Song of Deliverance

¹Ka gobane wena o tla phološa bahlaki; Eupša mahlo a ikgogomošago o tla a kokobetša."

²Gobane wena o tla gotetša lebone la ka, wena Jehofa; Modimo wa ka yena o tla ediša leswiswi la ka."

³Ka thušo ya gago ke tla kitimiša bahlasedi; Ka thušo ya Modimo wa ka nka kgona go namela morako."

⁴Ge e le Modimo wa therešo yena, tsela ya gagwe e phethagetše; Polelo ya Jehofa ke yeo e sekilego. Yena ke kotse go bohle bao ba tšhabelago go yena."

⁵Modimo yo mongwe ke mang ka ntle le Jehofa? Le gona ke mang e lego leswika ge e se Modimo wa rena?"

⁶Modimo wa therešo ke yena a ntlhamago ka matla, O tla nthulela tsela,"

⁷O nea maoto a ka lebelo go etša a dikgama tše ditshadi, E bile o dira gore ke dule ke eme mafelong a mphagametšego."

⁸O ruta diatla tša ka ntwa, Matsogo a ka a kobile bora bja koporo."

⁹Wena o tla nnea kotse ya gago ya phološo, Seatla sa gago sa le letona se tla nthekga, Boikokobetšo bja gago bo tla nkgodiša."

¹⁰O tla mpulela sebaka se segolo gore dikgato tša ka di lekane mo ke gatago gona, Gomme nka se thinyege dikokoilaneng tša ka."

¹¹Ke tla hlomarela manaba a ka gomme ka a swara; Nka se boe go ba go fihlela a fedišwa."

¹²Ke tla a rathaganya e le gore a se ke a kgona go ema; Ke tla a gata ka dinao tša ka."

¹³O tla ntlhamela ntwa ka go nnea matla; O tla dira gore bao ba ntsogelago matla ba wele ka tlase ga ka."

¹⁴Ge e le manaba a ka ona o tla dira gore a tšhabe; Ge e le bao ba ntlhoilego o šoro ke tla ba fediša."

¹⁵Ba llela thušo, eupša ga go na mophološi, Ba llela Jehofa, eupša ga a ba arabe."

¹⁶Ke tla ba šilaganya gore ba etše lerole le le tšewago ke phefo; Ke tla ba tšholla go etša leraga la mekgotheng."

¹⁷O tla ntlhakodiša go swaiweng diphošo ke batho. O tla mpea hlogo ya ditšhaba. Ke tla hlankelwa ke batho bao ke bego ke sa ba tsebe."

¹⁸Ba tla ikokobeletša nna ba ekwa feela ka mabarebare; Bašele ba tla tla go nna ba phophotha."

¹⁹Bašele bona ba tla pona, Ba tla tšwa dibong tša bona ba thothomela."

²⁰Jehofa o a phela, gomme anke go retwe Leswika la ka, Anke go phagamišwe Modimo yo a mphološago."

²¹Modimo wa therešo ke Molefeletši wa ka; O kokobeletša merafo ka tlase ga ka."

²²O ntlhakodiša manabeng a ka a galefilego; O tla mphagamišetša ka godimo ga bao ba ntsogelago matla, O tla ntlhakodiša mothong yo šoro."

²³Ke ka baka leo ke tlago go go reta gare ga ditšhaba, wena Jehofa, Ka opelela leina la gago."

²⁴Kgoši ya gagwe yeo a e beilego o e direla ditiro tše dikgolo tša phološo Le go bontšha motlotšwa wa gagwe botho, A bo bontšha Dafida le peu ya gagwe go iša mehleng ya neng le neng."

²⁵Magodimo a bolela ka letago la Modimo; Gomme mediro ya diatla tša gagwe e tsebatšwa ke sebakabaka."

²⁶Letšatši le lengwe le le lengwe le bakela gore go be le seo se bolelwago,Bošego bjo bongwe le bjo bongwe bo bonagatša tsebo."

²⁷Ga go kwale polelo, ga di ntšhe mantšu; Ga go na modumo wa lentšu wo o kwalago go tšona."

