Praise Ye the LORD

¹Haleluya! Bongani uJehova, ngokuba muhle, ngokuba umusa wakhe umi phakade.

²Ngubani ongalanda izenzo zamandla zikaJehova, azwakalise lonke udumo lwakhe, na?

³Babusisiwe abaqaphela ukwahlulela kwakhe, owenza ukulunga ngezikhathi zonke.

⁴Ngikhumbule, Jehova, ngomusa onawo kubantu bakho, ungihambele ngensindiso yakho,

⁵ukuze ngibone inhlanhla yabakhethiweyo bakho, ngithokoze ngentokozo yesizwe sakho, ngizibonge kanye nefa lakho.

⁶Sonile kanye nawobaba; senzile okubi, sonakala.

⁷Obaba abaqondanga izibonakaliso zakho eGibithe, abakhumbulanga ubuningi bezenzo zakho zomusa; bahlubuka ngaselwandle, uLwandle Olubomvu.

⁸Nokho wabasindisa ngenxa yegama lakhe, ukuze abonakalise amandla akhe.

⁹Wakhuza uLwandle Olubomvu, lwasha; wabaholela ekujuleni njengasehlane.

¹⁰Wabasindisa esandleni sababazondayo, wabakhulula esandleni sesitha.

¹¹Amanzi asibekela izitha zabo; akwasala noyedwa kubo.

¹²Khona bakholwa ngamazwi akhe, bahlabelela udumo lwakhe.

¹³Bashesha bakhohlwa imisebenzi yakhe, abalindelanga isiluleko sakhe.

¹⁴Bahaha nokuhaha ehlane, bamlinga uNkulunkulu kwahlongasibi.

¹⁵Wabanika abakufisayo, kepha wathuma ukonda emiphefumulweni yabo.

¹⁶Baba nomhawu ngoMose ekamu, nango-Aroni ongcwele kaJehova.

¹⁷Umhlaba wavuleka, wamgwinya uDathani, wagqiba iviyo lika-Abiramu.

¹⁸Kokheleka umlilo eviyweni labo; ilangabi lashisa laqeda ababi.

¹⁹Benza ithole eHorebe; bakhuleka kuso isithombe esibunjiweyo.

²⁰Baguqula kanjalo inkazimulo yabo, yaba njengenkabi edla utshani.

²¹Bakhohlwa uNkulunkulu umsindisi wabo owayezenzile izinto ezinkulu eGibithe,

²²izimangaliso ezweni likaHamu nokwesabekayo ngaseLwandle Olubomvu.

²³Wathi ubezakubabhubhisa, uma uMose okhethiweyo wakhe ebengemanga ebusweni bakhe ukubakhulumela, ukuze amyekise intukuthelo yakhe, funa ababhubhise.

²⁴Badelela izwe elihle, babengakholwa yizwi lakhe.

²⁵Bakhonona besematendeni abo; babengalaleli izwi likaJehova.

²⁶Ngalokho waphakamisa isandla sakhe ngakubo ukuba abawise ehlane,

²⁷awise nenzalo yabo phakathi kwabezizwe, abahlakaze emazweni.

²⁸Bazihlanganisa noBali Peyori, badla okuhlatshelwe abafileyo.

²⁹Bamcunula ngezenzo zabo; kwabhoboka isifo phakathi kwabo.

³⁰Wayesesuka uFinehasi, wahlulela; saphela isifo;

³¹lokhu wakubalelwa njengokulunga ezizukulwaneni ngezizukulwane kuze kube phakade.

³²Bamcunula ngasemanzini aseMeriba; kwaba kubi kuMose ngenxa yabo.

³³Ngokuba baphambana noMoya wakhe; wakhuluma ngamawala ngomlomo wakhe.

³⁴Abababhubhisanga abantu uJehova abayaleza ngabo,

³⁵kepha bahlangana nabezizwe, bafunda imisebenzi yabo.

³⁶Bakhonza izithombe zabo, zaba lugibe kubo.

³⁷Amadodana namadodakazi abo bawahlabela amademoni.

³⁸Bachitha igazi elingenacala, igazi lamadodana abo namadodakazi abo abawahlabela izithombe zaseKhanani; izwe langcoliswa yigazi.

³⁹Bangcola kanjalo ngemisebenzi yabo, baphinga ezenzweni zabo.

⁴⁰Intukuthelo kaJehova yokheleka ngakubantu bakhe; ifa lakhe laba yisinengiso kuye.

⁴¹Wabanikela esandleni sabezizwe; ababazondayo bababusa.

⁴²Izitha zabo zabacindezela, bathotshiswa phansi kwesandla sazo.

⁴³Kaningi wabakhulula; kepha bahlubuka ngecebo labo, bawiswa phansi ngobubi babo.

⁴⁴Nokho wanaka ukuhlupheka kwabo, esezwile ukukhala kwabo.

⁴⁵Wabakhumbulela isivumelwano sakhe; waphenduka ngokobuningi bomusa wakhe.

⁴⁶Wabatholisa ububele ebusweni babo bonke ababebathumbile.

⁴⁷Sisindise, Jehova Nkulunkulu wethu, sibuthe kwabezizwe ukuba sidumise igama lakho elingcwele, sethabe ekukudumiseni.

⁴⁸Makabongwe uJehova uNkulunkulu ka-Israyeli kusukela phakade kuze kube phakade. Abantu bonke mabathi: “Amen.” Haleluya!