The Day of the LORD

¹“O tla otlollela seatla sa gagwe thoko ya leboa, a fediša Asiria. O tla dira Ninife lešope, tikologo e se nago meetse e etšago lešoka."

²Dihuswane le dibata ka moka di tla robala go yena. Mogole gotee le noko di tla lala dintlheng tša dikokwane tša gagwe. Molodi wa nonyana o tla lla lefasetereng. Serepoding go tla tlala mokgobo wa ditšhila; ka gobane o tla manolla maboto a manegilwego ka mapolanka."

³Wo ke motse wa lethabo wo o bego o iketlile, woo pelong ya wona o bego o re: ‘Ke nna ke nnoši, ga go yo mongwe.’ Ruri o fetogile selo seo se tlabago, moo dibata di robalago ka boiketlo! Yo mongwe le yo mongwe yo a fetago go ona o tla letša molodi ka go kgotsa; o tla šišinya hlogo ya gagwe.”"

⁴Go madimabe motse wo o rabelago, wo o itšhilafatšago e bile e le o gatelelago badudi ba wona!"

⁵Wona ga se wa theetša lentšu; ga se wa amogela tayo. Ga se wa bota Jehofa. Ga se wa batamela Modimo wa wona."

⁶Dikgošana tša wona e be e le ditau tše di rorago. Baahlodi ba wona e be e le diphiri tša bošego tše di sa šadišetšego la gosasa selo."

⁷Baporofeta ba wona ba be ba ikgogomoša e bile e le baradia. Baperisita ba wona ba be ba goboša se sekgethwa; ba kgopamiša molao."

⁸Jehofa o be a o loketše; a sa o dire bošula. Mesong e mengwe le e mengwe o be a fela a tsebatša melao ya gagwe. O be a sa fetše go dira bjalo mesong. Ge e le yo a sa lokago yena, o be a sa hlabje ke dihlong."

⁹“Ke fedišitše ditšhaba; ditora tša tšona tša dikhutlong tša phušolwa. Ka senya ditsela tša tšona gore go se be le yo a sepelago go tšona. Metse ya tšona ya dirwa mašope, gwa se be le modudi le ge e le moagi."

¹⁰Ka re go tšona: ‘Ruri le tla mpoifa; le tla amogela tayo’; e le gore metse ya tšona e se ke ya senywa, ka ge ke tla di sekišetša tše ka moka. Ruri di ile tša fišegela go dira tše mpe."

¹¹“‘Ka gona dulang le ntetile,’ o re’alo Jehofa, ‘go be go fihle letšatši le ke tlogo thopa ka lona, ka ge morero wa ka e le go kgoboketša ditšhaba le go bokanya mebušo, gore ke tšhollele bogale bja ka le kgalefo ya ka ka moka godimo ga tšona; ka gobane ke tla latswa lefase ka moka ka mollo wa bogale bja ka."

¹²Mehleng yeo ke tla nea merafo leleme le le sekilego, e le gore ka moka e bitše leina la Jehofa gomme e mo direle ka botee.’"

¹³“Barapedi ba ka bao ba tšwago seleteng sa dinoka tša Ethiopia, e lego batho ba ka bao ba gašaganego, ba tla ntlišetša mpho."

¹⁴Mohlang woo le ka se lewe ke dihlong ka baka la dilo ka moka tšeo le ntshenyeditšego ka tšona, ka ge mohlang woo ke tla fediša baikgogomoši bao ba ikgantšhago gare ga lena; le ka se sa hlwa le ikgantšha thabeng ya ka e kgethwa."

¹⁵Gare ga lena ke tla šadiša baikokobetši le ba boleta gomme ba tla bota leina la Jehofa."

¹⁶Ge e le mašaledi a Isiraele, a ka se dire seo se sa lokago le ge e le go bolela maaka, e bile melomong ya ona go ka se be le bofora, gobane a tla ja a ba a robala ka go iketla gomme gwa se be le yo a a tšhošago.”"

¹⁷Hlalala, wena morwedi wa Tsione! Hlaba mekgolokwane, wena Isiraele! Thaba gomme o hlalale ka pelo ka moka, wena morwedi wa Jerusalema!"

¹⁸Jehofa o tlošitše dikahlolo tša gagwe go wena. O gomišitše lenaba la gago. Jehofa, kgoši ya Isiraele o na le wena. O ka se hlwe o boifa bošula."