Zophar's Second Speech

¹Wayesethatha uSofari umNahama, wathi:

²“Ngalokho imicabango yami iyangiphendula ngenxa yokushesha okuphakathi kwami.

³Ngiyezwa insolo engihlazisayo, kepha umoya wasengqondweni yami uyangiphendula.

⁴“Awukwazi yini ukuba lokhu kungokwasendulo, selokhu abantu babekwa emhlabeni,

⁵ukuthi ukujabula kwababi kufushane, nokuthokoza kwabangenaNkulunkulu kungokokuphazima kweso nje, na?

⁶Noma ubukhulu bakhe bukhuphukela ezulwini, nekhanda lakhe lifinyelela emafwini,

⁷uyakubhubha kuze kube phakade njengamasimba akhe; abambonayo bayakuthi: ‘Uphi na?’

⁸Uyakundiza njengephupho, angabe esafunyanwa; uyakuxoshwa njengombono wasebusuku.

⁹Iso elalimgqolozela alisamboni, nendawo yakhe ayisamboni.

¹⁰Abantwana bakhe bayakuzincengela kwabampofu, izandla zakhe zibuyise impahla yakhe.

¹¹Amathambo akhe agcwele ubusha, kepha buyakulala phansi kanye naye othulini.

¹²“Noma ububi bumnandi emlonyeni wakhe, noma ebufihla phansi kolimi lwakhe,

¹³noma ebugodla engabushiyi, kepha ebugcina emlonyeni wakhe,

¹⁴kuyaguquka nokho ukudla kwakhe phakathi kwakhe, kube yinyongo yamabululu ezibilinini zakhe.

¹⁵Ugwinyile ingcebo; uyakubuye ayihlanze; uNkulunkulu uyakuyikhipha esiswini sakhe.

¹⁶Uyakumunca isihlungu samabululu; ulimi lwenyoka luyakumbulala.

¹⁷Akayikubuka imifula, iminonjana nemifudlana yezinyosi namangqanga.

¹⁸Lokho owakukhandlekelayo uyakukubuyisa, angakugwinyi; ngempahla ayitholileyo akayikujabula.

¹⁹Ngokuba ucindezele, washiya abampofu; uhlwithile indlu, angabuye ayakhe.

²⁰“Ngokuba wayengazi ukuthula esiswini sakhe; kayikuphepha nalutho kulokho akufisayo.

²¹Akusalanga lutho angaludlanga; ngalokho inhlanhla yakhe ayiyikuma.

²²Ekusutheni kokuvama kwakhe uyaminywa; izandla zakho konke ukuhlupheka ziyakumfikela.

²³Kuyakuthi lapho eyakugcwalisa isisu sakhe, uNkulunkulu aphonse kuye ukuvutha kwentukuthelo yakhe, akunise phezu kwakhe esekudleni.

²⁴Uyabalekela isikhali sensimbi, kepha ubhotshozwa ngumnsalo wethusi.

²⁵Uyawukhipha uphume emzimbeni wakhe; nxa uphuma unyampuza enyongweni, abesehlelwa yingebhe.

²⁶Ubumnyama bonke bubekelelwe ingcebo yakhe; umlilo ongavuthelwanga uyakuyidla, uchithe okusele etendeni lakhe.

²⁷Izulu liyakwambula ububi bakhe, umhlaba umvukele.

²⁸Imfuyo yendlu yakhe iyakumuka, inyamalale ngomuhla wentukuthelo.

²⁹Lesi siyisabelo somuntu omubi esivela kuNkulunkulu, nefa alinqunyelweyo nguNkulunkulu.”