David's Song of Deliverance

¹UDavide wakhuluma kuJehova amazwi aleli hubo mhla uJehova emophula esandleni sezitha zakhe zonke nasesandleni sikaSawule,

²wathi: “UJehova uyidwala lami, nenqaba yami, nomkhululi wami;

³uNkulunkulu uyidwala lami engiphephela kulo, nesihlangu sami, nophondo lokusindiswa kwami, inqaba yami ephakemeyo nesiphephelo sami; msindisi wami, uyangisindisa ebudloveni.

⁴Ngiyamemeza kuJehova odumisekayo, ngisindiswe ezitheni zami.

⁵“Ngokuba amaza okufa angihaqa; izikhukhula zokona zangethusa.

⁶Izintambo zasendaweni yabafileyo zangizungeza, izihibe zokufa zangehlela.

⁷Ekuhluphekeni kwami ngambiza uJehova, ngakhala kuNkulunkulu wami; walizwa izwi lami esethempelini lakhe; ukukhala kwami kwangena ezindlebeni zakhe.

⁸“Umhlaba wawusuzamazama, wadikizela; izisekelo zezulu zathuthumela, zaqhaqhazela ngokuba ethukuthele.

⁹Kwenyuka umusi emakhaleni akhe, nomlilo odlayo emlonyeni wakhe; amalahle avutha kuye.

¹⁰Wathobisa izulu, wehla; ubumnyama babuphansi kwezinyawo zakhe.

¹¹Wakhwela phezu kwekherubi, wandiza; wabonwa emaphikweni omoya.

¹²Wenza ubumnyama bube ngamadokodo amphahlayo, amanzi aqoqane, amafu abe nzima.

¹³Ekukhazimuleni okuphambi kwakhe kwavuthiswa amalahle omlilo.

¹⁴UJehova waduma ezulwini; oPhezukonke walizwakalisa izwi lakhe.

¹⁵Wathuma imicibisholo, wabangquzula, yebo, nonyazi, wabadidizelisa.

¹⁶Kwase kubonakala imisinga yamanzi; izisekelo zomhlaba zambulwa ngesijeziso sikaJehova, ngokufutha komoya wamakhala akhe.

¹⁷Waselula isandla sakhe ephezulu, wangibamba; wangikhipha emanzini amaningi.

¹⁸Wangophula esitheni sami esinamandla nakubo abangizondayo, ngokuba base bengahlulile.

¹⁹Bangihlasela ngosuku lwesigemegeme sami, kepha uJehova waba yinsika yami.

²⁰Wangiphumisela endaweni ebanzi: wangikhulula, ngokuba ebethokoza ngami.

²¹“UJehova wangivuza ngokokulunga kwami; wangibuyisela njengokuhlanzeka kwezandla zami.

²²Ngokuba ngizigcinile izindlela zikaJehova; angimukanga kuNkulunkulu wami ngokushinga.

²³Ngokuba yonke imithetho yakhe yayiphambi kwami, nezimiso zakhe angizivumanga ukuba zisuke kimi.

²⁴Ngangiphelele kuye; ngabuxwaya ububi.

²⁵UJehova wayesebuyisela kimi njengokulunga kwami, njengokuhlanzeka kwami phambi kwamehlo akhe.

²⁶“Kothembekileyo uyazibonakalisa ethembekile; kumuntu oqotho uyazibonakalisa eqotho;

²⁷kohlanzekileyo uyazibonakalisa ehlanzekile; koyisigwegwe uyazibonakalisa enenkani.

²⁸Uyasindisa abantu abathobekileyo, kepha amehlo akho aphezu kwabaqhoshileyo ukuba ubathobise.

²⁹Ngokuba wena uyisibani sami, Jehova; uJehova uyakhanyisa ubumnyama bami.

³⁰Ngokuba ngawe ngingahlasela impi; ngoNkulunkulu wami ngingeqa ugange.

³¹Indlela kaNkulunkulu iphelele; izwi likaJehova lihlanzekile; yena uyisihlangu kubo bonke abaphephela kuye.

³²“Ngokuba ngubani onguNkulunkulu ngaphandle kukaJehova, ngubani oyidwala ngaphandle kukaNkulunkulu wethu na?

³³UNkulunkulu uyangibhincisa amandla; uyenza indlela yami ilunge,

³⁴yena owenza izinyawo zami zibe njengezendluzelekazi, angimise emagqumeni ami;

³⁵ofundisa izandla zami ukulwa, ukuze izingalo zami zinsale umnsalo wethusi.

³⁶Wena unginikile isihlangu sensindiso yakho; ubumnene bakho bungikhulisile.

³⁷Amabanga okunyathela kwami uwandisile; amaqakala ami awaxegi.

³⁸“Ngazixosha izitha zami, ngazifica; angibuyanga ngingakaziqedi.

³⁹Ngaziqeda, ngaziphahlaza, zaze zahluleka ukuvuka; zawa phansi kwezinyawo zami.

⁴⁰Wangibhincisa amandla okulwa; ababengivukele wabathobisa phansi kwami.

⁴¹Wangifulathelisela izitha zami, nabangizondayo ngabaqothula.

⁴²Bakhala, kepha akubangakho osindisayo, nakuJehova, kodwa akaze aphendula.

⁴³Ngabacolisisa njengothuli lomhlabathi; ngabagxoba, ngabalahla njengensila ezitaladini.

⁴⁴“Wangikhulula ezimpini zabantu bami; wangilonda ngaba yinhloko yabezizwe; abantu engingabaziyo bangikhonza.

⁴⁵Abafo bazithoba phansi kwami; banele ukungizwa nje ngendlebe, base bengilalela.

⁴⁶Abafo babuna, baphuma ezinqabeni zabo bethuthumela.

⁴⁷“UJehova usekhona malidunyiswe idwala lami; makaphakanyiswe uNkulunkulu wensindiso yami,

⁴⁸uNkulunkulu onginikile impindiselo, wathobisa izizwe phansi kwami;

⁴⁹ongikhiphile ezitheni zami, wangiphakamisa phezu kwabangivukelayo, wangikhulula kumuntu oyisidlwangudlwangu.

⁵⁰Ngalokho-ke ngizakukubonga phakathi kwabezizwe, Jehova, ngilihubele igama lakho.

⁵¹Uyenza insindiso ibe nkulu enkosini yakhe; uyenza umusa kogcotshiweyo wakhe uDavide nasenzalweni yakhe kuze kube phakade.”