Reading of the Law

¹Wa hwetša pelo ya gagwe e go botegela; wa dira kgwerano le yena ya gore o tla mo nea naga ya Bakanana, Bahethe, Baamore, Baperetse, Bajebusi le Bagirigashe le gore o tla e nea peu ya gagwe; wa phethagatša seo o se boletšego ka gobane o lokile."

²“O bone mohlako wa borakgolokhukhu ba rena kua Egipita wa ba wa kwa le sello sa bona kua Lewatleng le Lehwibidu."

³Ke moka wa bontšha Farao le bahlanka ba gagwe gotee le batho ba naga ya gagwe dipontšho le mehlolo ka gobane o tsebile gore ba ile ba ikgogomošetša bona; wena wa itirela leina go etša ge go sa le bjalo letšatšing le."

⁴O ile wa aroganya lewatle ka bogare gomme bona ba tshelela ka mošola ba sepela mo go omilego gare ga lewatle; barakediši ba bona wa ba lahlela tlasetlase go etša leswika leo le lahlelwago ka meetseng a matla."

⁵Mosegare o ile wa ba eta pele ka thololo ya leru gomme bošego wa ba eta pele ka thololo ya mollo gore o ba bonegele mo ba sepelago gona."

⁶Wa theogela Thabeng ya Sinai wa bolela le bona o le legodimong, wa ba nea dikahlolo, melao ya therešo le ditaelo tše dibotse."

⁷O ba tsebišitše sabatha ya gago e kgethwa, wa ba nea ditaelo le melao ka Moshe mohlanka wa gago."

⁸O ba neile dijo tšeo di tšwago legodimong ge ba be ba swerwe ke tlala gomme wa ba nea meetse ao a tšwago leswikeng ge ba be ba nyorilwe, wa re ba tsene le go dula nageng yeo o ennego gore o tla ba nea yona."

⁹“Borakgolokhukhu ba rena ba ile ba ikgogomoša, ba thatafatša dihlogo tša bona gomme ba se theetše ditaelo tša gago."

¹⁰Ba ile ba gana go theetša, ba lebala ditiro tša gago tše di makatšago tše o ba diretšego tšona, ba thatafatša dihlogo tša bona ba ikgethela moetapele gore ba boele bokgobeng bja bona kua Egipita. Eupša wena o Modimo yo a lebalelago, yo a šokelago, yo a gaugelago, yo a diegago go galefa le yo a tletšego botho, le gona ga se wa ba lahla."

¹¹Ge ba šetše ba itiretše modimo wa seswantšho wa namane ba re: ‘Yo ke Modimo wa lena yo a le etilego pele a le ntšha Egipita,’ ba dira ditiro tše dikgolo tša go se go hlomphe,"

¹²eupša wena ka baka la kgaugelo ya gago e kgolo wa se ba tlogele kua lešokeng. Thololo ya leru ya go ba hlahla tseleng mosegare ga se ya ka ya tloga go bona, le thololo ya mollo ya bošego yeo e ba bonegelago tseleng yeo ba bego ba sepela go yona ga se ya tloga."

¹³O ba neile moya wa gago o mobotse gore ba be bohlale, wa se ba kone manna, wa ba wa ba nea le meetse gore ba timole lenyora."

¹⁴Wa ba fepa ka dijo kua lešokeng nywaga e masomenne. Ba se hloke selo. Diaparo tša bona tša se onale gomme dinao tša bona tša se ruruge."

¹⁵“Wa ba nea mebušo le ditšhaba gomme wa ba abela dinaga tša yona; ba tšea naga ya Sihoni le naga ya kgoši ya Heshibone le naga ya Ogo kgoši ya Bashani."

¹⁶Wa atiša bana ba bona ya ba ba bantši bjalo ka dinaledi tša magodimo. Wa ba tliša nageng yeo o e holofeditšego borakgolokhukhu ba bona gore ba tsene le go dula go yona."

¹⁷Bana ba bona ba ile ba tla ba tšea naga ba dula go yona gomme wena wa fenya badudi ba naga, e lego Bakanana, ke moka wa ba gafela diatleng tša bona, wa ba gafela le dikgoši tša bona le batho ba naga, gore ba dire seo ba se ratago ka bona."

¹⁸Ba thopa metse e šireleditšwego le mmu o nonnego, ba tšea le dintlo tšeo di tletšego ka dilo ka moka tše dibotse, didiba tšeo di epilwego, dirapa tša merara, dihlare tša mehlware le dihlare tše dintši tšeo di jewago, ba ja ba kgotsofala, ba nona ba ba ba thabela botho bja gago bjo bogolo."