My God, Why Hast Thou Forsaken Me?

¹Kumongameli: ngeyelexhama lesifingo. Umhobe kaDavide. Thixo wam, Thixo wam, undilahleleni na? Ukude ngani na ekusindisweni kwam, nasemazwini okubonga kwam?"

²Thixo wam, ndiyabiza emini, ungaphenduli; Nasebusuku ndiyabiza, andithozanyiswa noko."

³Ungcwele ke wena, Ungulohlala ezindumisweni zakwaSirayeli."

⁴Oobawo bakholosa ngawe, Bakholosa, wabasiza;"

⁵Bakhala kuwe, basinda; Bakholosa ngawe, abadana."

⁶Ke mna ndingumbungu, andimntu; Ndisisingcikivo soluntu, into edelekileyo ebantwini."

⁷Bonke abandibonayo bayandigculela; Bayasineka, bahlunguzela intloko;"

⁸Bathi, Makazilahlele kuYehova, amsize, Amhlangule kaloku, ngokuba emthandile."

⁹Ewe, nguwe umtyhobozisi wam esizalweni, Inkolosisi yam ndisemabeleni kama."

¹⁰Ndalahlelwa kuwe kwasesizalweni; Kwasembilinini kama ubunguThixo wam."

¹¹Musa ukuba kude nam, ngokuba isondele imbandezelo, Ngokuba akukho mncedi."

¹²Ndingqongwe ziinkunzi ezininzi, Ndihlanganyelwe zeziziimbalasane zaseBhashan."

¹³Zindakhamele umlomo wazo, Njengengonyama eqwengayo, egqumayo."

¹⁴Ndiphalele njengamanzi, Ahlukene onke amathambo am; Yanjengomthwebeba intliziyo yam, Inyibilikile phakathi kwezibilini zam."

¹⁵Omile njengegophe amandla am, Ulwimi lwam lunamathele ekhuhlangubeni lam; Undibeka eluthulini lokufa."

¹⁶Ngokuba izinja zindirhawule, Ibandla labenzi bokubi lindingungele; Bagqobhoza izandla zam neenyawo zam."

¹⁷Ndinokuwabala onke amathambo am; Bona bayandijonga, bayandibonela,"

¹⁸Babelana ngeengubo zam, Isambatho sam basenzela amaqashiso."

¹⁹Ke wena, Yehova, musa ukuba kude; Mandla am, khawuleza undincede."

²⁰Wuhlangule ekreleni umphefumlo wam, Okuphela kwawo, ethupheni lenja."

²¹Ndisindise emlonyeni wengonyama, Nasezimpondweni zenqu uya kundiphendula."

²²Ndiya kulazisa igama lakho kubazalwana bam, Ndikudumise phakathi kwebandla, ndithi,"

²³Nina nimoyikayo uYehova, mdumiseni; Nonke, mbewu kaYakobi, mzukiseni, Nimhlonele nina, mbewu yonke kaSirayeli."

²⁴Kuba azidelekanga, azibanga nazothe kuye iintsizi zolusizana; Akabusithelisanga ubuso bakhe kuye; Ekuzibikeni kwakhe kuye waphulaphula."

²⁵Ivela kuwe indumiso yam ebandleni elikhulu; Nezibhambathiso zam ndiya kuzizalisa phambi kwabamoyikayo."

²⁶Baya kudla abalulamileyo, bahluthe; Baya kudumisa uYehova abamngxamelayo. Ngamana yaphila intliziyo yenu ngonaphakade!"

²⁷Ziya kukhumbula zibuyele kuYehova zonke iziphelo zehlabathi, Iqubude phambi kwakhe yonke imizalwane yeentlanga:"

²⁸Ngokuba bobukaYehova ubukumkani, Nguye umlawuli ezintlangeni."

²⁹Baya kudla, baqubude, bonke abatyebileyo behlabathi; Baya kuguqa phambi kwakhe bonke abatshona eluthulini, Abangawugciniyo umphefumlo wabo."

³⁰Imbewu iya kumkhonza; Kuya kubaliselwa isizukulwana ngayo iNkosi."

³¹Baya kuza baxele ubulungisa bayo Kubantu abaza kuzalwa, ukuba oko ukwenzile."