Behemoth

¹UJehova wayesemphendula uJobe, wathi:

²“Osolayo uyakuphikisana noSomandla na? Omkhuza uNkulunkulu makaphendule.”

³UJobe wamphendula uJehova, wathi:

⁴“Bheka, angiyinto yalutho; ngingakuphendula ngokuthini na? Ngibeka isandla sami emlonyeni wami.

⁵Ngikhulumile kanye, angisayikuphendula, yebo, kabili, kepha angiqhubeki.”

⁶UJehova wayesemphendula uJobe esesikhwishikhwishini, wathi:

⁷“Bopha izinkalo zakho njengendoda; ngizakukubuza, wena ungazise.

⁸Imbala uyachitha ukwahlulela kwami, ungilahle ukuba ube ngolungileyo, na?

⁹Unengalo njengoNkulunkulu, ungaduma ngezwi elinjengelakhe, na?

¹⁰Zihlobise ngobukhosi nangokuphakama, wembathe udumo nenkazimulo.

¹¹Thulula ukuphuphuma kwentukuthelo yakho, ubheke bonke abazidlayo, ubathobise.

¹²Bheka bonke abaziphakamisayo, ubehlise phansi, unyathele ababi ezindaweni zabo.

¹³Bafihle othulini kanyekanye, ubophe ubuso babo endaweni ethukusiweyo.

¹⁴Khona ngiyakukudumisa nami ngokuthi isandla sakho sokunene singakusindisa.

¹⁵“Ake ubheke uBehemoti engamenza kanye nawe; uyadla utshani njengenkabi.

¹⁶Bheka-ke, amandla akhe asezinkalweni zakhe, nezikhwepha zakhe zisemisipheni yesisu sakhe.

¹⁷Uqinisa umsila wakhe njengomsedari; imisipha yamathanga akhe yalukene.

¹⁸Amathambo akhe anjengemibhobo yethusi; izimbambo zakhe zinjengemigoqo yensimbi.

¹⁹Ungowokuqala wezidalwa zikaNkulunkulu; ekwenziweni waphiwa inkemba yakhe.

²⁰Izintaba ziyamvezela ukudla, lapho kudlala khona izilwane zonke zasendle.

²¹Ulala phansi kwezihlahla ezinomthunzi ekusitheni kwemihlanga nasemaxhaphozini.

²²Izihlahla ezinomthunzi ziyamsibekela ngomthunzi wazo; iminyezane yasemfuleni iyamphahla.

²³Bheka, noma kuphuphuma umfula, akethuki; uyaqalaba, noma iJordani ligijigijimela emlonyeni wakhe.

²⁴Angabanjwa ebhekile, liqhunjuzelwe ikhala lakhe umkhala, na?