Elihu Continues

¹“Kepha manje, Jobe mawuzwe amazwi ami,

²Bheka-ke, sengivula umlomo wami; ulimi lwami lukhuluma emlonyeni wami.

³Amazwi ami avela enhliziyweni yami eqotho; okwaziwa yizindebe zami ziyakukhuluma ngesiminya.

⁴Umoya kaNkulunkulu ungenzile, nokuphefumula kukaSomandla kunginika ukuphila.

⁵Uma ukwazi, ngiphendule; zihlele phambi kwami, ume.

⁶Bheka, nginjengawe maqondana noNkulunkulu: ngibunjiwe nami ngebumba.

⁷Bheka, ingebhe ngami ayiyikukugebhezisa, nesandla sami esiphezu kwakho asiyikukusinda.

⁸“Impela wakhuluma ezindlebeni zami, ngezwa izwi lokukhuluma kwakho ukuthi:

⁹Ngimsulwa, anginasiphambeko; ngimhlophe, akukho okubi kimi.

¹⁰Bheka, uthola amathuba ngami, ungishaya isitha sakhe.

¹¹Ufaka izinyawo zami ezingongolweni, aqaphele zonke izindlela zami.

¹²“Bheka, ngiyakuphendula ukuthi awuthethanga kahle lokho, ngokuba uNkulunkulu mkhulu kunomuntu.

¹³Umphikiselani ngokuthi: Akaphenduli nelilodwa lamazwi ami.

¹⁴Ngokuba uNkulunkulu ukhuluma kanye, yebo, nakabili, umuntu engakunaki.

¹⁵Ephusheni nasembonweni wasebusuku, lapho abantu behlelwe ngubuthongo obunzima, bozela emacansini,

¹⁶khona uyavula izindlebe zabantu, abeke uphawu ekufundisweni kwabo,

¹⁷ukuze aphambukise umuntu ekwenzeni kwakhe, anqume ukuzidla kumuntu;

¹⁸unqanda umphefumulo wakhe ekubhujisweni, nokuphila kwakhe ukuba kungachithwa ngomkhonto.

¹⁹Uyajeziswa ngobuhlungu nasecansini lakhe, nangokulwa okungapheliyo emathanjeni akhe.

²⁰Inhliziyo iyanengwa ngukudla, nomphefumulo wakhe uzonda ukudla okade ukufisa.

²¹Inyama yakhe iyadliwa, ingabe isabonwa; amathambo akhe akade engabonakali aseqhamukile.

²²Umphefumulo wakhe uyasondela egodini, nokuphila kwakhe kubabulali.

²³“Uma kukhona ingelosi kuye, nehumusha noma yiliphi enkulungwaneni lokuba litshele umuntu okumlungeleyo,

²⁴uNkulunkulu abeseba nomusa kuye, athi: ‘Mkhulule ukuba angehleli egodini, sengitholile ihlawulo,’

²⁵inyama yakhe ibe ntsha kuneyomntwana, abuyele emihleni yobusha bakhe,

²⁶khona uyakunxusa uNkulunkulu ukuba abe nomusa kuye, abone ubuso bakhe ngokujabula, abesebuyisela kumuntu ukulunga kwakhe.

²⁷Usehlabelela phambi kwabantu, uthi: ‘Ngonile, ngahlanekezela ukulunga, kepha akwenziwanga kimi njengokufaneleyo:

²⁸uhlengile umphefumulo wami ukuba ungadluleli egodini; ngiyakubona ukukhanya ngiphila.’

²⁹“Bhekani, konke lokhu uNkulunkulu uyakwenza kabili, yebo, kathathu kumuntu

³⁰ukuba abuyise umphefumulo wakhe egodini, akhanyiselwe ngokukhanya kwabaphilayo.

³¹Yizwa, Jobe, ungilalele; thula, mina ngizakukhuluma.

³²Uma unamazwi, ngiphendule; khuluma, ngokuba ngifisa ukukuthethelela.

³³Uma ungenawo, ngilalele wena; thula, ngiyakukufundisa ukuhlakanipha.”