God's Majesty

¹“Yebo, ngenxa yalokho iyathuthumela inhliziyo yami, isuke endaweni yayo.

²Yizwani, nizwe indumo yezwi lakhe, nemvunge ephuma emlonyeni wakhe.

³Uyakukhipha phansi kwalo lonke izulu, nonyazi lwakhe luya emagumbini omhlaba.

⁴Emva kwalo kuduma izwi; uduma ngezwi lobukhosi bakhe; kalumisi unyazi, lapho lizwakala izwi lakhe.

⁵UNkulunkulu uyaduma ngezwi lakhe ngokumangalisayo; wenza izinto ezinkulu esingaziqondi.

⁶Ngokuba uthi eqhweni: ‘Khithika emhlabeni;’ kanjalo nasesihlambini semvula, yebo, ezihlambini zemvula zakhe ezinamandla.

⁷Uyanamathelisa izandla zabantu bonke ukuba bonke abantu bazi imisebenzi yakhe.

⁸Seziya izilwane ezikhundleni zazo, zihlale emihumeni yazo.

⁹Isikhwishikhwishi siphuma ekamelweni laso, namakhaza emimoyeni ehlakazayo.

¹⁰Ngokuphefumula kukaNkulunkulu kuvela ungqoqwane, ububanzi bamanzi buqine.

¹¹Yebo, uyathwesa amafu ngokuswakama; uyeneka amafu onyazi lwakhe.

¹²Ayajika, aphenduke njengokunquma kwakhe ukuba enze konke awayalayo ebusweni bomhlaba owakhiweyo,

¹³awafikise abe luswazi, afike ngenxa yomhlaba noma ngenxa yomusa.

¹⁴“Beka indlebe kulokhu, Jobe; yima, uqonde izimangaliso zikaNkulunkulu.

¹⁵Uyazi yini ukuthi uNkulunkulu uwayala kanjani, enze ukuba unyazi lwamafu akhe lukhanye na?

¹⁶Uyaqonda yini ukulinganiswa kwamafu, izimangaliso zoPhelele olwazini,

¹⁷wena ozingubo zakho zifudumala, lapho ethulisa umhlaba ngeshisandlu, na?

¹⁸Ungeneka isibhakabhaka njengaye, esiqinile njengesibuko esibunjiweyo, na?

¹⁹Sifundise ukuthi siyakuthini kuye; asinakuhlela indaba yethu ngenxa yobumnyama.

²⁰Uyakutshelwa ukuthi ngiyakhuluma na? Ukhona yini oshoyo ukuthi makabhubhe na?

²¹Manje, abantu abanakukubona ukukhanya okukhazimula esibhakabhakeni,

²²Ngasenyakatho kuvela inkazimulo yegolide; uNkulunkulu wembethe ubukhosi obesabekayo.

²³USomandla singemqonde; mkhulu ngamandla nangokwahlulela; ngokulunga kwakhe okukhulu akoni lutho.

²⁴Ngalokho abantu bayamesaba; kepha akanaki abazishaya izihlakaniphi ngenhliziyo.”