Iron Sharpeneth Iron

¹Ungazigabisi ngolwakusasa, ngokuba awukwazi okungavela ngosuku.

²Makakudumise omunye, kungabi ngumlomo wakho, kube ngumfokazi, kungabi yizindebe zakho.

³Itshe liyasinda nesihlabathi sinzima, kepha ukukhathaza kwesiwula kuyasinda kunakho kokubili.

⁴Ulaka lulunya nentukuthelo iyisikhukhula, kepha ngubani ongema phambi komhawu na?

⁵Ukusola okusobala kungcono kunothando olufihliweyo.

⁶Amanxeba othandayo athembekile, kepha ukwanga kwesitha kuyachichima.

⁷Umphefumulo osuthiyo uyanengwa yizinyosi, kepha emphefumulweni olambileyo konke okubabayo kumnandi.

⁸Njengenyoni esuka ibaleka esidlekeni sayo, unjalo umuntu obalekele indawo yakhe.

⁹Amafutha nempepho kuyathokozisa inhliziyo; bunjalo ubumnandi bomuntu ngokululeka ngenhliziyo.

¹⁰Ungashiyi umngane wakho nomngane kayihlo, ungangeni endlini yomfowenu ngosuku lwengozi yakho; ungcono umakhelwane oseduze kunomfowenu okude.

¹¹Ndodana yami, hlakanipha, uthokozise inhliziyo yami ukuba ngiphendule ongisolayo.

¹²Oqondileyo uyabona ububi, acashe, kepha abangenalwazi badlula nje, bahlupheke ngakho.

¹³Thatha ingubo yoyisibambiso somfokazi, umbambe abe yisibambiso omela abezizwe.

¹⁴Obusisa umngane wakhe ngezwi elikhulu, evuka ekuseni, kuyakubalelwa kuye ukuthi kuyisiqalekiso.

¹⁵Ukuconsa okunganqamukiyo ngosuku lwemvula nowesifazane oxabanayo kuyafana.

¹⁶Omvimbela yena uvimbela umoya; isandla sakhe sokunene sihlangana namafutha nje.

¹⁷Insimbi ilola insimbi, nomuntu ubuso bomunye.

¹⁸Olonda umkhiwane uyakudla izithelo zawo, nolinda inkosi yakhe uyakudunyiswa.

¹⁹Njengasemanzini ubuso bubhekana nobuso, injalo inhliziyo yomuntu kumuntu.

²⁰Indawo yabafileyo nokubhubha akusuthi, namehlo omuntu awasuthi.

²¹Ukhamba lokuncibilikisela lungolwesiliva, nesithando ngesegolide, nomuntu unjengodumo lwakhe.

²²Noma ugqula isiwula ngembokodwe etsheni lokusila phakathi komqhazulo, ubuwula baso abuyikusuka kuso.

²³Yazi nokwazi ukuma kwezimvu zakho, ubeke inhliziyo yakho emihlambini yakho.

²⁴Ngokuba ingcebo ayiyikuhlala kuze kube phakade; umqhele uyahlala izizukulwane ngezizukulwane na?

²⁵Lapho utshani bumuka, nohlaza lubonakala, nemifino yezintaba ibuthwa,

²⁶kukhona izimvu zokuba wembathe, nezimpongo ukuba zibe yintengo yomhlaba.

²⁷Kuyakuba khona ubisi lwezimbuzi olwanele ukudla kwakho nokudla kwendlu yakho, nokuphila kwamantombazana akho.