Song of Deliverance

¹Kumongameli. Eyomkhonzi kaYehova. EkaDavide, owawathethayo kuYehova amazwi ale ngoma, mhlenikweni uYehova wamhlangulayo esandleni seentshaba zakhe zonke nasesandleni sikaSawule; wathi: Ndikuthanda ngembilini yam, Yehova, lomelelo lwam."

²Yehova, ngxondorha yam, mboniselo yam, msindisi wam, Thixo wam, liwa lam endizimela ngalo, Ngweletshetshe yam, luphondo losindiso lwam, ngxonde yam!"

³Ndinqula uYehova ongowokudunyiswa, Ndiyasindiswa ezintshabeni zam."

⁴Izintya zokufa zandijikela; Imilambo yobutshijolo yandidandathekisa."

⁵Izintya zelabafileyo zandibhijela; Izirhintyelo zokufa zabetha kum."

⁶Ekubandezelekeni kwam ndanqula uYehova, Ndazibika kuThixo wam; Waliva etempileni yakhe izwi lam, Ukuzibika kwam kwafika phambi kwakhe ezindlebeni zakhe."

⁷Lahexa ke lanyikima ihlabathi, Iziseko zeentaba zagungqa, Zahexa, ngokuba enomsindo."

⁸Kwathi thaphu umsi emathatheni akhe, Wadla umlilo, uphuma emlonyeni wakhe, Kwavutha amalahle ephuma kuwo."

⁹Wawathoba amazulu, wehla, Yangamafu amnyama phantsi kweenyawo zakhe."

¹⁰Wakhwela ekerubhini, waphaphazela, Wee tshwebelele ngamaphiko omoya."

¹¹Wamisa ubumnyama baba lisithe lakhe, umnquba wakhe ngeenxa zonke kuye; Ubumnyama bamanzi, iingqimba zamafu."

¹²Ekukhanyeni okuphambi kwakhe, kwatyhoboza emafini akhe Isiphango samatye, namalahle omlilo."

¹³Wadudumisa ezulwini uYehova, Ophezu konke walikhupha ilizwi lakhe. Yasisiphango samatye namalahle omlilo."

¹⁴Wathuma iintolo zakhe, wabaphangalalisa; Yamininzi imibane, wabadubaduba."

¹⁵Imiphantsi yamanzi yabonakala, Kwatyhileka iziseko zelimiweyo Ngokukhalima kwakho, Yehova, Ngokufutha komoya womsindo wakho."

¹⁶Wolula isandla ephezulu, wandibamba, Wandirhola emanzini amaninzi."

¹⁷Wandihlangula elutshabeni lwam olunamandla, Kwabandithiyileyo, ngokuba bebomelele kunam."

¹⁸Bandifikela ngemini yokusindeka kwam, UYehova wandixhasa."

¹⁹Wandikhuphela endaweni ebanzi, Wandihlangula, ngokuba endithandile."

²⁰UYehova wandiphatha kakuhle ngokobulungisa bam, Wandibuyisela ngokobunyulu bezandla zam."

²¹Ngokuba ndizigcina iindlela zikaYehova, Andemka ngokungendawo kuThixo wam."

²²Ngokuba onke amasiko akhe aphambi kwam, Nemimiselo yakhe andiyisusi kum;"

²³Ndaye ndingogqibeleleyo kuye, Ndazigcina, andaba nabugwenxa,"

²⁴Wandibuyisela ke uYehova ngokobulungisa bam, Ngokobunyulu bezandla zam phambi kwamehlo akhe."

²⁵Kowenceba uzenza owenceba, Kwigorha eligqibeleleyo uzenza ogqibeleleyo;"

²⁶Kozenze nyulu uzenza onyulu, Kojibilizayo uzenza onobuqhokolo."

²⁷Ngokuba wena uyabasindisa abantu ababandezelekileyo, Uwathobe amehlo aqwayingileyo."

²⁸Ngokuba uyasilumeka isibane sam wena; UYehova uThixo wam uyabukhanyisela ubumnyama bam."

²⁹Ngokuba ngawe ndigila amajarha, NgoThixo wam ndiqabela ezindongeni."

³⁰UThixo yena, igqibelele indlela yakhe; Ilizwi likaYehova linyibilikisiwe, Uyingweletshetshe kubo bonke abazimela ngaye."

³¹Ngokuba ngubani na onguThixo, ingenguye uYehova? Ngubani na oliliwa, ingenguThixo wethu?"

³²UloThixo undibhinqise ubukroti, Uyigqibelelisileyo indlela yam;"

³³Uzifanisayo iinyawo zam nezamaxhamakazi, Undimisayo emimangweni yam:"

³⁴Uzifundisayo ukulwa izandla zam, Zityede isaphetha sobhedu iingalo zam."

³⁵Undinikileyo ingweletshetshe yosindiso lwakho: Sandixhasa isandla sakho sokunene; Ululamo lwakho lwandikhulisa."

³⁶Wawenzela indawo ebanzi amanyathela am phantsi kwam, Amaxhwele am akahexa."

³⁷Ndazisukela iintshaba zam, ndazifumana; Andabuya zada zaphela."

³⁸Ndaziqoba; azaba nakuvuka, Zawa phantsi kweenyawo zam."

³⁹Wandibhinqisa ubukroti ekulweni, Wabaguqisa phantsi kwam abasukela phezulu kum;"

⁴⁰Wandinika ikhosi leentshaba zam, Abandithiyayo ndababhangisa."

⁴¹Bazibika, akwabakho msindisi; Bazibika kuYehova, akabaphendula."

⁴²Ndabacola, banjengothuli phambi komoya, Ndabaphalaza njengodaka lwezitrato."

⁴³Wandisiza ekubambaneni kwabantu, Wandimisa ndayintloko yeentlanga; Abantu ebe ndingabazi bandikhonza."

⁴⁴Besave ngeendlebe, bandithobela, Oonyana bolunye uhlanga bahanahanisa kum;"

⁴⁵Oonyana bolunye uhlanga bantshwenya, Baphuma bengcangcazela ekuvingcelweni kwabo."

⁴⁶UYehova uhleli; lelokubongwa iliwa lam, Aphakanyiswe uThixo ondisindisayo."

⁴⁷UloThixo wandinika impindezelo, Uzikhandaniselayo izizwe phantsi kwam;"

⁴⁸Undisiza ezintshabeni zam; Ewe, wena undiphakamisayo kwabasukela phezulu kum, Undihlangule kumfo ogonyamelayo."

⁴⁹Ngenxa yoko ndiya kubulela kuwe, Yehova, phakathi kweentlanga, Ndivume kwigama lakho."

⁵⁰Ulokhulisa iintsindiso zokumkani wakhe: Wenzayo inceba kumthanjiswa wakhe, KuDavide, nakwimbewu yakhe kude kuse ephakadeni."