I Love the LORD

¹Ngiyamthanda uJehova, ngokuba uyezwa izwi lokukhuleka kwami.

²Ngokuba ubekile indlebe kimi ngiyakukhuleka kuye zonke izinsuku zami.

³Izintambo zokufa zangizungeza, nobuhlungu bendawo yabafileyo bangibamba; ngafumana ukuhlupheka nosizi.

⁴Kepha ngabiza igama likaJehova, ngathi: “Ngiyakuncenga, Jehova, khulula umphefumulo wami.”

⁵Unomusa uJehova, ulungile; uNkulunkulu wethu unobubele.

⁶UJehova uyalondoloza ongenabuqili; ngithotshisiwe phansi wangisindisa.

⁷Buyela ekuphumuleni kwakho, mphefumulo wami, ngokuba uJehova ukuphathe ngomusa.

⁸Yebo, ukhululile umphefumulo wami ekufeni, amehlo ami ezinyembezini, nezinyawo zami ekuweni.

⁹Ngiyakuhamba ebusweni bukaJehova ezweni labaphilayo.

¹⁰Ngiyakholwa, ngalokho ngiyakhuluma; ngahlushwa kakhulu.

¹¹Ngathi osizini lwami: “Bonke abantu banamanga.”

¹²Ngiyakubuyiselani kuJehova ngazo zonke izenzo zakhe ezinhle kimina na?

¹³Ngiyakuthatha indebe yensindiso, ngibize igama likaJehova.

¹⁴Izithembiso zami kuJehova ngiyakuzigcwalisa, yebo, nasebusweni babantu bakhe bonke.

¹⁵Kuyigugu emehlweni kaJehova ukufa kwabangcwele bakhe.

¹⁶Ngiyinceku yakho impela, Jehova; ngiyinceku yakho, indodana yencekukazi yakho; uthukululile izintambo zami.

¹⁷Ngiyakunikela kuwe umnikelo wokubonga, ngibize igama likaJehova.

¹⁸Izithembiso zami kuJehova ngiyakuzigcwalisa yebo, nasebusweni babantu bakhe bonke,

¹⁹emagcekeni endlu kaJehova, phakathi kwakho, Jerusalema. Haleluya!