A Prayer of the Afflicted

¹Umthandazo wolusizana xa atyhafileyo, ephalaza iinkalazo zakhe phambi koYehova. Yehova, wuve umthandazo wam, Kufike kuwe ukuzibika kwam."

²Musa ukubusithelisa ubuso bakho kum ngemini yokubandezelwa kwam, Ndithobele indlebe yakho; Ngemini endidanduluka ngayo khawuleza undiphendule."

³Ngokuba iyaphela imihla yam njengomsi; Amathambo am avutha njengeziko."

⁴Ibethwe yoma njengomfuno intliziyo yam, Ngokuba ndilibele nokudla ukudla kwam."

⁵Ngenxa yezwi lokugcuma kwam Amathambo am atshele enyameni yam."

⁶Ndifana nengcwangube yentlango, Ndinjengesikhova sasemanxoweni."

⁷Andilali; Ndinjengentaka eyodwa phezu kwendlu."

⁸Imini yonke ziyandingcikiva iintshaba zam, Abandigezelayo bathuka ngam."

⁹Ngokuba ndidle uthuthu njengesonka, Into endiyiselayo ndiyiphithikeze nezililo,"

¹⁰Ngenxa yokubhabhama kwakho noburhalarhume bakho; Ngokuba undifunqule wandilahla."

¹¹Imihla yam injengokoluka kwamathunzi; Mna ndomile njengomfuno."

¹²Ke wena, Yehova, uhleli ngonaphakade, Inkumbuzo yakho ikwizizukulwana ngezizukulwana."

¹³Uya kusuk’ ume, uyiphathe iZiyon ngemfesane; Ngokuba lixesha lokuyibabala eli, ngokuba lifikile ixesha elimisiweyo."

¹⁴Ngokuba abakhonzi bakho bakholiswe ngamatye ayo, Uthuli lwayo banofefe ngalo."

¹⁵Ziya kuloyika iintlanga igama likaYehova, Nookumkani bonke behlabathi ubuqaqawuli bakho;"

¹⁶Ngokuba eyakhile iZiyon uYehova, Wabonakala ebuqaqawulini bakhe."

¹⁷Uwubhekile umthandazo wabachushuluzayo, Akawudela umthandazo wabo."

¹⁸Oko kuya kubhalelwa isizukulwana esizayo, Abantu abaza kudalwa badumise uYehova."

¹⁹Ngokuba uqondele, esendaweni yakhe ephezulu engcwele; Wondela ehlabathini esemazulwini uYehova,"

²⁰Ukuba akuve ukugcuma kwabakhonkxiweyo, Abakhulule oonyana bokufa;"

²¹Bancokole eZiyon ngegama likaYehova, Ngendumiso yakhe eYerusalem;"

²²Ekubuthelaneni kwezizwe ndawonye, Nezikumkani, ukuba zikhonze uYehova."

²³Uwathobile endleleni amandla am, Uyinqamle imihla yam."

²⁴Ndithi, Thixo wam, musa ukundisusa phakathi kwemihla yam. Ikwizizukulwana ngezizukulwana iminyaka yakho."

²⁵Waliseka kudala ihlabathi; Lisisenzo sezandla zakho izulu."

²⁶Ezo zinto ziya kudaka, wena ke ume; Zona zonke ziya konakala njengengubo, Wozigugisa njengesambatho, ziguge;"

²⁷Ke wena uhleli unguwe, Iminyaka yakho ayinakuphela."

²⁸Oonyana babakhonzi bakho baya kuhlala, Imbewu yabo izimaseke phambi kwakho."