Eliphaz's Third Speech

¹Wayesethatha u-Elifazi umThemani, wathi:

²“Umuntu angaba yinsizakalo kuNkulunkulu ukuba ohlakaniphileyo abe nosizo kuye na?

³Kuyintokozo yini kuSomandla, uma ulungile, kuyinzuzo kuye, uma wenza izindlela zakho ziphelele, na?

⁴“Kungokumesaba kwakho akusolayo, angene nawe ekwahlulelweni, na?

⁵Ububi bakho abubukhulu yini? Izono zakho azinakuphela.

⁶Ngokuba uthathe ngeze izibambiso kumfowenu, wahlubula abampofu izingubo zabo.

⁷Awumphuzisanga owomileyo amanzi, wamgodlela olambileyo ukudla.

⁸Umuntu onamandla, izwe lingelakhe; onodumo uyahlala kulo.

⁹Umukisile abafelokazi bengenalutho; izingalo zezintandane zaphuliwe.

¹⁰Ngalokho izingibe ziyakuhaqa; uvalo oluzumayo luyakwethusa.

¹¹Ukukhanya kwakho kuphenduke ubumnyama, ukuze ungaboni, nesikhukhula samanzi siyakusibekela.

¹²“UNkulunkulu akakho ekuphakameni kwezulu na? Bheka inhloko yezinkanyezi ukuthi iphakeme kangaka.

¹³Uthi wena: ‘UNkulunkulu wazini na? Angahlulela engale kwesigayegaye na?

¹⁴Amafu ayamsibekela ukuze angaboni; uyahamba esiyingelezini sezulu.’

¹⁵Uyakugcina indlela yamandulo eyahanjwa yizoni na?

¹⁶Yizo ezahlwitha kungakabi yisikhathi, ezisisekelo sazo sathululwa njengomfula,

¹⁷nezathi kuNkulunkulu: ‘Suka kithina, ngokuba uSomandla ubeyakwenzani kubo na?’

¹⁸Kepha nguye owayegcwalisa izindlu zabo ngokuhle. Amasu ababi akude nami.

¹⁹“Abalungileyo bayakukubona, bathokoze; abangenasici bayabaklododela ngokuthi:

²⁰‘Impela ababesivukela sebechithiwe, nabakushiyileyo umlilo ukuqedile.’

²¹“Mawujwayelane naye, ube nokuthula; ngalokho okuhle kuyakufika kuwe.

²²Mawamukele umthetho emlonyeni wakhe, ubeke amazwi akhe enhliziyweni yakho.

²³Uma ubuyela kuSomandla, uyakwakhiwa, uma udedisa okubi kude etendeni lakho,

²⁴ubeke igolide lakho othulini, nelase-Ofiri phakathi kwamatshe eminonjana.

²⁵USomandla uyakuba yigugu lakho, nesiliva elikhazimulayo kuwe,

²⁶ngokuba lapho uyakuthokoza ngoSomandla, uphakamisele kuNkulunkulu ubuso bakho.

²⁷Uyakukhuleka kuye, akuzwe, wena ugcwalise izithembiso zakho.

²⁸Uma unquma indaba, uyakuyenzelwa, ukukhanya kukhanye ezindleleni zakho.

²⁹Uma zehla, uyakuthi: ‘Phezulu!’ abesephakanyiswa ozithobileyo.

³⁰Abantu abangemsulwa uyakubakhulula nabo, bakhululwe ngobumhlophe bezandla zakho.”