Luke 24

¹Kepha ngosuku lokuqala lweviki, kuntwela ngenzansi, bafika ethuneni bephethe amakha ababewalungisile.

²Bafumana itshe ligingqiwe ethuneni.

³Kuthe bengena, abasifumananga isidumbu seNkosi uJesu.

⁴Kwathi besasambathekile yilokho, bheka, nanko amadoda amabili emi ngakubo, enezingubo ezicwebezelayo.

⁵Besesaba bekhothamela phansi ngobuso, athi kubo: “Nifunelani ophilayo kwabafileyo na?

⁶Kakho lapha, kepha uvukile; khumbulani ukukhuluma kwakhe kini eseseGalile,

⁷ethi: ‘INdodana yomuntu imelwe ukukhashelwa ezandleni zabantu abayizoni, ibethelwe, ivuke ngosuku lwesithathu.’ ”

⁸Bawakhumbula-ke amazwi akhe.

⁹Base bebuya ethuneni, babika konke lokho kwabayishumi nanye nakubo bonke abanye.

¹⁰KwakungoMariya Magdalena, noJowana, noMariya unina kaJakobe; nabanye ababe kanye nabo babatshela abaphostoli lokho.

¹¹Kepha lawo mazwi aba njengokukhuluma okuyize kubo, kabaze bakholwa yibo.

¹²Khona uPetru wasuka, wagijimela ethuneni, wakhothama, wabona izindwangu zizodwa; wamuka, waya ekhaya emangele ngokwenzekileyo.

¹³Bheka-ke, ababili babo babehamba ngalona lolo suku, beya emzaneni othiwa i-Emawuse, ukude neJerusalema amastadiyu angamashumi ayisithupha.

¹⁴Babekhulumisana omunye nomunye ngazo zonke lezo zinto ezehlakeleyo.

¹⁵Kwathi besakhuluma bebuzana, uJesu uqobo wasondela, wahambisana nabo.

¹⁶Kepha amehlo abo abebambekile ukuba bangamazi.

¹⁷Wathi kubo: “Zindaba zini lezi enikhuluma ngazo omunye nomunye nihamba na?” Base bema benyukumele.

¹⁸Omunye, nguKleyophase igama lakhe, waphendula, wathi kuye: “Wena uyisihambi eJerusalema, ungoyedwa ongazazi izinto ezenzekileyo khona ngalezi zinsuku na?”

¹⁹Wayesethi kubo: “Zinto zini na?” Bathi kuye: “NgoJesu waseNazaretha obengumprofethi onamandla ngesenzo nangezwi phambi kukaNkulunkulu nabantu bonke,

²⁰ukuthi abapristi abakhulu nababusi bethu bamkhaphela ukunqunyelwa ukufa, baze bambethela esiphambanweni.

²¹Thina-ke besethemba ukuthi nguye ozakuhlenga u-Israyeli; kodwa phezu kwalokho konke sekulusuku lwesithathu lezo zinto zenzekile.

²²Futhi nabesifazane abathile bakithi basethusile, ababeyile ethuneni ekuseni;

²³kuthe bengasifumani isidumbu sakhe, bafika bathi babone nombono wezingelosi ezithi uyaphila.

²⁴Nabathile babakithi baya ethuneni, bakufumana kunjalo njengokuba beshilo abesifazane, kodwa yena uqobo abambonanga.”

²⁵Wayesethi kubo: “O nina eningaqondiyo nenilibele enhliziyweni ukukholwa yikho konke abakushilo abaprofethi!

²⁶UKristu ubengamelwe yini ukuhlupheka ngalokho, aze angene enkazimulweni yakhe na?”

²⁷Wayesethathela kuMose nakubaprofethi bonke, wabachasisela emibhalweni okuqondene naye.

²⁸Base besondela emzaneni ababeya kuwo yena washaya sengathi udlulela phambili.

²⁹Bamncengisisa bathi: “Hlala nathi, ngokuba sekuzakuhlwa, nemini isiyadlula.” Wangena wahlala nabo.

³⁰Kwathi esehlezi nabo ekudleni, wathabatha isinkwa, wabonga, wasihlephula, wabanika.

³¹Amehlo abo ayesevuleka, bamazi; wayesenyamalala kubo.

³²Bathi omunye komunye: “Inhliziyo yethu ibingavuthi yini phakathi kwethu, lapho ekhuluma kithi endleleni, nalapho esivulela imibhalo, na?”

³³Base besuka ngasona leso sikhathi, baphindela eJerusalema, bafumana abayishumi nanye nababe nabo behlangene ndawonye,

³⁴bethi: “Impela iNkosi ivukile, ibonakele kuSimoni.”

³⁵Base belanda nabo okwenzekileyo endleleni, nokuthi yaziwa kanjani yibo ekuhlephuleni isinkwa.

³⁶Besakhuluma lokho, yena uqobo wema phakathi kwabo, wathi kubo: “Ukuthula makube kinina.”

³⁷Kepha bashaywa luvalo, besaba bethi babona ithongo.

³⁸Wayesethi kubo: “Nikhathazekeleni na? Kuvelelani imizindlo ezinhliziyweni zenu na?

³⁹Bhekani izandla zami nezinyawo zami ukuthi yimina uqobo; ngiphatheni, nibone, ngokuba ithongo alinanyama namathambo, njengokuba ningibona nginakho.”

⁴⁰Esekushilo lokho wababonisa izandla nezinyawo.

⁴¹Kepha bengakakholwa ngenxa yentokozo bemangala, wathi kubo: “Ninakho ukudla lapha na?”

⁴²Bamnika iqatha lenhlanzi eyosiweyo neqa lezinyosi.

⁴³Wakuthatha, wadla phambi kwabo.

⁴⁴Wayesethi kubo: “Yiwo lawo mazwi ami engawakhuluma kini ngisenani okuthi: ‘Kumelwe ukugcwaliseka konke okulotshwe ngami emthethweni kaMose, nakubaprofethi nasemaHutsheni.’ ”

⁴⁵Khona wayesevula ingqondo yabo, ukuze baqonde imibhalo.

⁴⁶Wathi kubo: “Kulotshiwe kanje ukuthi uzakuhlupheka uKristu, avuke kwabafileyo ngosuku lwesithathu,

⁴⁷kushunyayelwe egameni lakhe ukuphenduka, kube ngukuthethelelwa kwezono ezizweni zonke, kuqalwe eJerusalema.

⁴⁸Nina-ke ningofakazi balezi zinto.

⁴⁹Bhekani, ngiyathumela kini isithembiso sikaBaba; kepha hlalani emzini, nize nembathiswe amandla avela phezulu.”

⁵⁰Wabahola, baze bafika ngaseBethaniya, waphakamisa izandla zakhe, wababusisa.

⁵¹Kwathi esababusisa, wahlukana nabo, wenyuselwa ezulwini.

⁵²Bakhuleka kuye, baphindela eJerusalema benokuthokoza okukhulu.

⁵³Babekhona ethempelini njalo bemdumisa uNkulunkulu.