The Brazen Serpent

¹Ge ba dutše ba sepela go tloga Thabeng ya Horo ka tsela ya Lewatle le Lehwibidu, ba etla naga ya Edomo ka thoko, setšhaba se ile sa lapišwa ke tsela."

²Setšhaba sa bolela gampe ka Modimo le Moshe sa re: “Le re’ng le re rotošitše la re ntšha nageng ya Egipita go tlo hwela mo lešokeng? Gobane mo ga go na dijo le meetse e bile meoya ya rena e hlaswa senkgwa se seo se nyatšegago.”"

³Ka gona Jehofa a romela dinoga tšeo di nago le mpholo bathong, tša ba loma gomme batho ba bantši ba Isiraele ba hwa."

⁴Mafelelong setšhaba sa tla go Moshe sa re: “Re dirile sebe, ka gobane re boletše gampe ka wena le ka Jehofa. Lopa Jehofa gore a tloše dinoga tše mo go rena.” Moshe a lopela setšhaba."

⁵Ke moka Jehofa a re go Moshe: “Itirele noga ya mpholo gomme o e fege koteng. E tla re ge motho le ge e le ofe a lomilwe ke noga, a e lebelele gomme a phele.”"

⁶Gateetee Moshe a dira noga ya koporo a e fega koteng; e be e re ge motho a lomilwe ke noga gomme a lebelela noga yeo ya koporo, o be a phela."

⁷Ka morago ga moo bana ba Isiraele ba tloga ba yo hloma mešaša Obothe."

⁸Ba tloga Obothe ba hloma mešaša Iye-abarimi, lešokeng leo le lebanego le Moaba, ka thoko ya bohlabatšatši."

⁹Ge ba tloga moo ba hloma mešaša kgauswi le moedi wa mafula wa Tsereda."

¹⁰Ba tloga moo ba hloma mešaša seleteng sa Arinoni, seo se lego lešokeng leo le thomago mollwaneng wa Baamore; gobane Arinoni ke mollwane wa Moaba. E magareng ga Moaba le Baamore."

¹¹Ke ka baka leo pukung ya Dintwa ya Jehofa go thwego: “Fahebe yeo e lego Sufa le meedi ya mafula ya Arinoni,"

¹²le molomong wa meedi ya mafula woo o inametšego moo go lego motse wa Ari gomme wa ithekga ka mollwane wa Moaba.”"

¹³Go tloga moo ba ya Beera. Se ke sediba seo Jehofa a boletšego le Moshe ka sona a re: “Kgoboketša setšhaba ke se nee meetse.”"

¹⁴Ka yona nako yeo Baisiraele ba opela koša ye: “Runya, wena sediba! Lena se opeleleng!"

¹⁵Wena sediba seo se epilwego ke dikgošana, sa epša ke bakgomana, Ka molamo wa mmuši, le ka melamo ya bona.” Ke moka ge ba tloga lešokeng ba ya Matana."

¹⁶Go tloga Matana ba ya Nahaliele gomme go tloga Nahaliele ba ya Bamothe."

¹⁷Go tloga Bamothe ba ya moeding wo o lego nageng ya Moaba, ntlheng ya Pisiga. Ntlha yeo e okametše ka pele ga Jeshimone."

¹⁸Baisiraele ba roma baromiwa go Sihoni kgoši ya Baamore, ba re:"

¹⁹“Re kgopela go phatša mo nageng ya gago. Re ka se phatše tšhemong goba serapeng sa merara, le gona re ka se nwe meetse a sediba le ge e le sefe. Re tla sepela tseleng ya kgoši go fihlela re phatšitše seleteng sa gago.”"

²⁰Sihoni ga a ka a dumelela Baisiraele go phatša seleteng sa gagwe, eupša o ile a kgoboketša batho ba gagwe ka moka a ya a gahlanetša Baisiraele lešokeng, ke moka a fihla Jahatsa a lwa le bona."

²¹Baisiraele ba mmolaya ka bogale bja tšhoša gomme ba tšea naga ya gagwe go tloga ka Arinoni go fihla ka Jaboko, kgauswi le bana ba Amoni, ya ba ya bona; ka gobane Jatsera ke mollwane wa bana ba Amoni."

²²Baisiraele ba tšea metse yeo ka moka, ba dula metseng ka moka ya Baamore kua Heshibone le metse ya yona ka moka yeo e e dikologilego."

²³Heshibone e be e le motse wa kgoši Sihoni. E be e le kgoši ya Baamore, e bile ke yena a kilego a lwa le kgoši ya Moaba a e amoga naga ya yona ka moka seatleng sa yona go fihla ka Arinoni."

²⁴Ke ka baka leo bakweri ba bego ba fela ba re: “Etlang Heshibone. A motse wa Sihoni o agwe gomme o tie."

²⁵Mollo o tšwile Heshibone, kgabo ya tšwa motseng wa Sihoni. O fišitše Ari ya Moaba, wa fiša beng ba mafelo a phagamego a Arinoni."

²⁶O wa madimabe wena Moaba! Le tlo fedišwa, lena Bakemoshi! Yena o tla dira barwa ba gagwe gore e be bafaladi gomme barwedi ba gagwe a ba dira mathopša a Sihoni kgoši ya Baamore."

²⁷Ka gona a re ba betšeng ka mesebe. Heshibone e tla fedišwa go fihla ka Diboni, Basadi ba fedišwa go fihla ka Nofa gomme banna bona go fihla ka Medeba.”"

²⁸Baisiraele ba dula nageng ya Baamore."

²⁹Ke moka Moshe a roma ba bangwe go yo hlola Jatsera. Ka gona ba thopa metse ya yona yeo e e dikologilego gomme ba e amoga Baamore bao ba bego ba le moo."

³⁰Ka morago ga moo ba goma ba rotoga ka tsela e yago Bashani. Ka gona Ogo kgoši ya Bashani a tšwa a yo gahlana le bona a na le batho ba gagwe ka moka, ntweng ya Edirei."

³¹Bjale Jehofa a re go Moshe: “O se ke wa mmoifa gobane ke tla mo gafela seatleng sa gago, yena, batho ba gagwe ka moka le naga ya gagwe; o mo dire tšeo o di dirilego Sihoni kgoši ya Baamore, yoo a bego a dula Heshibone.”"

³²Ka gona ba mmolaya, ba bolaya bana ba gagwe gotee le batho ba gagwe ka moka go fihlela go se le mophologi le o tee bathong ba gagwe yo a šetšego; ba tšea naga ya gagwe."

³³Bana ba Isiraele ba tloga ke moka ba hloma mešaša leganateng la Moaba ka mošola wa Noka ya Jorodane go lebana le Jeriko."

³⁴Balaka morwa wa Tsiporo a bona tšohle tšeo Baisiraele ba di dirilego Baamore."

³⁵Moaba ya tšhošwa kudu ke setšhaba seo ka gobane e be e le se segolo; Moaba ya boifa bana ba Isiraele kudu."