Eliphaz's Second Speech

¹Wayesethatha u-Elifazi umThemani, wathi:

²“Ohlakaniphileyo uyakuphendula ngokwazi okungumoya nje, agcwalise isisu ngomoya wasempumalanga, na?

³Aphikisane ngamazwi angasizi lutho nangezinkulumo ezingenalusizo na?

⁴Yebo, uyachitha ukwesaba, unciphisa ukuzindla phambi kukaNkulunkulu.

⁵Ngokuba ububi bakho buyafundisa umlomo wakho; ukhetha ulimi lwabanobuqili.

⁶Ngumlomo wakho okulahlayo, akusimi; izindebe zakho ziyafakaza ngawe.

⁷Ungumuntu wokuqala owazalwayo na? Wavela ngaphambi kwezintaba na?

⁸Uzwile imfihlakalo kaNkulunkulu, wazigodlela wedwa ukuhlakanipha na?

⁹Wazini esingayazi thina na? Uqonda ntoni engekho kithina na?

¹⁰Kithina kukhona izimpunga namakhehla amadala kunoyihlo.

¹¹Zincane yini kuwe izinduduzo zikaNkulunkulu, nezwi elikhulunywa kahle kuwe na?

¹²Umukiselwani yinhliziyo yakho na? Kungani ukuba amehlo akho aphayizele,

¹³uphendulele kuNkulunkulu ukufutheka kwakho, ukhiphe amazwi emlonyeni wakho na?

¹⁴Uyini umuntu ukuba abe ngohlambulukileyo, nozelwe ngowesifazane ukuba alungisiswe, na?

¹⁵Bheka, nabangcwele bakhe akabethembi, nezulu alihlambulukile emehlweni akhe;

¹⁶kakhulu kangakanani onengekayo nowonakeleyo, umuntu ophuza ukona njengamanzi, na?

¹⁷“Ngiyakukwazisa, ungilalele; ngiyakukulandisa engikubonileyo

¹⁸lokho izihlakaniphi ezikubonakalisile, zikuthathe koyise, zingakufihlanga,

¹⁹zona ezaphiwa zodwa izwe, kungadabulanga kuzo umfokazi ngokuthi:

²⁰Umuntu omubi uyazibinya imihla yonke, umumo weminyaka othukuselwe isidlwangudlwangu.

²¹Izwi lengebhe lisezindlebeni zakhe; lapho ehlezi kahle, uyakufikelwa ngumphangi.

²²Akethembi ukuthi uyakubuya ebumnyameni; uyalindelwa yinkemba.

²³Uyazulazulela ukudla: kuphi na? Uyazi ukuthi usuku lobumnyama selungasesandleni sakhe.

²⁴Ukuhlupheka nosizi kuyamethusa; kuyamahlula njengenkosi ezilungiselele impi,

²⁵ngokuba waselulela isandla sakhe kuNkulunkulu, wazigabisa kuSomandla.

²⁶Wamdumela ngentamo elukhuni, nangamaqhubu adumbileyo amahawu akhe,

²⁷ngokuba wasibekela ubuso bakhe ngamafutha akhe, wenza umvingqi okhalweni lwakhe.

²⁸Wahlala emizini ebiyakuchithwa, nasezindlini ebezingahlalwa, ezaziyakuba ngamanxiwa nje.

²⁹Akayikuceba, nemfuyo yakhe ayiyikuma, nokudla kwakhe akuyikukhothamela phansi.

³⁰Akayikusuka ebumnyameni; ilangabi liyakushisa amagatsha akhe, amuke ngokuphefumula komlomo kaNkulunkulu.

³¹Makangethembi ezeni, ezikhohlisa, ngokuba ize liyakuba ngumvuzo wakhe.

³²Kuyakufezwa kungakabi yisikhathi, negatsha lakhe alisayikuba luhlaza.

³³Uyakuvuthulula igwanya lakhe njengomvini, alahle imbali yakhe njengomnqumo.

³⁴Ngokuba ibandla labangenaNkulunkulu liyakuba yinyumba, umlilo uqede amatende abathengwa ngemivuzo.

³⁵Bakhulelwe ingozi, bazala ukona; isisu sabo silungisela inkohliso.”