Remember David

¹Igama lokukhuphuka. Jehova, mkhumbulele uDavide zonke izinhlupheko zakhe

²ukuthi wafunga kuJehova, wenza isithembiso kuye onguMninimandla kaJakobe, ethi:

³“Angiyikungena etendeni lendlu yami; angiyikwenyukela embhedeni wami;

⁴angiyikunika amehlo ami ubuthongo, nezinkophe zami ukozela

⁵ngingakatholeli uJehova indawo, indlu yonguMninimandla kaJakobe.”

⁶Bheka, sizwile ngakho e-Efratha, sakufumana ezweni laseJari.

⁷“Masingene endlini yakhe, sikhuleke ngasesenabelweni sezinyawo zakhe.

⁸Vuka, Jehova, uye ekuphumuleni kwakho, wena nomphongolo wamandla akho.

⁹Abapristi bakho mabembeswe ukulunga, abangcwele bakho bethabe.”

¹⁰Ngenxa yenceku yakho uDavide mawungaphenduli ubuso bogcotshiweyo wakho.

¹¹UJehova ufungile kuDavide ngeqiniso, akabuyi kukho, ethi: “Owenzalo yomzimba wakho ngiyakumbeka esihlalweni sakho sobukhosi.

¹²Uma abantwana bakho begcina isivumelwano sami nobufakazi bami engiyakubafundisa bona, khona abantwana babo bayakuhlala esihlalweni sakho kuze kube phakade.”

¹³Ngokuba uJehova ukhethile iSiyoni; ulithandile libe yindawo yakhe yokuhlala:

¹⁴“Yona ingeyokuphumula kwami kuze kube phakade; lapha ngiyakuhlala khona, ngokuba ngiyifunile.

¹⁵Ngiyakubusisa kakhulu ukudla kwalo; abampofu balo ngiyakubasuthisa ngesinkwa.

¹⁶Abapristi balo ngiyakubembesa insindiso; abangcwele balo bayakumemeza nokumemeza ngenjabulo.

¹⁷“Ngiyakuhlumisa uphondo lukaDavide, ogcotshiweyo wami ngimlungisele isibani.

¹⁸Izitha zalo ngiyakuzembesa ihlazo, kepha kuyena uqobo umqhele wakhe uyakukhazimula.”