The Word of God

¹Babusisiwe abaqotho endleleni, abahamba ngemithetho kaJehova.

²Babusisiwe abagcina ubufakazi bakhe, abamfuna ngenhliziyo yonke,

³abangenzi ukungalungi, kepha behamba ezindleleni zakhe;

⁴wena usiyalezile ukuba sizigcine ngokwempela.

⁵Sengathi zingaqondiswa izindlela zami ukuba ngigcine izimiso zakho.

⁶Khona angiyikujabha; ngiyakuhlonipha iziyalezo zonke zakho.

⁷Ngiyakukubonga ngobuqotho benhliziyo, lapho ngifunda izahlulelo zakho ezilungileyo.

⁸Izimiso zakho ngiyakuzigcina; ungangishiyi nakanci.

⁹Insizwa iyakuyihlanza kanjani indlela yayo na? Ngokuqaphela okwezwi lakho.

¹⁰Ngikufunile ngenhliziyo yami yonke; mangingaphambuki emiyalweni yakho.

¹¹Enhliziyweni yami ngiyalonda izwi lakho, ukuze ngingoni kuwe.

¹²Mawubongwe wena Jehova, ungifundise izimiso zakho.

¹³Ngomlomo wami ngimemezele zonke izahlulelo zomlomo wakho.

¹⁴Ngithokoza ngendlela yobufakazi bakho njengemfuyo.

¹⁵Ngiyakuzindla ngeziyalezo zakho, ngihloniphe izindlela zakho.

¹⁶Ngiyakuthokoza ngezimiso zakho; angiyikukhohlwa izwi lakho.

¹⁷Yenzele okuhle inceku yakho ukuba ngiphile, ngigcine izwi lakho.

¹⁸Vula amehlo ami ukuba ngibone izimangaliso zasemthethweni wakho.

¹⁹Ngingumfokazi emhlabeni; ungangifihleli imiyalo yakho.

²⁰Umphefumulo wami waphukile ngokulangazelela njalo izahlulelo zakho.

²¹Uyakhuza abazidlayo, abaqalekisiweyo, abaduka emiyalweni yakho.

²²Susa kimi isihlamba nokudelelwa, ngokuba ngiyaqaphela ubufakazi bakho.

²³Yebo, izikhulu zihlezi zikhuluma ngami; inceku yakho iyazindla ngezimiso zakho.

²⁴Ubufakazi bakho buyintokozo yami, bungumluleki wami.

²⁵Umphefumulo wami unamathela othulini; ngiphilise ngokwezwi lakho.

²⁶Ngimemezele izindlela zami, wena wangizwa; ngifundise izimiso zakho.

²⁷Ngiqondise indlela yeziyalezo zakho ukuba ngikhulume ngezimangaliso zakho.

²⁸Umphefumulo wami uyakhala ngosizi; ngivuse ngokwezwi lakho.

²⁹Susa kimi indlela yamanga, ungiphe ngomusa umthetho wakho.

³⁰Ngikhethile indlela yeqiniso; izahlulelo zakho ngizibekile phambi kwami.

³¹Ngibambelele ebufakazini bakho; ungangijabhisi, Jehova.

³²Ngiyakugijima ngendlela yemiyalo yakho, ngokuba uyakwandisa inhliziyo yami.

³³Ngitshengise, Jehova, indlela yezimiso zakho; ngiyakuyigcina kuze kube sekupheleni.

³⁴Ngiphe ingqondo, ukuze ngiqaphele umthetho wakho, ngiwugcine ngenhliziyo yami yonke.

³⁵Ngihambise endleleni yemiyalo yakho, ngokuba ngiyathokoza ngayo.

³⁶Thobisela inhliziyo yami ebufakazini bakho, kungabi sekuhaheni.

³⁷Phendula amehlo ami, angaboni okuyize, ungiphilise endleleni yakho.

³⁸Yigcwalise encekwini yakho inkulumo yakho eyenza ukuba wesatshwe.

³⁹Dlulisa isihlamba engisesabayo, ngokuba izahlulelo zakho zinhle.

