

²⁷Imikhawulo yonke yomhlaba iyakukhumbula, iphendukele kuJehova, nezizukulwane zonke zezizwe ziyakukhuleka ebusweni bakho.

²⁸Ngokuba umbuso ungokaJehova; nguye obusa izizwe.

²⁹Bonke abacebileyo bomhlaba bayakudla, bakhuleke; bonke abehlela othulini bayakukhothama phambi kwakhe, naye ongenakugcina umphefumulo wakhe ekuphileni.

³⁰Inzalo iyakumkhonza; isizukulwane esizayo siyakulandiswa ngayo iNkosi.

³¹Bayakuza bashumayele ukulunga kwayo kuso isizwe esiyakuzalwa ngokuthi ikwenzile.