Job's Confidence

¹“Bheka, iso lami libone konke; indlebe yami ikuzwile, yakuqonda.

²Enikwaziyo ngiyakwazi nami; angahlulwa yinina.

³Kepha ngiyakukhuluma kuSomandla; ngifuna ukuphikisana noNkulunkulu.

⁴Kepha ningabaqambimanga; niyizinyanga ezingelutho nonke.

⁵Sengathi ningathula nokuthula, lokho kube ngukuhlakanipha kini.

⁶Ake nizwe ukuthetha kwami, niqaphele ukuzivikela kwezindebe zami.

⁷Niyakumkhulumela uNkulunkulu ngokubi, nimkhulumele ngenkohliso, na?

⁸Niyakubuvuma ubuso bakhe, nimmele uNkulunkulu, na?

⁹Kuhle yini, lapho eniphendla? Njengalokhu umuntu ekhohliswa niyakumkhohlisa na?

¹⁰Uyakunisola nokunisola, uma nivuna ubuso ngasese.

¹¹Ubukhulu bakhe abuyikunethusa, nengebhe ngaye inehlele, na?

¹²Izikhumbuzo zenu ziyizaga zomlotha; izivikelo zenu ziyizivikelo zebumba.

¹³“Thulani, ningiyeke ukuba ngikhulume, kungehlele noma yini.

¹⁴Bengiyakuyithathelani inyama yami ngamazinyo ami, ngibeke ukuphila kwami esandleni sami, na?

¹⁵Bheka, uyakungibulala, anginathemba; nokho ngiyakuvikela izindlela zami ebusweni bakhe.

¹⁶Lokhu kuyakuba yinsindiso yami ukuthi ongenaNkulunkulu akezi phambi kwakhe.

¹⁷Zwisisani amazwi ami, ukusho kwami kube sezindlebeni zenu.

¹⁸Bhekani-ke, sengilungisile ukwahlulelwa kwami; ngiyazi ukuthi ngiyakuthethwa mina.

¹⁹Ngubani oyakuphikisana nami na? Ngokuba lapho bengiyakuthula, ngigqabuke.

²⁰Izinto ezimbili kuphela ungazenzi kimi, ngize ngingacasheli ubuso bakho:

²¹masingasondeli kimi isandla sakho, ngingethuswa yingebhe ngawe.

²²Khona mawubize, mina ngiyakuphendula, noma kukhulume mina, wena ungiphendule.

²³Iziphambeko zami nezono zami zingakanani na? Ngazise izeqo zami nezono zami.

²⁴Usithelani ubuso bakho, ungishaye isitha, na?

²⁵Uyakwethusa iqabunga eliphephethwayo, uxoshe amabibi awomileyo, na?

²⁶Ngokuba uloba okumunyu ngami, ungidlisa ifa lobubi bobusha bami;

²⁷ufaka izinyawo zami ezingongolweni, uqaphela zonke izindlela zami, uzidwebela umudwa ngasematheni ezinyawo zami,

²⁸noma nginyamalala njengokubolayo, njengengubo edliwe yizinundu.