⁴⁰Bheka, ngiyalangazelela iziyalezo zakho; ngiphilise ngokulunga kwakho.

⁴¹Mawuze kimi umusa wakho, Jehova, insindiso yakho ngokwezwi lakho.

⁴²Khona ngiyakumphendula ongithukayo, ngokuba ngiyalethemba izwi lakho.

⁴³Ungalisusi emlonyeni wami ngokupheleleyo izwi leqiniso, ngokuba ngiyethemba izahlulelo zakho.

⁴⁴Khona ngiyakuwugcina njalo umthetho wakho, yebo, kuze kube phakade.

⁴⁵Ngiyakuhamba endaweni ebanzi, ngokuba iziyalezo zakho ngiyazifuna.

⁴⁶Ngiyakukhuluma ngobufakazi bakho phambi kwamakhosi, ngingajabhi.

⁴⁷Ngiyakuthokoza ngemiyalo yakho engiyithandileyo.

⁴⁸Ngiyakuphakamisela izandla zami kuyo imiyalo yakho engiyithandileyo, ngizindle ngezimiso zakho.

⁴⁹Khumbula izwi encekwini yakho owangipha ithemba ngalo.

⁵⁰Lokhu kuyinduduzo ekuhluphekeni kwami, ngokuba izwi lakho lingiphilisile.

⁵¹Abazidlayo bangihleka usulu kakhulu, kepha emthethweni wakho angichezuki.

⁵²Ngiyakhumbula izahlulelo zakho zasendulo, Jehova; ngiyaduduzeka.

⁵³Ukuvutha kolaka kungibambile ngenxa yababi abashiya umthetho wakho.

⁵⁴Zaba yizihlabelelo kimina izimiso zakho endlini yokugogobala kwami.

⁵⁵Ebusuku ngikhumbula igama lakho, Jehova, ngigcina umthetho wakho.

⁵⁶Lokhu kwaba ngokwami, ngokuba ngagcina iziyalezo zakho.

⁵⁷UJehova uyisabelo sami; ngithi ngiyakugcina amazwi akho.

⁵⁸Ngincenga ubuso bakho ngenhliziyo yami yonke; yiba nomusa kimi ngokwezwi lakho.

⁵⁹Ngizindla ngezindlela zami, ngiqondisa izinyawo zami ebufakazini bakho.

⁶⁰Ngiyashesha, angilibali ukugcina imiyalo yakho.

⁶¹Izintambo zababi ziyangizungeza, kepha angikhohlwa umthetho wakho.

⁶²Phakathi kobusuku ngiyakuvuka ngikubonge ngenxa yezahlulelo zakho ezilungileyo.

⁶³Ngingumngane wabo bonke abakwesabayo, abagcina iziyalezo zakho.

⁶⁴Umhlaba ugcwele umusa wakho, Jehova; ngifundise izimiso zakho.

⁶⁵Uyenzele inceku yakho okuhle, Jehova, ngokwezwi lakho.

⁶⁶Ngifundise ukuqonda okuhle nokwazi, ngokuba ngikholwa yimiyalo yakho.

⁶⁷Ngingakahlupheki ngaduka, kepha manje sengiyaligcina izwi lakho.

⁶⁸Umuhle wena, futhi wenza okuhle; ngifundise izimiso zakho.

⁶⁹Abazidlayo baqamba amanga ngami; ngenhliziyo yonke yami ngiyakugcina iziyalezo zakho.

⁷⁰Inhliziyo yabo injengamafutha ingezwa lutho; kepha mina ngithokoza ngomthetho wakho.

⁷¹Kwangilungela ukuba ngihlushwe, ukuze ngifunde izimiso zakho.

⁷²Umthetho womlomo wakho muhle kunezinkulungwane zegolide nezesiliva.

⁷³Izandla zakho zingenzile, zangibumba; ngiphe ingqondo, ukuze ngifunde imiyalo yakho.

⁷⁴Abakwesabayo bayakujabula lapho bengibona, ngokuba ngethemba izwi lakho.

