A Penitent's Prayer

¹Umhobe kaDavide: eyokukhumbuza. Yehova, musa ukundohlwaya unoburhalarhume, Ungandithethisi unobushushu:"

²Ngokuba iintolo zakho zitshone kum, Sehla kanzima kum isandla sakho."

³Akukho ndawo iphilileyo enyameni yam, ngenxa yokubhavuma kwakho; Akukho kuphila emathanjeni am, ngenxa yezono zam."

⁴Ngokuba ubugwenxa bam bugqithile entlokweni yam, Bundisinda njengomthwalo onzima."

⁵Iyanuka, iyabhiqiza imivumbo yam, Ngenxa yokumatha kwam."

⁶Ndiyapenapena, ndisibekeke kakhulu; Yonke imini ndihamba-hamba ngezimnyama zokuzila."

⁷Ngokuba kuyatshisa emihlubulweni yam, Akukho ndawo iphilileyo enyameni yam."

⁸Ndiqobekile, ndityumkile kakhulu; Ndibhongiswa kukugcuma kwentliziyo yam."

⁹Nkosi yam, uphambi kwakho wonke umnqweno wam, Nokuncwina kwam akusithele kuwe."

¹⁰Iphaphu lam liyabetha, ndiphelelwe ngamandla; Ukukhanya kwamehlo am, nako oko, akukho kum."

¹¹Abandithandayo nowethu bamele mgama ekubethweni kwam, Nezalamane zam zimi kude."

¹²Bandithiyele abafuna umphefumlo wam; Abangxamele ukuba ndihlelwe bububi bathetha izinto zokweyelisela, Bacamanga inkohliso imini yonke."

¹³Ke mna ndinjengesithulu, andiva; Njengesidenge esingawuvuliyo umlomo waso."

¹⁴Ndinjengomntu ongeva nto, Omlomo ungenakuthethisa."

¹⁵Ngokuba ndilindele kuwe, Yehova; Kuya kuphendula wena, Nkosi yam, Thixo wam,"

¹⁶Ngokuba ndithi, Hleze bandivuyelele Bona abo bangazikhulisayo kum ekutyibilikeni konyawo lwam."

¹⁷Ngokuba ndihlalele ukujingxela, Umvandedwa wam uphambi kwam amaxesha onke."

¹⁸Ngokuba ndiya kubuxela ubugwenxa bam; Ndinesithukuthezi ngenxa yesono sam."

¹⁹Ke zona iintshaba zam ziphilile, ziziimfidi; Baninzi abandithiyileyo bexoka;"

²⁰Abandibuyekeza ngobubi esikhundleni sokulungileyo Bayandichasa, ngenxa yokuphuthuma kwam okulungileyo."

²¹Musa ukundishiya, Yehova; Thixo wam, musa ukuba kude nam."

²²Khawuleza undincede, Nkosi yam, Msindisi wam."