The Word of God

¹Ntire gore ke kwešiše tsela ya ditaelo tša gago, E le gore ke tshwenyege ka ditiro tša gago tše di kgahlišago."

²Manyami a be a sa robatše moya wa ka. Ntsoše go ya ka lentšu la gago."

³Le tsela e mpe o e tloše go nna, O be o nkgaugele ka molao wa gago."

⁴Ke kgethile tsela ya potego. Ke lemogile gore dikahlolo tša gago ke tše di swanetšego."

⁵Ke kgomaretše dikgopotšo tša gago. O se ntlhabiše dihlong, hle Jehofa."

⁶Ke tla kitima tseleng ya ditaelo tša gago, Ka gobane o di bulela sekgoba pelong ya ka gore ke di kwešiše."

⁷Nthute gore ke sepele tseleng ya ditaelo tša gago hle Jehofa, Gore ke e latele go fihla mafelelong."

⁸Ntire gore ke kwešiše, e le gore ke boloke molao wa gago Le gore ke o lote ka pelo ka moka."

⁹Ntshepediše tseleng ya ditaelo tša gago, Gobane e a nkgahla."

¹⁰Dira gore pelo ya ka e rate dikgopotšo tša gago, E sego go boelwa."

¹¹Tlogediša mahlo a ka go bona se se hlokago mohola; Ntshepediše tseleng ya gago e le gore ke phele."

¹²Phethela mohlanka wa gago polelo ya gago Yeo e dirago gore a go boife."

¹³Tloša kgobošo yeo e nkwetšego, yona yeo ke bego ke e boifa, Gobane dikahlolo tša gago ke tša maleba."

¹⁴Bona kamoo ke hlologetšego ditaelo tša gago. Dira gore ke phele ka go dumelelana le toko ya gago."

¹⁵Hle Jehofa, anke botho bja gago Le phološo ya gago di ntlele go ya kamoo o boletšego ka gona,"

¹⁶E le gore ke arabe yo a nkgobošago ka lentšu, Gobane ke botile lentšu la gago."

¹⁷O se tloše lentšu la therešo molomong wa ka, Gobane ke letile dikahlolo tša gago."

¹⁸Ke tla dula ke lota molao wa gago Go iša mehleng ya neng le neng, gaešita le ka mo go sa felego."

¹⁹Ke tla itshepelela lefelong le le bolokegilego, Gobane ke tsomile ditaelo tša gago."

²⁰Ke tla ba ka bolela ka dikgopotšo tša gago pele ga dikgoši, Nka se hlabje ke dihlong."

²¹Ke tla rata ditaelo tša gago Tšeo ke di ratilego."

²²Ke tla go rapela ke emišitše diatla ka baka la ditaelo tša gago tšeo ke di ratilego, Gomme ke tla tshwenyega ka melao ya gago."

²³Gopola lentšu leo o le boditšego nna mohlanka wa gago, Leo o dirilego gore ke le letele."

²⁴Se se nkhomotša mohlakong wa ka, Gobane polelo ya gago e mphedišitše."

²⁵Baikgodiši ba nkwerile ka mo go feteletšego. Ga se ka fapoga molaong wa gago."

²⁶Ke gopotše dikahlolo tša gago go tloga mehleng ya neng le neng, hle Jehofa, Gomme ke a homotšega."

²⁷Ke befetšwe o šoro ka baka la ba kgopo Bao ba tlogelago molao wa gago."

²⁸Ditaelo tša gago di fetogile dikoša go nna Ntlong yeo ke diiletšego go yona."

²⁹Bošego ke gopotše leina la gago, wena Jehofa, E le gore ke lote molao wa gago."

³⁰Tše di ntiragaletše Gobane ke latetše ditaelo tša gago."

³¹Jehofa ke kabelo ya ka; Ke holofeditše go lota mantšu a gago."

³²Ke phophothile go wena ka pelo ya ka ka moka. Nkgaugele go ya ka seo o se boletšego."