⁷⁵Ngiyazi ukuthi izahlulelo zakho zilungile nokuthi wangilaya ngokuthembeka.

⁷⁶Umusa wakho mawube yinduduzo encekwini yakho ngokwezwi lakho.

⁷⁷Ububele bakho mabuze kimi, ukuze ngiphile, ngokuba umthetho wakho uyintokozo yami.

⁷⁸Abazidlayo mabajabhe, ngokuba bangicindezele, kungekho sizathu; kepha mina ngiyakuzindla ngeziyalezo zakho.

⁷⁹Mabaphendukele kimi abakwesabayo nabaziyo ubufakazi bakho.

⁸⁰Inhliziyo yami mayiphelele ezimisweni zakho, ukuze ngingajabhi.

⁸¹Umphefumulo wami ulangazelela insindiso yakho; ngiyalethemba izwi lakho.

⁸²Amehlo ami alangazelela izwi lakho, ngithi: “Uyakungiduduza nini na?”

⁸³Nginjengemvaba emsini; izimiso zakho angizikhohlwa.

⁸⁴Zingaki izinsuku zenceku yakho? Uzakubahlulela nini abangizingelayo na?

⁸⁵Abazidlayo bangimbela imigodi, bona abaphambene nomthetho wakho.

⁸⁶Yonke imiyalo yakho ithembekile; bayangizingela ngamanga; ngisize.

⁸⁷Bacishe bangiqeda emhlabeni, kepha angishiyanga iziyalezo zakho.

⁸⁸Ngiphilise ngokomusa wakho, ukuze ngigcine ubufakazi bomlomo wakho.

⁸⁹Kuze kube phakade, Jehova, izwi lakho limi liqinile ezulwini.

⁹⁰Ezizukulwaneni ngezizukulwane ukuthembeka kwakho kukhona; wamisa umhlaba; usemi.

⁹¹Ngokwezahlulelo zakho kusekhona nanamuhla, ngokuba konke kuyizinceku zakho.

⁹²Uma umthetho wakho ubungesiyo intokozo yami, ngabe ngibhubhele ekuhluphekeni kwami.

⁹³Angiyikukhohlwa kuze kube phakade iziyalezo zakho, ngokuba ungiphilisile ngazo.

⁹⁴Ngingowakho, ngisindise, ngokuba ngiyafuna iziyalezo zakho.

⁹⁵Ababi bahlalele ukungibhubhisa, kepha ngiyaqaphela ubufakazi bakho.

⁹⁶Ngibonile ukugcina kokuphelelyo konke, kepha umthetho wakho ubanzi kakhulu.

⁹⁷Ngiyawuthanda umthetho wakho kangaka. Usuku lonke ngizindla ngawo.

⁹⁸Ngemiyalo yakho ngiyahlakanipha kunezitha zami, ngokuba inami kuze kube phakade.

⁹⁹Ngiyaqonda kunabo bonke abangifundisayo, ngokuba ngizindla ngobufakazi bakho.

¹⁰⁰Nginokuqonda kunabadala, ngokuba ngigcina iziyalezo zakho.

¹⁰¹Ngiyazinqanda izinyawo zami ezindleleni zonke zokubi, ukuze ngigcine izwi lakho.

¹⁰²Ezahlulelweni zakho angichezuki, ngokuba wena uyangifundisa.

¹⁰³Amnandi kangaka amazwi akho ekunambitheni kwami; adlula izinyosi emlonyeni wami.

¹⁰⁴Ngeziyalezo zakho ngiyathola ukuqonda; ngalokho ngiyazonda zonke izindlela zamanga.

¹⁰⁵Izwi lakho liyisibani ezinyaweni zami nokukhanya endleleni yami.

¹⁰⁶Ngifungile; ukulonda izahlulelo zakho ezilungileyo ngakugcina.

¹⁰⁷Ngiyahlupheka kakhulu; Jehova, ngiphilise ngokwezwi lakho.

