Wise Words

¹Ozahlulayo ufuna umnqweno wakhe; Into yonke ezimasayo uyayivungamela."

²Isinyabi asikunanzile ukuqonda; Ke sinanze ukuzityhila kwentliziyo yaso."

³Ekuzeni kongendawo kuza ukudela, Ukungcikiva, nokucukuceza."

⁴Ngamanzi anzulu amazwi omlomo wendoda, Ngumlanjana obalekayo, lithende lobulumko."

⁵Ukukhetha ubuso bongendawo akulungile; Nokugqwetha ilungisa ekuthetheni ityala."

⁶Imilebe yomlomo wesinyabi ingena ekubambaneni, Nomlomo waso ubiza amanqindi."

⁷Umlomo wesinyabi uyasitshabalalisa, Nemilebe yomlomo waso sisirhintyelo somphefumlo waso."

⁸Amazwi entlebi yimithamo emnandi; Yona ihla iye ezingontsini zombilini."

⁹Nohilizayo eshishinini lakhe Ngumninawa kaSokonakalisa."

¹⁰Yinqaba ende eliqele igama likaYehova; Ilungisa ligidimela kulo, libe sengxondeni."

¹¹Ubuncwane besityebi sisixeko saso esiliqele; Bunjengodonga oluphakamileyo emabhongweni aso."

¹²Phambi kwentshabalalo iyazidla intliziyo yendoda; Phambi kozuko lululamo."

¹³Ophendula ilizwi engekeva, Kukumatha oko kuye, nehlazo."

¹⁴Umoya wendoda uyasinyamezela isifo sayo; Ke umoya odakumbileyo, ngubani na ongawuthwalayo?"

¹⁵Intliziyo yonengqondo irhweba ukwazi; Nendlebe yezilumko ifuna ukwazi."

¹⁶Isipho somntu siyamgabulela, Simse phambi kwabakhulu."

¹⁷Unga ulilungisa oqalelayo etyaleni lakhe: Uza ummelwane wakhe, amgocagoce."

¹⁸Liphelisa ingxabano iqashiso, Libahlule abanamandla."

¹⁹Umzalwana ekukreqiweyo kuye ulukhuni ngaphezu kwesixeko esiliqele, Neengxabano zinjengomvalo woxande olude."

²⁰Ngesiqhamo somlomo wendoda uyahlutha umbilini wayo; Iyahlutha ngongeniselo lomlomo wayo."

²¹Ukufa nokuphila kusemandleni olwimi; Abaluthandayo baya kudla isiqhamo salo."

²²Othe wafumana umfazi, ufumene okulungileyo; Uzuze okulikholo kuYehova."

²³Ihlwempu lithetha ngezibongozo; Isityebi siphendula ngokulukhuni."

²⁴Indoda enezihlobo iyachithwa; Kukho sithandwa sinamathelayo kunomzalwana."