Elihu Rebukes Job

¹U-Elihu wathatha wathi:

²“Usho uthi lokhu kulungile na? Uthi: ‘Yilungelo lami kuNkulunkulu yini,’

³njengokuba uthi: ‘Kungisiza ngani?’ nokuthi: ‘Ngizuzeni kunalokho ebengiyakukuzuza, uma ngonile, na?’

⁴“Ngizakukuphendula mina ngamazwi, wena nabangane bakho.

⁵Bheka ngasezulwini, ubone, uqaphele amafu aphakeme kunawe.

⁶Uma wona, wenzani kuye na? Uma iziphambeko zakho ziziningi, wenzani kuyena na?

⁷Uma ulungile, umnikani yena, noma umukelani esandleni sakho na?

⁸Ububi bakho buqondene nomuntu onjengawe, nokulunga kwakho kuthintana nendodana yomuntu.

⁹“Abantu bakhala ngobuningi bezinkahlo; bakhala ngokusizwa ngenxa yengalo yabanamandla.

¹⁰Kepha akakho othi: ‘Uphi uNkulunkulu, uMenzi wami, ozwakalisa amahubo ebusuku,

¹¹osifundisa phezu kwezilwane zomhlaba, asenze sihlakaniphe phezu kwezinyoni zezulu.’

¹²Lapho bayakhala ngokuzidla kwababi, kepha akaphenduli.

¹³Impela uNkulunkulu akezwa okuyize, uSomandla akayikukunakekela;

¹⁴kakhulu kangakanani, lapho uthi awumboni nokuthi, noma icala liphambi kwakhe, usamhlalela, na?

¹⁵Kepha manje, ngokuba intukuthelo yakhe ingajezisi, anganaki kakhulu iziphambeko,

¹⁶uJobe uvulela ize umlomo wakhe; uyandisa amazwi engenalwazi.”