³³Ke šeditše ditsela tša ka, Gore ke bušetše dinao tša ka dikgopotšong tša gago."

³⁴Ke ile ka itlhaganela gomme ka se diege Go lota ditaelo tša gago."

³⁵Dithapo tša ba kgopo tšona di ntateditše. Ga se ka lebala molao wa gago."

³⁶Ke tsoga bošegogare gore ke go leboge Ka baka la dikahlolo tša gago tše di lokilego."

³⁷Ke dirišana le bohle bao ba go boifago, Gotee le bao ba lotago ditaelo tša gago."

³⁸Wena Jehofa, botho bja gago bo tletše lefase. Nthute ditaelo tša gago."

³⁹Wena Jehofa, o dirišane gabotse le nna mohlanka wa gago Go ya ka lentšu la gago."

⁴⁰Nthute go loka, go ba le tlhaologanyo le tsebo, Gobane ke dumetše ditaelo tša gago."

⁴¹Ke go diretše sebe ka phošo gomme ke a hlaka, Eupša ga bjale ke lotile seo o se boletšego."

⁴²O yo botse gomme o dira tše botse. Nthute ditaelo tša gago."

⁴³Baikgodiši ba mpharile ka maaka. Ge e le nna ke tla latela ditaelo tša gago ka pelo ya ka ka moka."

⁴⁴Dipelo tša bona di retetše go etša lekhura. Ge e le nna ke ratile molao wa gago."

⁴⁵Ke mo gobotse ge ke tlaišegile, E le gore ke ithute ditaelo tša gago."

⁴⁶Molao wa molomo wa gago o ntoketše, O ntoketše go feta ditšhelete tše dikete tša gauta le tša silifera."

⁴⁷Ke dirilwe ke diatla tša gago, gomme tša ntiiša. Dira gore ke kwešiše, gore ke ithute ditaelo tša gago."

⁴⁸Bao ba go boifago ke bona bao e rego ge ba mpona ba thaba, Gobane ke letile lentšu la gago."

⁴⁹Wena Jehofa, ke tseba gabotse gore dikahlolo tša gago di lokile, Le gore o ntaile ka ge o botega."

⁵⁰Hle anke botho bja gago bo nkhomotše Go ya kamoo o boletšego ka gona le mohlanka wa gago."

⁵¹Anke dikgaugelo tša gago di ntlele, gore ke dule ke phela; Gobane ke rata molao wa gago."

⁵²Anke baikgodiši ba hlabje ke dihlong, gobane ba ntimeditše ntle le lebaka. Ge e le nna ke tshwenyegile ka ditaelo tša gago."

⁵³Anke bao ba go boifago ba boele go nna, E lego bona bao e bilego ba tsebago dikgopotšo tša gago."

⁵⁴Anke pelo ya ka e latele ditaelo tša gago ka go hloka bosodi, E le gore ke se hlabje ke dihlong."

⁵⁵Moya wa ka o feditšwe matla ke go leta phološo ya gago; Ke letile lentšu la gago."

⁵⁶Mahlo a ka a hlologetše polelo ya gago, Ge ke re: “O tla nkhomotša neng?”"

⁵⁷Gobane ke etša lekuka ka gare ga muši. Ga se ka lebala ditaelo tša gago."

⁵⁸Mohlanka wa gago o tla leta go fihla neng? O tla ahlola neng bao ba ntlaišago?"

⁵⁹Baikgodiši ba nkepetše mereo gore ba ntanye, E lego bona bao ba sa dumelelanego le molao wa gago."

⁶⁰Ditaelo tša gago ka moka di a botega. Ba ntlaišitše ntle le lebaka. Nthuše hle."

⁶¹Go be go šetše ganyenyane gore ba mphediše lefaseng; Eupša ge e le nna ga se ka tlogela ditaelo tša gago."

⁶²Dira gore ke phele go ya ka botho bja gago, E le gore ke boloke kgopotšo e tšwago molomong wa gago."

