Bildad's Second Speech

¹Wayesethatha uBilidadi umShuhi, wathi:

²“Koze kube nini nibekela amazwi ami izingibe na? Qondani, andukuba sikhulume.

³Kungani ukuba sithiwe siyizilwane, singcolile emehlweni enu, na?

⁴Wena ozidwengula olakeni lwakho, umhlaba uyakushiywa ngenxa yakho, nedwala lisuswe endaweni yalo, na?

⁵Yebo, nokukhanya komubi kuyakucimeka, nelangabi lomlilo wakhe aliyikukhanya.

⁶Ukukhanya kuyakufiphala etendeni lakhe, nesibani sakhe phezu kwakhe siyakucimeka.

⁷Izinyathelo zakhe ezinamandla ziyakufinyezwa; amasu akhe ayamlahla phansi.

⁸Ngokuba uyaphonswa yizinyawo zakhe enetheni, uhamba phezu kweveku.

⁹Isicupho siyakumbamba ngesithende; ifolo liyakumbamba.

¹⁰Uthukuselwe inkintshela emhlabathini, nesihibe emgwaqweni.

¹¹Ingebhe iyakumethusa nxazonke; iyamzingela ezinyathelweni zakhe.

¹²Ububi buyakumlambela, ulungiselwe ingozi eceleni kwakhe.

¹³Amalungu omzimba wakhe ayakudliwa, yebo, ukufa okwesabekayo kuyakudla amalungu akhe.

¹⁴Uyakuhlwithwa etendeni lakhe alethembayo, ayiswe enkosini yengebhe.

¹⁵Etendeni lakhe bayakuhlala abangesibo abakhe, kuvumvuzelwe isibabule ekhaya lakhe.

¹⁶Izimpande zakhe ziyakoma ngaphansi; phezulu kuyabuna amagatsha akhe.

¹⁷Ukukhunjulwa kwakhe kuyakuphela emhlabeni, angabi negama ezweni.

¹⁸Uyakukhishwa ekukhanyeni, aqhutshelwe ebumnyameni, axoshwe ezweni.

¹⁹Akayikuba nandodana namzukulwana phakathi kwabantu bakhe; akuyikuba khona lapho egogobala khona.

²⁰Abasentshonalanga bayethuswa lusuku lwakhe, nabasempumalanga babanjwa ngukwesaba.

²¹Impela zinjalo izindlu zaboni; injalo indawo engamazi uNkulunkulu.”