The King's Heart

¹Inhliziyo yenkosi isesandleni sikaJehova njengemifula yamanzi; uyayiphendulela lapho ethanda khona.

²Zonke izindlela zomuntu zilungile emehlweni akhe, kepha uJehova ulinganisa izinhliziyo.

³Ukwenza ukulunga nokwahlulela kukhethekile kuJehova kunemihlatshelo.

⁴Ukuzidla kwamehlo nokuziqhenya kwenhliziyo, isibani sababi, kuyisono.

⁵Imicabango yokhutheleyo isenzuzweni, kepha eyabo bonke abaphangisayo isekusweleni kuphela.

⁶Ukuthola ingcebo ngolimi lwamanga kuyize elizulazuliswa, nezingibe zokufa.

⁷Ukuchitha kwababi kuyabaqothula, ngokuba benqaba ukwenza ukulunga.

⁸Indlela yothweswe icala iyinsongensonge, kepha ohlanzekileyo, isenzo sakhe silungile.

⁹Kungcono ukuhlala egumbini lophahla kunokuhlala nowesifazane oxabanayo endlini ehlanganyelweyo.

¹⁰Umphefumulo womubi ufisa okubi; umakhelwane wakhe kafumani isisa emehlweni akhe.

¹¹Lapho isideleli sihlawuliswa, ongenalwazi uyahlakanipha, nalapho ohlakaniphileyo efundiswa, uyathola ukwazi.

¹²Olungileyo uyaqaphela indlu yomubi; ababi bayachithelwa ebubini.

¹³Ovala indlebe yakhe ngokukhala kompofu naye uyakukhala angaphendulwa.

¹⁴Isipho ekusithekeni siyadambisa ulaka, nomvuzo esifubeni ukufutheka okunamandla.

¹⁵Kuyintokozo kolungileyo ukwenza ukwahlulela, kepha kwabenza ukona kuyincithakalo.

¹⁶Umuntu oduka endleleni yokuhlakanipha uyakuphumula ebandleni lezithunzi.

¹⁷Othanda injabulo uyakuba mpofu, nothanda iwayini namafutha kayikuceba.

¹⁸Omubi uyihlawulo lolungileyo, nombuluzayo usesikhundleni sabaqotho.

¹⁹Kungcono ukuhlala ezweni lasehlane kunokuhlala nowesifazane oxabanayo nothethayo.

²⁰Kukhona ingcebo enxanelekayo namafutha endlini yohlakaniphileyo, kepha umuntu oyisiwula uyakugwinya.

²¹Olandela ukulunga nomusa uyafumana ukuphila, nokulunga, nodumo.

²²Ohlakaniphileyo angenyukela emzini wamaqhawe, awise phansi inqaba ayethembayo wona.

²³Ogcina umlomo wakhe nolimi lwakhe ulonda umphefumulo wakhe ezinsizini.

²⁴Ozidlayo nozigabisayo, yisideleli igama lakhe, yena osebenza ngokuziphakamisa okukhulu.

²⁵Isifiso sevila siyalibulala, ngokuba izandla zalo ziyenqaba ukusebenza.

²⁶Kuyafiswa nokufiswa usuku lonke, kepha olungileyo uyaphana engancishi.

²⁷Umhlatshelo wababi uyisinengiso; kakhulu kangakanani uma ulethwa ngomgomo omubi.

²⁸Ufakazi wamanga uyabhujiswa, kepha umuntu ozwileyo angakhuluma njalo.

²⁹Umuntu omubi uyenza lukhuni ubuso bakhe, kepha oqotho uyanaka indlela yakhe.

³⁰Akukho ukuhlakanipha, akukho ukuqonda, nesiluleko, okungamelana noJehova.

³¹Ihhashi lilungiselwa usuku lokulwa, kepha ukusindiswa kungokukaJehova.