Deliver Me, O LORD

¹Vir die musiekleier. ‘n Psalm van Dawid. (140:2) Red my, HERE, van die kwaaddoeners, bewaar my vir die manne van geweld;"

²(140:3) wat slegte dinge in die hart bedink, wat elke dag stryd verwek."

³(140:4) Hulle maak hul tong skerp soos ‘n slang; gif van ‘n adder is onder hulle lippe. Sela."

⁴(140:5) Bewaar my, HERE, vir die hande van die goddelose; behoed my vir die manne van geweld wat planne beraam om my voete weg te stoot."

⁵(140:6) Trotsaards het vir my ‘n vangnet gespan en toue; hulle het ‘n net uitgespan aan die kant van die pad; strikke het hulle vir my gestel. Sela."

⁶(140:7) Ek het tot die HERE gesê: U is my God; luister tog, HERE, na die stem van my smekinge!"

⁷(140:8) HERE Here, Sterkte van my heil, U beskut my hoof in die dag van stryd!"

⁸(140:9) HERE, gee tog nie die begeertes van die goddelose nie; laat sy listige plan nie geluk, sodat hulle hul verhef nie. Sela."

⁹(140:10) Wat betref die hoof van die wat my omring—laat die onheil van hulle lippe hulle oordek."

¹⁰(140:11) Laat vurige kole op hulle afgegooi word; mag Hy hulle laat val in die vuur, in kuile, sodat hulle nie weer opstaan nie!"

¹¹(140:12) Laat die kwaadspreker nie op aarde bevestig word nie; die man van geweld—laat die ongeluk hom jaag met slag op slag."

¹²(140:13) Ek weet dat die HERE die regsaak van die ellendige, die reg van die behoeftiges sal behartig."

¹³(140:14) Sekerlik, die regverdiges sal u Naam loof, die opregtes sal voor u aangesig woon."