¹⁰⁸Jehova, yamukela iminikelo yesihle yomlomo wami, ungifundise izahlulelo zakho:

¹⁰⁹Umphefumulo wami usesandleni sami njalo; nokho umthetho wakho angiwukhohlwa.

¹¹⁰Ababi bangibekele ugibe, kepha angiduki eziyalezweni zakho.

¹¹¹Ngidlile ifa lobufakazi bakho kuze kube phakade, ngokuba kuyintokozo yenhliziyo yami.

¹¹²Ngithobisile inhliziyo yami ukwenza izimiso zakho njalo, yebo, kuze kube sekupheleni.

¹¹³Ngiyabazonda abanhliziyo mbili, kepha umthetho wakho ngiyawuthanda.

¹¹⁴Wena uyisiphephelo sami nesihlangu sami; ngiyethemba izwi lakho.

¹¹⁵Sukani kimi nina enenza okubi, ngokuba ngiyakugcina imiyalo kaNkulunkulu wami.

¹¹⁶Ngiphase ngokwezwi lakho, ukuze ngiphile, ngingajabhi ngethemba lami.

¹¹⁷Ngisekele, ngize ngisindiswe, ngibheke njalo izimiso zakho.

¹¹⁸Uyabadelela bonke abaduka ezimisweni zakho, ngokuba ubuqili babo buyize.

¹¹⁹Uyabalahla bonke ababi bomhlaba njengendiva; ngalokho ngiyathanda ubufakazi bakho.

¹²⁰Inyama yami iyathuthumela ngovalo ngawe, ngiyesaba izahlulelo zakho.

¹²¹Ngiyenza ukwahlulela nokulunga; unganginikeli kubo abahluphi bami.

¹²²Mela inceku yakho kube kuhle; abazidlayo mabangangicindezeli.

¹²³Amehlo ami ayalangazelela insindiso yakho nezwi lokulunga kwakho.

¹²⁴Yenza encekwini yakho ngokomusa wakho, ungifundise izimiso zakho.

¹²⁵Ngiyinceku yakho; ngiphe ingqondo ukuba ngazi ubufakazi bakho.

¹²⁶Kuyisikhathi sikaJehova sokusebenza, ngokuba bawenz' ize umthetho wakho.

¹²⁷Ngalokho ngiyathanda imiyalo yakho kunegolide, yebo, kunegolide elicwengekileyo.

¹²⁸Ngalokho ngiyavuma ukuthi imiyalo yakho yonke ilungile; ngiyazonda zonke izindlela zamanga.

¹²⁹Ubufakazi bakho buyisimangaliso; ngalokho umphefumulo wami uyabugcina.

¹³⁰Ukwambulwa kwamazwi akho kuyakhanyisa, yebo, kuyabaqondisa abangenalwazi.

¹³¹Ngivula umlomo wami, ngikhefuzela, ngokuba ngiyalangazelela imiyalo yakho.

¹³²Bheka kimi, ube nomusa kimi njengokufanele abathanda igama lakho.

¹³³Qinisa izinyathelo zami ezwini lakho; makungangibusi nobubodwa ububi.

¹³⁴Ngihlenge ekuhlupheni kwabantu, ukuze ngigcine iziyalezo zakho.

¹³⁵Yikhanyisele inceku yakho ubuso bakho, ngifundise izimiso zakho.

¹³⁶Imifula yamanzi iyehlela emehlweni ami, ngokuba abagcini umthetho wakho.

¹³⁷Wena Jehova ulungile; izahlulelo zakho ziqotho.

¹³⁸Uyalezile ubufakazi bakho ngokulunga ngokuthembeka okukhulu.

¹³⁹Ukushisekela kwami kungidlile, ngokuba izitha zami zikhohliwe amazwi akho.

¹⁴⁰Izwi lakho licwebile kakhulu; ngalokho inceku yakho iyalithanda.

¹⁴¹Ngimncane, ngidelelekile; iziyalezo zakho angizikhohlwa.

¹⁴²Ukulunga kwakho kungukulunga okuphakade; umthetho wakho uyiqiniso.

¹⁴³Ukuhlupheka nosizi kungehlele; imiyalo yakho iyintokozo yami.