⁶³Wena Jehofa, lentšu la gago le eme magodimong Go iša mehleng ya neng le neng."

⁶⁴Potego ya gago ke ya go iša melokong le melokong. O theile lefase wa le tiiša gore le dule le le gona."

⁶⁵Di dutše di le gona go ba go fihla lehono ka go dumelelana le ditaelo tša gago, Gobane ka moka ga tšona ke bahlanka ba gago."

⁶⁶Ge nkabe ke be ke sa rate molao wa gago, Gona nkabe ke fedišitšwe ke mohlako wa ka."

⁶⁷Nka se tsoge ke lebetše ditaelo tša gago go iša mehleng ya neng le neng, Gobane ke ka tšona ge o dirile gore ke dule ke phela."

⁶⁸Ke nna wa gago. Hle mphološe, Gobane ke tsomile ditaelo tša gago."

⁶⁹Ba kgopo ba be ba ntaletše gore ba tle ba mpolaye. Nna ke dula ke ela hloko dikgopotšo tša gago."

⁷⁰Ke bone go na le seo se hlaelago go tšohle tšeo di phethagetšego. Eupša taelo ya gago e nabile kudu."

⁷¹Molao wa gago ke o rata gakaakang! Ke nagana ka wona letšatši ka moka."

⁷²Taelo ya gago e ntlhalefiša go feta manaba a ka, Gobane ke tla e latela go iša mehleng ya neng le neng."

⁷³Ke na le temogo e ntši go feta bohle bao ba nthutago, Gobane ke tshwenyega ka dikgopotšo tša gago."

⁷⁴Ke dira dilo ka kwešišo go feta banna ba bagolo, Gobane ke latetše ditaelo tša gago."

⁷⁵Ke thibetše dinao tša ka go sepela tseleng e nngwe le e nngwe e mpe, E le gore ke lote lentšu la gago."

⁷⁶Ga se ka aroga dikahlolong tša gago, Gobane ke wena o nthutilego."

⁷⁷Dipolelo tša gago di boreledi gakaakang magalagapeng a ka, Di tloga di le boreledi go feta dinose molomong wa ka!"

⁷⁸Ke dira dilo ka kwešišo ka baka la ditaelo tša gago. Ke ka baka leo ke hloilego tsela e nngwe le e nngwe ya maaka."

⁷⁹Lentšu la gago ke lebone dinaong tša ka, E bile ke seetša tseleng ya ka."

⁸⁰Ke dirile keno ya gore ke lote dikahlolo tša gago, Gomme ke tla e phetha."

⁸¹Ke hlakile kudu. Dira gore ke phele go ya ka lentšu la gago, hle Jehofa."

⁸²Anke o thabele dibego tša boithaopo tše di tšwago molomong wa ka, hle Jehofa, O be o nthute dikahlolo tša gago."

⁸³Bophelo bja ka bo dula bo le kotsing; Eupša ga se ka lebala molao wa gago."

⁸⁴Ba kgopo ba ntheetše moreo, Eupša ga se ka fapoga ditaelong tša gago."

⁸⁵Dikgopotšo tša gago ke di tšere e le leruo go iša mehleng ya neng le neng, Ka gobane di dira gore pelo ya ka e hlalale."

⁸⁶Pelong ya ka ke ikemišeditše go latela ditaelo tša gago Go iša mehleng ya neng le neng, go fihla mafelelong."

⁸⁷Ke hloile ba pelopedi, Eupša ke ratile molao wa gago."

⁸⁸O bokhuto bja ka le kotse ya ka. Ke letile lentšu la gago."

⁸⁹Tlogang go nna, lena badirabobe, E le gore ke latele ditaelo tša Modimo wa ka."

⁹⁰Nthekge ka go dumelelana le seo o se boletšego, gore ke dule ke phela, Le gona o se ke wa ntlhabiša dihlong ka baka la kholofelo ya ka."

⁹¹Nthekge, gore ke phološwe, Ke tla dula ke tsepeletše ditaelo tša gago."

