A Good Name

¹Ge e ba o se na seo o ka mo lefago ka sona, go re’ng a go tšeela malao a gago?"

²O se ke wa šuthiša mollwane wa kgalekgale wo borakgolokhukhu ba gago ba o beilego."

³Na o kile wa bona monna yo a kgonago mošomo wa gagwe? Yena o tla ema pele ga dikgoši; a ka se eme pele ga batho feela."

⁴Ge o ka dula le kgoši gore o je le yona, o ele hloko kudu tšeo di lego pele ga gago,"

⁵gomme o itshware ge e ba o le sejato."

⁶O se ke wa duma dijo tša yona tše di bose, ka ge e le dijo tša go go fora."

⁷O se ke wa itapišetša go hwetša mahumo. O se ke wa ithekga ka tlhaologanyo ya gago."

⁸Na o gašitše mahlo gore o bone ge e se selo? Ka gobane ruri lehumo le mela maphego a etšago a ntšhu, la fofela magodimong."

⁹O se ke wa ja dijo tša mang le mang yo a timanago goba wa duma dijo tša gagwe tše di bose."

¹⁰Ka gobane o swana le motho yo a go rerilego pelong ya gagwe. Yena o re go wena: “Eja o be o nwe,” eupša pelo ya gagwe e se gona go wena."

¹¹O tla hlatša nthathana yeo o e jelego gomme o tla be o senyegetšwe ke mantšu a gago a kgahlišago."

¹²O se ke wa bolela le setlaela, ka gobane se tla nyatša mantšu a gago a bohlale."

¹³O se ke wa šuthiša mollwane wa kgalekgale, gomme o se ke wa tsena ka tšhemong ya ditšhiwana."

¹⁴Ka gobane Molopolodi wa bona ke yo matla; yena o tla ba emelela go wena."

¹⁵Pelo ya gago a e eleletše tayo gomme tsebe ya gago e sekegele mantšu a bohlale."

¹⁶O se ke wa hlokiša mošemanyana tayo. Le ge o ka mo itia ka kgati, a ka se hwe."

¹⁷O mo itie ka kgati gore o hlakodiše moya wa gagwe Bodulabahu."

¹⁸Morwa wa ka, ge pelo ya gago e ka hlalefa, pelo ya ka le yona e tla thaba."

¹⁹Dipshio tša ka di tla hlalala ge molomo wa gago o bolela tša go loka."

²⁰Anke pelo ya gago e se hufegele badiradibe, eupša o dule o boifa Jehofa ka mehla."

²¹Ka go dira bjalo o tla ba le bokamoso bjo bobotse gomme o ka se felelwe ke kholofelo."

²²Wena morwa wa ka, ekwa o be o hlalefe gomme o hlahle pelo ya gago tseleng."

²³O se ke wa ba gare ga bao ba nwago beine kudu, gare ga bao ba jago nama ka bojato."

²⁴Ka gobane letagwa le sejagobe ba tla diila gomme go rata boroko go tla apeša motho mankgeretla."

²⁵Theetša tatago yo a go belegego, o se ke wa nyatša mmago ka ge a tšofetše."

²⁶Reka therešo, o se ke wa e rekiša; o reke le bohlale, tayo le tlhaologanyo."

²⁷Tatago moloki ruri o tla thaba; yo a belegago ngwana yo bohlale o tla mo thabela."

²⁸Tatago le mmago ba tla thaba gomme mmago yo a go belegego o tla thaba."

²⁹Morwa wa ka, nnee pelo ya gago, le gona anke mahlo a gago a kgahlwe ke ditsela tša ka."