Awake, O LORD

¹Kumongameli: eyoonyana bakaKora: eyokuqiqa. Thixo, sivile ngeendlebe zethu, oobawo basibalisela, Ngomsebenzi owawenza ngemihla yabo, ngemihla yamandulo:"

²Okokuba isandla sakho sagqogqa iintlanga, sabatyala bona; Saviva izizwe, sabanabisa bona."

³Ngokuba abalihluthanga ilizwe ngekrele labo, Abazisindisanga ngengalo yabo; Sisandla sakho sokunene, nengalo yakho, nokukhanya kobuso bakho; Ngokuba wawunesisa kubo."

⁴Wena unguKumkani wam, Thixo; Yitsho lubekho usindiso kuYakobi."

⁵Ngawe sobangqula abasibandezelayo; Egameni lakho sobagqusha abasukela phezulu kuthi."

⁶Ngokuba andikholose ngasaphetha sam; Andisindiswa ngakrele lam."

⁷Hayi! Nguwe osisindisayo kwabasibandezelayo, Ubadanise abasithiyileyo."

⁸NgoThixo sidumisa imihla yonke, Sibulele kwigama lakho ngonaphakade. (Phakamisani.)"

⁹Noko ke usihlambile, usihlazile, Akwaphuma nemikhosi yethu."

¹⁰Usibuyise umva phambi kombandezeli; Abasithiyileyo basiphangile okwabo."

¹¹Wasinikela njengeegusha ezidliwayo; Wasichitha-chitha ezintlangeni;"

¹²Wathengisa ngabantu bakho, akwazuza, Akwalinyusa ixabiso labo."

¹³Wasenza isingcikivo kubamelwane bethu, Isigculelo nesicukucezo kwabasijikelezileyo."

¹⁴Wasenza umzekelo ezintlangeni, Abokuhlunguzelelwa intloko ezizweni."

¹⁵Yonke imihla ihlazo lam liphambi kwam, Nokudana kobuso bam kundigubungele,"

¹⁶Ngenxa yezwi lomngcikivi nomnyelisi, Ngenxa yokukhangela kotshaba nomphindezeli."

¹⁷Oko konke kusifikele, asikulibalanga wena, Asixokanga emnqophisweni wakho;"

¹⁸Ayibuyanga umva intliziyo yethu, Ukunyathela kwethu akuthanga gu bucala emendweni wakho;"

¹⁹Ukuba usityumze endaweni yeempungutye, Usigubungele ngethunzi lokufa."

²⁰Ukuba besililibele igama loThixo wethu, Sazolulela kuthixo wasemzini izandla zethu,"

²¹Ubengayi kuyigoca-goca na uThixo loo nto, Ngokuba ezazi iindawo ezifihlakeleyo zentliziyo?"

²²Hayi, Ngenxa yakho sibulawa imihla yonke; Kuthiwa siziigusha zokuxhelwa."

²³Vuka, ulaleleni na, Nkosi yam? Qabuka, ungasihlambi kuphele."

²⁴Ubusitheliselani na ubuso bakho, Ukulibale ukucinezelwa kwethu, nokuxinwa kwethu?"

²⁵Ngokuba usibekeke eluthulini umphefumlo wethu, Sanamathela emhlabeni isisu sethu."

²⁶Khawusuk’ ume usincede, Usikhulule ngenxa yenceba yakho."