⁹²O lahlile bohle bao ba fapogago ditaelong tša gago; Gobane boradia bja bona ke maaka."

⁹³Ba kgopo ka moka ba lefase o ba fedišitše bjalo ka manyedi. Ka gona ke ratile dikgopotšo tša gago."

⁹⁴Dinama tša ka di a šia ka gobane o a ntšhoša; Le gona ke tšhošitšwe ke dikahlolo tša gago."

⁹⁵Ke ahlotše ka go loka gomme ka dira toko. Hle anke o se nkgafele go bao ba nthadiago!"

⁹⁶Ntire kamoo nna mohlanka wa gago ke tla kgonthišegago gore ke tla holega. Anke baikgodiši ba se nthadie."

⁹⁷Mahlo a ka a hlologetše phološo ya gago Le polelo ya gago e lokilego."

⁹⁸Nna mohlanka wa gago, ntire ka go dumelelana le botho bja gago, O nthute ditaelo tša gago."

⁹⁹Ke nna mohlanka wa gago. Ntire gore ke kwešiše, E le gore ke tsebe dikgopotšo tša gago."

¹⁰⁰Ke nako ya gore wena Jehofa o gate mogato. Ba robile molao wa gago."

¹⁰¹Ke ka baka leo ke ratilego ditaelo tša gago Go feta gauta, ke re gaešita le gauta e sekišitšwego."

¹⁰²Ke ka baka leo ke tšeago ditaelo tša gago ka moka tše di lego mabapi le dilo ka moka e le tše di nepagetšego; Ke hloile tsela e nngwe le e nngwe ya maaka."

¹⁰³Dikgopotšo tša gago di a kgahliša. Ke ka baka leo moya wa ka o di latetšego."

¹⁰⁴Go utollwa ga mantšu a gago go nea seetša, Go dira gore bao ba se nago temogo ba kwešiše."

¹⁰⁵Ke a fegelwa, Gobane ke hlologetše ditaelo tša gago."

¹⁰⁶Retologela go nna gomme o nkgaugele, Go ya ka kahlolo ya gago yeo ka yona o ahlolago bao ba ratago leina la gago."

¹⁰⁷Tsepamišetša dikgato tša ka dipolelong tša gago, Le gona anke ke se laolwe ke selo se se gobatšago sa mohuta le ge e le ofe."

¹⁰⁸Ntopolle go moradia le ge e le ofe wa batho, Gomme ke tla lota ditaelo tša gago."

¹⁰⁹Edišetša nna mohlanka wa gago sefahlego sa gago, Gomme o nthute ditaelo tša gago."

¹¹⁰Megokgo e theogile mahlong a ka go etša melapo ya meetse Ka gobane ga se ba lota molao wa gago."

¹¹¹Wena Jehofa o lokile, Le dikahlolo tša gago ke tša maleba."

¹¹²Ka go loka ga gago le potego e makatšago O re laetše gore re lote dikgopotšo tša gago."

¹¹³Ke jelwe ke phišego ya ka, Ka gobane manaba a ka a lebetše mantšu a gago."

¹¹⁴Dipolelo tša gago di sekile kudu, Gomme nna mohlanka wa gago ke a di rata."

¹¹⁵Ke tšewa ke se selo e bile ke nyatšega. Ditaelo tša gago ga se ka di lebala."

¹¹⁶Toko ya gago ke toko go iša mehleng ya neng le neng, Gomme molao wa gago ke therešo."

¹¹⁷Ke wetšwe ke tlalelo le mathata. Ditaelo tša gago ke di ratile."

¹¹⁸Go loka ga dikgopotšo tša gago ke ga go iša mehleng ya neng le neng. Ntire gore ke kwešiše, gore ke dule ke phela."

¹¹⁹Ke go biditše ka pelo ya ka ka moka. Nkarabe hle Jehofa. Ditaelo tša gago ke tla di latela."

