Wise Words

¹Bošilo bja motho ke bjona bo kgopamišago tsela ya gagwe, gomme ka go re’alo pelo ya gagwe ya galefela Jehofa."

²Lehumo le atiša bagwera, eupša mmotlana o lahlwa le ke mogwera wa gagwe."

³Hlatse ya maaka e ka se efoge kotlo, gomme yo a hlamago maaka a ka se phonyokge."

⁴Ba bantši ba kgopela go gaugelwa ke mokgomana, gomme motho yo mongwe le yo mongwe ke mogwera wa yoo a fago ba bangwe dimpho."

⁵Bana babo yo a diilago ba mo hloile ka moka ga bona. Bagwera ba gagwe bona ba mo katogile kudu. O ba šala morago a bolela le bona; bona ga ba na taba le yena."

⁶Yo a hwetšago pelo e bohlale o rata moya wa gagwe. Yo a lotago temogo o tla hwetša tše botse."

⁷Hlatse ya maaka e ka se efoge kotlo, yo a hlamago maaka o tla hwa."

⁸Matsaka ga a swanele mang le mang yo e lego setlaela. Mohlanka yena a ka se buše dikgošana."

⁹Temogo ya motho e fokotša bogale bja gagwe gomme go botse ge a sa latišiše molato."

¹⁰Pefelo ya kgoši e etša go rora ga tawana ya mariri, eupša go amogelwa ke yona go etša phoka e welago dimeleng."

¹¹Morwa wa setlaela o hlakiša tatagwe, dikgang tša mosadi tšona di etša tlhaka e dutlago yeo e ntšhago motho ka ntlong."

¹²Ntlo le lehumo ke bohwa bjo bo tšwago go botate, eupša mosadi wa temogo o tšwa go Jehofa."

¹³Bobodu bo robatša motho boroko bjo bogolo, gomme motho yo a tšwafago o bolawa ke tlala."

¹⁴Yo a lotago taelo o lota moya wa gagwe; yo a nyatšago ditsela tša gagwe o tla bolawa."

¹⁵Yo a šetšago mmotlana o adima Jehofa gomme Modimo o tla mmušetša."

¹⁶Otla morwa wa gago go sa na le kholofelo; o se ke wa mo kganyogela lehu."

¹⁷Yo a befelwago kudu o tla lefa molato. Ge o ka mo hlakodiša, o tla dulela go mo hlakodiša gantši."

¹⁸Theetša keletšo gomme o amogele tayo, gore o tle o hlalefe ka moso."

¹⁹Pelong ya motho go na le maano a mantši, eupša morero wa Jehofa o tla ema o tiile."

²⁰Selo seo se rategago mothong ke botho bja gagwe; modiidi o phala motho wa maaka."

²¹Go boifa Jehofa go iša bophelong, gomme motho o tla lala a iketlile; a ka se tlelwe ke tše mpe."

²²Sebodu se tsentše seatla sa sona moruswing; ga se kgone go se bušetša molomong wa sona."

²³O otle mokweri gore yo a se nago temogo a hlalefe; yo a nago le tlhaologanyo a kgalemelwe gore a hwetše tsebo."

²⁴Yo a hlakišago tatagwe gomme a raka mmagwe ke morwa yo a dirago tša dihlong le tše di hlomphollago."