Keep Not Silence

¹Ingoma. Umhobe ka-Asafu. Thixo, musa ukuthi cwaka, Musa ukuthi tu, musa ukuzola, Thixo."

²Ngokuba nanzo iintshaba zakho zixokozela; Abakuthiyayo baphakamisa intloko."

³Bagqugula igqugula elinobuqhophololo ngabantu bakho, Bacebisane ngabagushiweyo nguwe."

⁴Bathi, Yizani sibethe bee shwaka, bangabi luhlanga, Lingabi sakhunjulwa igama likaSirayeli."

⁵Ngokuba bacebisana ngantliziyo-nye, Benza umnqophiso ngawe:"

⁶Iintente zakwaEdom nezakwaIshmayeli, AmaMowabhi namaHagari,"

⁷AmaGebhali nama-Amon nama-Amaleki, AmaFilisti kunye nabemi baseTire;"

⁸Nama-Asiriya athelele kubo, Baba yingalo koonyana bakaLote. (Phakamisani.)"

⁹Yenza kubo njengoko wenza ngako kumaMidiyan, NakuSisera, nakuYabhin esihlanjeni seKishon."

¹⁰Batshabalala e-Endore, Baba ngumgquba wokugalelwa emhlabeni."

¹¹Benze bona, amanene abo ke, babe njengo-Orebhe nanjengoZebhe; Zonke iinkosi zabo zibe njengoZebha nanjengoTsalimuna;"

¹²Bona bathi, Masiwahluthe abe ngawethu amakhaya kaThixo."

¹³Thixo wam, benze babe njengesaqhwithi, Njengomququ phambi komoya."

¹⁴Njengomlilo odla ihlathi, Njengedangatye lilenya intaba,"

¹⁵Yenjenjalo ukubasukela ngoqhwithela lwakho, Ubakhwankqise ngomoya wakho ovuthuzayo."

¹⁶Buzalise ubuso babo ngehlazo, Balifune igama lakho, Yehova."

¹⁷Mabadane bakhwankqiswe ngonaphakade, Babe neentloni, badake;"

¹⁸Bazi ukuba wena, ugama linguYehova, unguwe wedwa Osenyangweni phezu kwehlabathi lonke."