¹²⁰Ke go biditše. Mphološe hle! Ke tla lota dikgopotšo tša gago."

¹²¹Ke tsogile ka mahube gore ke llele thušo. Ke letile mantšu a gago."

¹²²Ke be ke butše mahlo dinakong tša bošego tša go hlapetša, E le gore ke naganišiše ka dipolelo tša gago."

¹²³Anke o kwe lentšu la ka ka go dumelelana le botho bja gago. Dira gore ke dule ke phela ka go dumelelana le dikahlolo tša gago, hle Jehofa."

¹²⁴Ke batametšwe ke bao ba phegelelago boitshwaro bjo bo hlephilego gore ba nkgobatše; Ba šuthetše kgole le molao wa gago."

¹²⁵Wena Jehofa o kgauswi, Gomme ditaelo tša gago ka moka ke therešo."

¹²⁶Ke tsebile tše dingwe tša dikgopotšo tša gago kgalekgale, Gobane o di theile gore di be gona go iša mehleng ya neng le neng."

¹²⁷Hle bona mohlako wa ka gomme o ntlhakodiše; Gobane ga se ka lebala molao wa gago."

¹²⁸Anke o nkemelele tshekong gomme o ntopolle; Dira gore ke phele ka go dumelelana le dipolelo tša gago."

¹²⁹Phološo e kgole le ba kgopo, Ka gobane ga se ba tsoma ditaelo tša gago."

¹³⁰Wena Jehofa, dikgaugelo tša gago ke tše dintši. Hle anke o dire gore ke phele ka go dumelelana le dikahlolo tša gago."

¹³¹Batlaiši ba ka le baganetši ba ka ke ba bantši. Ga se ka aroga dikgopotšong tša gago."

¹³²Ke bone bao ba dirago tša boradia, E bile ke kwa ke ba hloile, ka gobane ga se ba lota seo o se boletšego."

¹³³Anke o bone kamoo ke ratago ditaelo tša gago ka gona. Dira gore ke phele ka go dumelelana le botho bja gago, hle Jehofa."

¹³⁴Moko wa lentšu la gago ke therešo, Kahlolo e nngwe le e nngwe ya gago ya go loka ke ya go iša mehleng ya neng le neng."

¹³⁵Dikgošana tšona di ntlaišitše ntle le lebaka, Eupša pelo ya ka e be e dutše e boifa mantšu a gago."

¹³⁶Ke hlalalela seo o se boletšego Go etša ge motho a hlalala ge a hweditše dithebola tše dintši."

¹³⁷Ke hloile maaka, e bile ke a a hlaswa. Ke ratile molao wa gago."

¹³⁸Ke go tumišitše gašupa ka letšatši Ka baka la dikahlolo tša gago tša go loka."

¹³⁹Bao ba ratago molao wa gago ba atetšwe ke khutšo, Ga ba na tšhitišo."

¹⁴⁰Wena Jehofa, ke holofetše go phološwa ke wena, Ke latetše ditaelo tša gago."

¹⁴¹Moya wa ka o lotile dikgopotšo tša gago, Ke di rata ka go fetišiša."

¹⁴²Ke lotile ditaelo tša gago le dikgopotšo tša gago, Gobane ditsela tša ka ka moka di pele ga gago."

¹⁴³Anke sello sa ka sa ge ke go lopa se fihle pele ga gago, hle Jehofa. Ntire gore ke kwešiše ka go dumelelana le lentšu la gago."

¹⁴⁴Anke kgopelo ya ka ya go kgopela kgaugelo e fihle pele ga gago. Hle ntlhakodiše ka go dumelelana le seo o se boletšego."

¹⁴⁵Anke melomo ya ka e phophome tumišo, Gobane o nthuta ditaelo tša gago."

¹⁴⁶Anke leleme la ka le opele tšeo o di boletšego, Gobane ditaelo tša gago ka moka di lokile."

¹⁴⁷Anke seatla sa gago se nthuše, Gobane ke kgethile ditaelo tša gago."