²⁸Eupša molaetša wa tšona o ile lefaseng ka moka, Gomme dipolelo tša tšona di ile pheletšong ya lefase. Go tšona Modimo o beile tente ya letšatši,"

²⁹Letšatši le swana le monyadi ge a etšwa ka phapošing ya gagwe; Le hlalala go etša mogale ge a kitima tseleng ya gagwe."

³⁰Le tloga pheletšong e nngwe ya magodimo go ya go e nngwe, Le dikologa go tloga pheletšong e nngwe go ya go e nngwe ya ona; Ga go seo se ka ikutelago phišo ya lona."

³¹Molao wa Jehofa o phethagetše, o tsošološa moya. Kgopotšo ya Jehofa e a botega, e dira gore yo a se nago temogo a be bohlale."

³²Ditayo tše di tšwago go Jehofa di lokile, di thabiša pelo; Taelo ya Jehofa e hlwekile, e phadimiša mahlo."

³³Go boifa Jehofa go sekile, go ema ka mo go sa felego. Dikahlolo tša Jehofa di a rereša; di lokile ka mo go feletšego."

³⁴Di kganyogega go feta gauta, ee, go feta gauta e ntši yeo e sekišitšwego; Di bose go feta dinose le todi yeo e elelago ya mamapo."

³⁵Le gona mohlanka wa gago di mo lemošitše; Go di lota go na le moputso o mogolo."

³⁶Ke mang yo a ka lemogago diphošo tša gagwe? O se mpalele dibe tšeo ke sa lemogego gore ke di dirile."

³⁷Le gona thibela mohlanka wa gago go dira ditiro tša go ikgodiša; O se di dumelele gore di mpuše. Ge go le bjalo ke tla be ke feletše, Gomme ke tla be ke dutše ke se na molato dikarogong tše dintši."

³⁸Anke dipolelo tša molomo wa ka le tšeo pelo ya ka e di naganišišago E be tše di kgahlišago pele ga gago, wena Jehofa Leswika la ka le Molopolodi wa ka."

³⁹Anke Jehofa a go arabe mohlang wa tlalelo. Anke leina la Modimo wa Jakobo le go šireletše."

⁴⁰Anke a romele thušo ya gago go tšwa lefelong le lekgethwa, A go thekge go tšwa Tsione ka boyona."

⁴¹Anke a gopole dibego tša gago ka moka tša dimpho, Le gona anke sebego sa gago sa go fišwa a se lebelele e le se nonnego."

⁴²Anke a go nee kganyogo ya pelo ya gago, Anke a phethe tšohle tšeo o di rerago."

⁴³Re tla goelela ka lethabo ka baka la phološo ya gago, Gomme re tla emiša difoka tša rena ka leina la Modimo wa rena. Anke Jehofa a phethagatše dikgopelo tša gago ka moka."

⁴⁴Bjale ke a tseba gore Jehofa o phološa motlotšwa wa gagwe. O mo araba a le magodimong a gagwe a makgethwa Ka mediro ya gagwe e matla ya go phološa ya seatla sa gagwe sa le letona."

⁴⁵Ba bangwe ba bolela ka dikoloi tša bona mola ba bangwe ba bolela ka dipere tša bona, Eupša ge e le rena, re tla bolela ka leina la Jehofa Modimo wa rena."

⁴⁶Bona bao ba robegile gomme ba wa; Eupša ge e le rena, re eme, gore re tsošološwe."

⁴⁷Anke o phološe kgoši, hle Jehofa! Wena o tla re araba mohlang re go bitša."

⁴⁸Wena Jehofa, kgoši e thabela matla a gago; E thabišwa kudu gakaakang ke go phološwa ke wena!"

⁴⁹O e neile kganyogo ya pelo ya yona, Gomme ga se wa e tima seo molomo wa yona o se dumago."

⁵⁰Gobane o e gahlaneditše ka ditšhegofatšo tše dibotse, Hlogong ya yona wa e rweša mphapahlogo wa gauta e sekišitšwego."