The Beginning of Knowledge

¹Nazi izaga zika Solomoni indodana kaDavide, inkosi yakwa-Israyeli,

²zokwazi ukuhlakanipha nokulaywa, nokwahlukanisa amazwi okuqonda,

³nokwamukela ukulaywa kube ngukuhlakanipha, nokulunga, nokwahlulela, neqiniso,

⁴nokunika abangenalwazi ukuhlakanipha, nezinsizwa ukwazi namasu,

⁵ukuze ohlakaniphileyo ezwe, aqhubeke ekufundeni, noqondileyo athole iziluleko ezinhle

⁶ukuba aqonde izaga nezimfihlakalo, namazwi abahlakaniphileyo nezimfumbe zabo.

⁷Ukumesaba uJehova kungukuqala kokuhlakanipha; iziwula ziyadelela ukuhlakanipha nokulaywa.

⁸Ndodana yami, yizwa ukulaya kukayihlo, ungawushiyi umthetho kanyoko,

⁹ngokuba kuyakuba ngumqhele omuhle wekhanda lakho, nemigexo entanyeni yakho.

¹⁰Ndodana yami, uma izoni zikuyenga, ungavumi.

¹¹Uma zithi: “Hamba nathi, siqamekele igazi, sibhacele ngeze ongenacala,

¹²sibagwinye besezwa njengendawo yabafileyo, besaphilile njengabehlela egodini;

¹³yonke impahla eyigugu siyakuyifumana, sigcwalise izindlu zethu ngempango;

¹⁴yenza inkatho yakho phakathi kwethu, sibe nesikhwama sinye sonke,”

¹⁵ndodana yami, ungahambi nazo endleleni, unqande unyawo lwakho emikhondweni yazo,

¹⁶ngokuba izinyawo zazo zigijimela ebubini, zishesha ukuchitha igazi.

¹⁷Ngokuba inetha lenekelwe ize emehlweni azo zonke izinyoni.

¹⁸Kepha laba baqamekela elabo igazi, babhacela okwabo ukuphila.

¹⁹Zinjalo izindlela zabo bonke abaphanga impango; iyasusa ukuphila komniniyo.

²⁰Ukuhlakanipha kuyamemeza emigwaqweni, kuyezwakalisa izwi lakho ezigcawini;

²¹emashashalazini emigwaqo kuyaduma; ngasezikhaleni zamasango omuzi kuyakhuluma amazwi akho okuthi:

²²“Koze kube nini iziwula zithanda ubuwula, nezideleli zijabula ukudelela, neziwula zizonda ukwazi, na?

²³Buyani ngokusola kwami; bhekani, ngiyakuthulula umoya wami phezu kwenu, nginazise amazwi ami.

²⁴Ngokuba ngibizile, nala nina; ngelula isandla sami, akubangakho onakayo;

²⁵kepha nichithile konke ukululeka kwami, anivumanga ukusola kwami;

²⁶nami ngiyakuhleka ingozi yenu, ngiklolodele ukufika kwenikwesabayo,

²⁷lapho kufika njengesivunguvungu lokho enikwesabayo, nengozi yenu iza njengesikhwishikhwishi, lapho nehlelwa ngukuhlupheka nosizi.

²⁸“Khona bayakungibiza, kepha angiyikuphendula; bayakungifunisisa, kepha abayikungifumana

²⁹ngenxa yokuba babezonda ukwazi, kabakhethanga ukwesaba uJehova,

³⁰bengavumanga ukululeka kwami, bedelela konke ukusola kwami.

³¹Ngalokho bayakudla izithelo zendlela yabo, basuthe ngamacebo abo.

³²Ngokuba ukuhlehla kwabangenalwazi kuyakubabulala, nokunganaki kweziwula kuyakubabhubhisa.

³³Kepha ongilalelayo uyakuhlala elondekile, agcineke, angabi naluvalo ngokubi.”