Job Replies to Zophar

¹uJobe, wathi:

²“Impela yinina eningabantu; ukuhlakanipha kuyakufa nani.

³Kodwa nami nginengqondo njengani, angahlulwa yinina; ngubani ongazazi izinto ezinje na?

⁴Ngiyisigcono somngane wami, ngowambiza uNkulunkulu, waphendula; olungileyo nongenasici uyisigcono.

⁵Emcabangweni wohlezi kahle ingozi iyadeleleka; kulungiselwe abazinyawo zabo zishelela.

⁶Amatende abacindezelayo anokuthula; abathukuthelisayo uNkulunkulu bayalondeka, abaletha unkulunkulu wabo ngezandla zabo.

⁷Kepha mawubuze izinkomo, ziyakukufundisa, nezinyoni zezulu, ziyakukutshela.

⁸Khuluma kuwo umhlaba, uyakukufundisa, nezinhlanzi zolwandle ziyakukulandisa.

⁹Ngubani ongaziyo ngakho konke lokho ukuthi isandla sikaJehova sikwenzile lokho na?

¹⁰Esandleni sakhe ukhona umphefumulo wakho konke okuphilayo, nomoya wenyama yabantu bonke.

¹¹Indlebe ayivivinyi yini amazwi, njengolwanga lunambitha ukudla, na?

¹²Ezimpungeni kukhona ukuhlakanipha, nasebudeni bezinsuku ukuqonda.

¹³“Kuyena kukhona ukuhlakanipha namandla; unesu nokuqonda.

¹⁴Bheka, uyadiliza, kungabe kusakhiwa; uyavalela umuntu, kungabe kusavulwa.

¹⁵Bheka, uyavimba amanzi, ashe; uyawathumela agumbuqele umhlaba.

¹⁶Kuye kukhona amandla nokusizwa; odukisiweyo nodukileyo bakuye.

¹⁷Umukisa abaluleki bephangiwe; uyenza abahluleli babe yiziwula.

¹⁸Uthukulula izibopho zamakhosi, awabophe ezinkalweni ngamaketanga.

¹⁹Umukisa abapristi bephangiwe, aphenule abemiyo njalo.

²⁰Uyasusa ulimi lwabathembekileyo, aphuce amalunga ukuqonda.

²¹Uthela izikhulu ngehlazo, akhumule imbonya yonamandla.

²²Uyambula izinto ezijulileyo ebumnyameni, akhiphele ekukhanyeni ithunzi lokufa.

²³Uyandisa izizwe, abesezibhubhisa; ukhulisa izizwe, abesezisusa.

²⁴Uyamuka izinhloko zezizwe ezweni ingqondo yazo, azidukise ehlane elingenandlela.

²⁵Ziyaphumputha ebumnyameni zingenakukhanya, uyazintengantengisa njengesidakwa.