A Soft Answer

¹Impendulo ethambileyo ibuyisa ubushushu; Ilizwi elidubulayo linyusa umsindo."

²Ulwimi lwezilumko lulungisa ukwazi; Umlomo wezinyabi umpompoza ukumatha."

³Asezindaweni zonke amehlo kaYehova, Ebonisela abanobubi nabalungileyo."

⁴Ukuphola kolwimi ngumthi wobomi; Ke ukuphenula kwalo kwaphula umoya."

⁵Isimathane sigiba uqeqesho lukayise; Osigcinileyo isohlwayo uba nobuqili."

⁶Indlu yelungisa nguvimba omkhulu; Ke ngongeniselo longendawo kukho ukuhlisa ishwangusha."

⁷Umlomo wezilumko uhlwayela ukwazi: Ke yona intliziyo yezinyabi ayindawo."

⁸Umbingelelo wabangendawo lisikizi kuYehova; Umthandazo wabathe tye ngowona akholwa nguwo."

⁹Ilisikizi kuYehova indlela yongendawo; Ke ophuthuma ubulungisa uyathandwa nguye."

¹⁰Uqeqesho olubi lolowushiyayo umendo; Othiya isohlwayo uya kufa."

¹¹Elabafileyo nenzonzobila ziphambi koYehova; Zibeke phi na ke iintliziyo zoonyana babantu!"

¹²Umgxeki akakuthandi ukohlwaywa kwakhe, Akayi kwizilumko."

¹³Intliziyo evuyileyo iyabuchwayithisa ubuso; Ekubulalekeni kwentliziyo umoya uthi dakumba."

¹⁴Intliziyo enengqondo ifuna ukwazi; Umlomo wesinyabi usukelana nokumatha."

¹⁵Yonke imihla yosizana mibi; Intliziyo echwayithileyo inesidlo ngamaxesha onke."

¹⁶Ilungile intwana encinane kunye nokoyika uYehova, Ngaphezu kwendyebo eninzi kunye nokuxhalaba."

¹⁷Ulungile umxhesho womfuno kunye nothando, Ngaphezu kwenkomo etyetyisiweyo kunye nentiyo."

¹⁸Indoda enobushushu ixhaya ingxabano; Ezeka kade umsindo idambisa imbambano."

¹⁹Indlela yevila ngathi ibiyelwe ngemitholo; Ke umendo wabathe tye ubekelelwe."

²⁰Unyana olumkileyo uyamvuyisa uyise; Umntu osisinyabi udela unina."

²¹Ukumatha luvuyo koswele intliziyo; Ke indoda enengqondo ithi tye ukuhamba."

²²Iingcinga ziyatshitsha ngokungabikho kokucweya; Ke zona zima ngamaphakathi amaninzi."

²³Indoda inovuyo ngempendulo yomlomo wayo; Ilizwi elithethwe ngexa elililo, azi lihle!"

²⁴Koqiqayo umendo wobomi usinga phezulu, Ukuze emke kwelabafileyo elingaphantsi."

²⁵UYehova uyayincothula indlu yabanekratshi, Amise umlimandlela womhlolokazi."

²⁶Zingamasikizi kuYehova iingcinga ezimbi; Ke ahlambulukile amazwi amnandi."

²⁷Uyihlisela ishwangusha indlu yakhe obawela inzuzo embi; Ke yena othiya isicengo, uya kuphila."

²⁸Intliziyo yelungisa iya kucamanga ukuphendula; Ke wona umlomo wabangendawo umpompoza ububi."

²⁹UYehova ukude nabangendawo; Ke wona umthandazo wamalungisa uyawuva."

³⁰Ukukhanya kwamehlo kuvuyisa intliziyo; Iindaba ezimnandi zityebisa amathambo."

³¹Indlebe esivayo isohlwayo sobomi Ihlala phakathi kwezilumko."

³²Ophulukene noqeqesho ucekisa umphefumlo wakhe; Osivayo isohlwayo urhweba ukuqonda."

³³Ukoyika uYehova luqeqesho lobulumko; Ngaphambi kozuko lululamo."