Judgment on Samaria and Jerusalem

¹Lena le hloilego tše botse eupša le ratago tše mpe, le gagola batho letlalo le nama la di tloša marapong a bona;"

²le bile le ja nama ya batho ba ka, la ba bua matlalo, la pšhatlaganya marapo a bona gomme la a rathaganya bjalo ka seo se tsenywago ka pitšeng e ahlamego le bjalo ka nama yeo e lego ka pitšeng ya go apea."

³Nakong yeo ba tla goeletša Jehofa ba kgopela thušo, eupša a ka se ba arabe. Nakong yeo o tla ba utela sefahlego sa gagwe, ka ge ba dirile tše mpe."

⁴“Se ke seo Jehofa a se boletšego mabapi le baporofeta bao ba dirago gore batho ba ka ba ralale, bao ba lomago ka meno le bao ba goeletšago ka gore: ‘Khutšo!’ Le bao e rego ge motho a sa ba tsenye selo ka ganong, bona ba itokišetša go lwa le yena, a re:"

⁵‘Ka gona le tla tlelwa ke bošego, e le gore go se bonale; le tla ba leswiswing e le gore le se ke la dira tša bonoge. Le gona letšatši le tla sobelela baporofeta bao gomme mosegare wa ba swifalela."

⁶Baboni ba tlo hlabja ke dihlong gomme dinoge di tlo nyama. Ka moka ga bona ba tlo ikhupetša ditedu, ka gobane ga go na karabo e tšwago go Modimo.’”"

⁷Ka lehlakoreng le lengwe, nna ka tlala matla, toka le sebete ka baka la moya wa Jehofa, e le gore ke botše Jakobo ka bofetogedi bja gagwe gomme Isiraele ke mmotše sebe sa gagwe."

⁸Ekwang lena dihlogo tša ntlo ya Jakobo le lena balaodi ba ntlo ya Isiraele, lena bao le hlaswago toka le bao ba kgopamišago se sengwe le se sengwe se se lokilego;"

⁹lena bao le agago Tsione ka ditiro tša tšhollo ya madi gomme Jerusalema la e aga ka ditiro tša go se loke."

¹⁰Dihlogo tša gagwe di ahlolela go hwetša letsogo-le-kobong, baperisita ba gagwe ba rutela gore ba lefše gomme baporofeta ba gagwe ba dira tša bonoge gore ba hwetše tšhelete; eupša ba ithekga ka Jehofa ka go bolela gore: “Na Jehofa ga a gare ga rena? Re ka se welwe ke masetlapelo.”"

¹¹Ka gona, Tsione e tla lengwa bjalo ka tšhemo ka baka la lena, Jerusalema yona e tla fetoga mokgobo wa mašope gomme thaba ya ntlo ya Modimo e tla etša dithaba tše di tletšego dithokgwa."

¹²Mehleng ya bofelo thaba ya ntlo ya Jehofa e tla thewa ya tia e phagametše dithaba tše dingwe gomme e tla phagamela le meboto; meraforafo e tla kgeregela go yona."

¹³Ditšhaba di tlo ya go yona tša re: “Etlang re rotogeleng thabeng ya Jehofa le ntlong ya Modimo wa Jakobo; o tla re ruta ditsela tša gagwe gomme ra sepela mebileng ya gagwe.” Gobane molao o tlo tšwa Tsione gomme lentšu la Jehofa la tšwa Jerusalema."

¹⁴O tla ahlolela meraforafo, a lokiša ditaba le ditšhaba tše matla tša kgole. Ba tla rula ditšhoša tša bona ba di dira megoma gomme marumo a bona ba a dira disekela. Setšhaba se ka se emišetše se sengwe tšhoša, e bile di ka se sa hlwa di ithuta ntwa."

¹⁵Yo mongwe le yo mongwe o tlo dula ka tlase ga morara wa gagwe le ka tlase ga mogo wa gagwe, go ka se be le yo a ba tšhošago; ka gobane go boletše molomo wa Jehofa wa madira."

¹⁶Ge e le morafo o mongwe le o mongwe o tla sepela ka leina la modimo wa wona; eupša ge e le rena, re tla sepela ka leina la Jehofa Modimo wa rena go iša mehleng ya neng le neng, gaešita le ka mo go sa felego."