¹⁴⁴Ukulunga kobufakazi bakho kumi phakade; ngiphe ukuqonda ukuba ngiphile.

¹⁴⁵Ngikhala ngenhliziyo yami yonke; ngizwe, Jehova; izimiso zakho ngiyakuzigcina.

¹⁴⁶Ngikhala kuwe, ngisindise; ngiyakugcina ubufakazi bakho.

¹⁴⁷Ngiyandulela uvivi lokusa ngikhala; ngiyethemba amazwi akho.

¹⁴⁸Amehlo ami ayandulela imilindo yobusuku ukuba ngizindle ngezwi lakho.

¹⁴⁹Yizwa izwi lami ngokomusa wakho, Jehova, ungiphilise ngokwezahlulelo zakho.

¹⁵⁰Bayasondela abalandela ukonakala; bakude nomthetho wakho.

¹⁵¹Wena Jehova useduze; imiyalo yakho yonke iyiqiniso.

¹⁵²Kudala ngazile ngobufakazi bakho ukuthi ubusekele kuze kube phakade.

¹⁵³Bheka ukuhlupheka kwami, ungikhulule, ngokuba angikhohlwa umthetho wakho.

¹⁵⁴Mela indaba yami, ungihlenge, ungiphilise ngokwezwi lakho.

¹⁵⁵Ukusindiswa kukude nababi, ngokuba abafuni izimiso zakho.

¹⁵⁶Ububele bakho, Jehova, bukhulu; ngiphilise ngokwezahlulelo zakho.

¹⁵⁷Abangizingelayo nabayizitha kimi baningi; kepha ebufakazini bakho angichezuki.

¹⁵⁸Lapho ngibona amambuka, ngiyadikibala, ngokuba awagcini izwi lakho.

¹⁵⁹Bheka ukuthi ngithanda kangaka iziyalezo zakho, Jehova; ngiphilise ngokomusa wakho.

¹⁶⁰Amazwi akho onke ayiqiniso; zonke izahlulelo zakho ezilungileyo zimi kuze kube phakade.

¹⁶¹Izikhulu ziyangizingela, kungekho sizathu, kepha inhliziyo yami iyesaba izwi lakho.

¹⁶²Ngithokoza ngezwi lakho njengozuza impango enkulu.

¹⁶³Amanga ngiyawazonda, ngiyawenyanya; umthetho wakho ngiyawuthanda.

¹⁶⁴Kasikhombisa ngosuku ngiyakudumisa ngezahlulelo zokulunga kwakho.

¹⁶⁵Abathanda umthetho wakho banokuthula okukhulu; akukho sikhubekiso kubo.

¹⁶⁶Ngiyethemba insindiso yakho, Jehova; imiyalo yakho ngiyayenza.

¹⁶⁷Umphefumulo wami uyagcina ubufakazi bakho; ngiyabuthanda kakhulu.

¹⁶⁸Ngiyagcina iziyalezo zakho nobufakazi bakho, ngokuba izindlela zami zonke ziphambi kwakho.

¹⁶⁹Ukukhala kwami makusondele ebusweni bakho, Jehova; ngiqondise ngokwezwi lakho.

¹⁷⁰Ukuncenga kwami makuze ebusweni bakho; ngihlenge ngokwezwi lakho.

¹⁷¹Umlomo wami mawuchichime indumiso, ngokuba uyangifundisa izimiso zakho.

¹⁷²Ulimi lwami malukhulume izwi lakho, ngokuba imiyalo yakho yonke ilungile.

¹⁷³Isandla sakho masibe lusizo kimi, ngokuba ngikhethile iziyalezo zakho.

¹⁷⁴Ngiyalangazelela insindiso yakho, Jehova; umthetho wakho uyintokozo yami.

¹⁷⁵Umphefumulo wami mawuphile, ukudumise; izahlulelo zakho mazingisize.

¹⁷⁶Ngiyaduka njengemvu elahlekileyo; funa inceku yakho, ngokuba angikhohlwa imiyalo yakho.