The Twelve Spies

¹Maina a bona šea: Molokong wa Rubeni e be e le Shamua morwa wa Sakuri;"

²molokong wa Simeone e be e le Shafata morwa wa Hori;"

³molokong wa Juda e be e le Kalebe morwa wa Jefune;"

⁴molokong wa Isakara e be e le Igala morwa wa Josefa;"

⁵molokong wa Efuraime e be e le Hoshea morwa wa Nuni;"

⁶molokong wa Benjamini e be e le Palati morwa wa Rafu;"

⁷molokong wa Sebulone e be e le Gadiele morwa wa Sodi;"

⁸molokong wa Josefa go ba moloko wa Manase e be e le Gaddi morwa wa Susi;"

⁹molokong wa Dani e be e le Amiele morwa wa Gemali;"

¹⁰molokong wa Ashere e be e le Sethuri morwa wa Mikaele;"

¹¹molokong wa Nafutali e be e le Nahabi morwa wa Bofisi;"

¹²molokong wa Gada e be e le Guwele morwa wa Maki."

¹³Ao ke maina a banna bao Moshe a ilego a ba roma go yo hlola naga. Moshe a reela Hoshea morwa wa Nuni leina a re ke Joshua."

¹⁴Ge Moshe a be a ba roma go yo hlola naga ya Kanana, o ile a re go bona: “Rotogang mo le ye Negebe, le rotogele dithabeng."

¹⁵Le bone gore naga yeo e bjang gotee le batho bao ba dulago go yona, le bone ge e ba ba le matla goba ba fokola, ge e ba e le ba sego kae goba e le ba bantši;"

¹⁶le bone gore naga yeo ba dulago go yona e bjang, le bone ge e ba e le e botse goba e mpe, le gore metse yeo ba dulago go yona e bjang, le bone ge e ba e le mešaša goba e le ya dibo;"

¹⁷le gore naga yeo e nonne goba ga e tšweletše dienywa, gore e na le dihlare goba ga di gona. Le beng sebete gomme le tle le tše dingwe tša dienywa tša naga yeo.” Sehla seo e be e le sa diterebe tša dithakangwaga."

¹⁸Ka gona ba rotoga ba yo hlola naga go tloga ka lešoka la Tsini go fihla Rehobo, yeo e lego thoko tša ge o tsena Hamathi."

¹⁹Ge ba rotogela Negebe, ba fihla Heburone. Gona moo go be go na le Ahimane, Sheshai le Talamai, e lego bana ba Anaki. Motse wa Heburone o agilwe nywaga e šupago pele ga ge go agwa motse wa Tsoane wa Egipita."

²⁰Ge ba fihla moeding wa mafula wa Eshikolo, ba ile ba rema lekala leo le nago le lešihla letee la diterebe. Banna ba babedi ba le rwala ka kota, ba ba ba tla le digarenate le mago."

²¹Lefelo leo la reelwa leina gwa thwe ke moedi wa mafula wa Eshikolo, ka baka la lešihla leo bana ba Isiraele ba le remilego moo."

²²Mafelelong ge matšatši a masomenne a fedile ba ile ba boa ba etšwa go hlola naga."

²³Ba sepela ba tla go Moshe le Arone le setšhaba ka moka sa bana ba Isiraele lešokeng la Parane, kua Kadeshe. Ba ba begela gotee le setšhaba ka moka kamoo ba sepetšego ka gona gomme ba ba bontšha le dienywa tša naga yeo."

²⁴Ba begela Moshe ba re: “Re tsene nageng yeo o re romilego go yona gomme ruri e ela maswi le dinose. Tše ke dienywa tša yona."

²⁵Eupša therešo ke gore batho bao ba dulago nageng yeo ke ba matla e bile metse ya bona e šireleditšwego ke e megolo kudu; le gona re bone bana ba Anaki moo."

²⁶Baamaleke ba dula nageng ya Negebe gomme Bahethe, Bajebusi le Baamore ba dula dithabeng. Bakanana ba dula kgauswi le lewatle go bapa le Noka ya Jorodane.”"

²⁷Ke moka Kalebe a leka go homotša setšhaba gore se theetše Moshe, a re: “A re rotogeng ka go lebanya, gomme re tlo tšea naga yeo, ka gobane re ka e fenya.”"

²⁸Eupša banna bao a bego a rotogile le bona ba re: “Re ka se kgone go lwa le ditšhaba tšeo ka gobane ke tše matla go re feta.”"

²⁹Ba begela bana ba Isiraele pego e mpe ka naga yeo ba bego ba etšwa go e hlola, ba re: “Naga yeo re phatšitšego go yona go e hlola, ke naga yeo e jago badudi ba yona ka moka ya ba fetša; le gona batho ka moka bao re ba bonego gare ga yona ke batho ba botelele bjo bo sa tlwaelegago."

³⁰Gona moo re bone Banefilimi, e lego bana ba Anaki, bona bao ba tšwago go Banefilimi; re ile ge re ba bona ra ipona re le bjalo ka ditšie, le bona ge ba re bona ba bona re le bjalo ka ditšie.”"

³¹Ke moka setšhaba ka moka sa hlaboša mantšu a sona, batho ba hlaba mokgoši ba lala ba lla bošegong bjoo ka moka."

³²Bana ba Isiraele ka moka ba ngongoregela Moshe le Arone gomme setšhaba ka moka sa bolela ka bona gampe sa re: “A mola nkabe re ile ra ikhwela nageng ya Egipita goba ra ikhwela mo lešokeng le!"

³³Go re’ng Jehofa a re tliša nageng ye gore re tlo bolawa ka tšhoša? Basadi ba rena le bana ba rena ba tlo thopša. Na ga go kaone gore re boele Egipita?”"