Blessed Be the LORD My Strength

¹ElikaDavide. Makabongwe uJehova, idwala lami, ofundisa izandla zami ukuhlasela neminwe yami ukulwa,

²umusa wami nenqaba yami, umbhoshongo wami ophakemeyo nomkhululi wami, isihlangu sami, nengiphephela kuye, nothobisa abantu bami phansi kwami.

³Jehova, uyini umuntu ukuba umazi, nendodana yomuntu ukuba uyikhumbule, na?

⁴Umuntu ufana nomoya; izinsuku zakhe zinjengethunzi elidlulayo.

⁵Thobisa amazulu akho, Jehova, wehle; thinta izintaba, zithunqe.

⁶Imibani mayinyazime, ubahlakaze; thuma imicibisholo yakho, ubaphithizise.

⁷Yelula isandla sakho phezulu, ungikhulule, ungophule emanzini amakhulu nasesandleni sabafokazi

⁸abamlomo wabo ukhuluma inkohliso, nesandla sabo sokunene singesokunene samanga.

⁹Ngiyakuhlabelela kuwe Nkulunkulu isihlabelelo esisha; ngogubhu olunezintambo eziyishumi ngiyakukuhubela.

¹⁰Nguye onika amakhosi insindiso, okhulula inceku yakhe uDavide enkembeni elimazayo.

¹¹Ngikhulule, ungophule esandleni sabafokazi abamlomo wabo ukhuluma inkohliso, nesandla sabo sokunene singesokunene samanga.

¹²Lapho amadodana ethu enjengezithombo ezikhulileyo ebusheni bazo, namadodakazi ethu enjengamatshe amagumbi abaziwe ngendlela yokwakhiwa kwezindlu zamakhosi;

¹³lapho izingobo zethu zigcwele, ziveza izinhlobo ngezinhlobo, nezimvu zethu zizala ngezinkulungwane, yebo, ngezinkulungwane eziyishumi emadlelweni ethu;

¹⁴lapho izinkabi zethu zithweswe kakhulu, nalapho kungekho ukufohla kwesitha nokungena empini nezikhalo ezitaladini zethu,

¹⁵babusisiwe abantu abanjalo; babusisiwe abantu abaNkulunkulu wabo unguJehova.