¹⁴⁸Wena Jehofa, ke hlologetše go phološwa ke wena, Ke rata molao wa gago."

¹⁴⁹Anke moya wa ka o dule o phela e bile o go tumiša, Anke dikahlolo tša gago di nthuše."

¹⁵⁰Ke ile ka ralala bjalo ka nku e timetšego. Hle ntsome nna mohlanka wa gago, Gobane ga se ka lebala ditaelo tša gago."

¹⁵¹Ke biditše Jehofa ke le tlalelong, Gomme yena a nkaraba."

¹⁵²Hle Jehofa, hlakodiša moya wa ka melomong ya maaka, Lelemeng le le forago."

¹⁵³Motho o tla go nea’ng, le gona motho o tla go okeletša ka’ng, Wena leleme le le forago?"

¹⁵⁴O tla go okeletša ka mesebe e louditšwego ya mogale, Gotee le magala a mehlopi."

¹⁵⁵Nna ke wa madimabe gobane ke dutše kua Mesheke ke le modiiledi! Ke agišane le ditente tša Kedara."

¹⁵⁶Ke nako e telele moya wa ka o dutše le Bao ba hloilego khutšo."

¹⁵⁷Ke emelela khutšo; eupša ge ke bolela, Bona ba nyaka ntwa."

¹⁵⁸Ke tla emišetša mahlo dithabeng. Thušo ya ka e tla tšwa kae?"

¹⁵⁹Thušo ya ka e tšwa go Jehofa, Yena Modiri wa legodimo le lefase."

¹⁶⁰A ka se dumelele gore lenao la gago le thekesele. Yo a go letago a ka se otsele."

¹⁶¹Bona! Yo a letago Isiraele A ka se otsele goba a robala."

¹⁶²Jehofa o a go leta. Jehofa ke moriti wa gago letsogong la gago la le letona."

¹⁶³O ka se welwe ke bošula mosegare Le ge e le bošego."

¹⁶⁴Jehofa yena o tla go leta gore o se welwe ke bošula le ge e le bofe. O tla leta moya wa gago."

¹⁶⁵Jehofa yena o tla go leta ge o etšwa le ge o tsena Go tloga ga bjale go ya pele le go iša mehleng ya neng le neng."

¹⁶⁶Ke ile ka thaba ge ba be ba re go nna: “A re yeng ntlong ya Jehofa.”"

¹⁶⁷Dinao tša rena di be di eme Dikgorong tša gago, wena Jerusalema."

¹⁶⁸Jerusalema ke yeo e agilwego go etša motse Wo o kgomaganego wo e lego selo setee,"

¹⁶⁹Woo meloko e rotogetšego go wona, Yona meloko ya Jah,E le go gopotša Isiraele Gore e leboge leina la Jehofa."

¹⁷⁰Gona moo ke mo go bego go na le didulo tša bogoši tša kahlolo, Didulo tša bogoši tša ntlo ya Dafida."

¹⁷¹Kgopelelang Jerusalema khutšo. Wena motse, bao ba go ratago ba ka se be le mathata."

¹⁷²Anke go dule go na le khutšo ka gare ga merako ya gago, Go se be le mathata ka gare ga dintlo tša gago tša dibo."

¹⁷³Ka baka la bana bešo le bagwera ba ka bjale ke tla bolela ka re: “Anke go be le khutšo ka gare ga gago.”"

¹⁷⁴Ke tla dula ke go kgopelela tše dibotse Ka baka la ntlo ya Jehofa Modimo wa rena."

¹⁷⁵Ke emišeditše mahlo a ka go wena, Wena yo a dulago magodimong."

¹⁷⁶Mahlo a rena a lebeletše Jehofa Modimo wa rena Go fihlela a re gaugela, Go etša ge mahlo a bahlanka a lebeletše seatla sa mong wa bona, Le go etša ge mahlo a mohlanka wa mosadi a lebeletše seatla sa mong wa gagwe wa mosadi."