The Birth of Samson

¹Eupša o itše go nna: ‘Tseba gore o tlo ima wa belega morwa. O se ke wa nwa beine goba bjala le gona o se ke wa ja selo le ge e le sefe seo se sa hlwekago, ka gobane e tla re ka morago ga ge a belegwe a ba Monasari wa Modimo go fihla a ehwa.’”"

²Manoa a lopa Jehofa a re: “Tshwarelo Jehofa. Hle anke monna wa Modimo wa therešo yo o sa tšwago go mo roma a boe go rena a re botše kamoo re swanetšego go godiša ka gona ngwana yo a tlago go belegwa.”"

³Modimo wa therešo a theetša lentšu la Manoa gomme morongwa wa Modimo wa therešo a boela gape go mosadi ge a be a dutše tšhemong, Manoa monna wa gagwe o be a se na le yena."

⁴Gateetee mosadi a itlhaganela a kitima a yo botša monna wa gagwe a re: “Tseba gore monna yo a bego a tlile go nna ka letšatši lela o iponagaditše go nna gape.”"

⁵Ke moka Manoa a ema a sepela le mosadi wa gagwe ba tla go monna yoo gomme a re go yena: “Na ke wena monna yo a boletšego le mosadi wa ka?” Monna yoo a re: “Ee, ke nna.”"

⁶Manoa a re: “Anke mantšu a gago a phethege. Ngwana o tla godišwa bjang le gona o tla dira’ng?”"

⁷Morongwa wa Jehofa a re go Manoa: “Tšohle tšeo ke di boditšego mosadi wa gago, a di ile."

⁸A se ke a ja selo seo se tšwago morareng, a se ke a nwa beine goba bjala le gona a se ke a ja selo le ge e le sefe seo se sa hlwekago. Tšohle tšeo ke mo laetšego tšona gore a se ke a di ja, a di ile.”"

⁹Manoa a re go morongwa wa Jehofa: “Anke o eme ganyenyane gore re go hlabele putšanyana.”"

¹⁰Morongwa wa Jehofa a re go Manoa: “Ge o ka nkemiša ganyenyane, nka se je dijo tša gago; eupša ge e ba o tla direla Jehofa sebego sa go fišwa, gona se dire.” Manoa o be a sa tsebe gore ke morongwa wa Jehofa."

¹¹Manoa a re go morongwa wa Jehofa: “Leina la gago o mang gore re tle re go godiše ge mantšu a gago a phethega?”"

¹²Lega go le bjalo, morongwa wa Jehofa a re go yena: “Ke ka baka la’ng o mpotšiša leina la ka ka ge e le le makatšago?”"

¹³Manoa a tšea putšanyana le sebego sa mabele a di tlišetša Jehofa leswikeng. Modimo a dira se se makatšago ge Manoa le mosadi wa gagwe ba lebeletše."

¹⁴Ya re ge kgabo e hlatlogela godimo e etšwa aletareng, morongwa wa Jehofa a hlatloga a le kgabong ya aletare mola Manoa le mosadi wa gagwe ba lebeletše. Gateetee ba wela fase ka difahlego."

¹⁵Morongwa wa Jehofa a se hlwe a iponagatša go Manoa le mosadi wa gagwe. Ke moo Manoa a lemogilego gore e be e le morongwa wa Jehofa."

¹⁶Manoa a re go mosadi wa gagwe: “Re tlo hwa lehu, ka gobane re bone Modimo.”"

¹⁷Mosadi wa gagwe a re go yena: “Ge e ba Jehofa a be a rata go re bolaya, o be a ka se amogele sebego sa go fišwa le sebego sa mabele tšeo di tšwago diatleng tša rena, e bile o be a ka se re bontšhe dilo tše ka moka, le gona o be a ka se dire gore re kwe selo seo se swanago le se.”"

¹⁸Ka morago mosadi a belega morwa a mo rea leina la Simisone; mošemane a gola gomme Jehofa a mo šegofatša."

¹⁹Ge nako e dutše e tšwela pele moya wa Jehofa wa thoma go mo tutuetša ge a le Mahane-dani magareng ga Tsora le Eshithaolo."

²⁰Simisone a theogela Thimina gomme a bona mosadi moo, e lego yo mongwe wa barwedi ba Bafilisita."

²¹Ke moka a rotogela go tatagwe le mmagwe a re go bona: “Ke bone mosadi kua Thimina, e lego yo mongwe wa barwedi ba Bafilisita, ntšeeleng yena gore e be mosadi wa ka.”"

²²Eupša tatagwe le mmagwe ba re go yena: “Na ga go na mosadi gare ga barwedi ba meloko ya geno le gare ga batho ba gabo rena moo o ka yago wa tšea mosadi go Bafilisita ba sa bollago?” Lega go le bjalo, Simisone a re go tatagwe: “Ntšeele yena, ka gobane ke yena a nkgahlago.”"

²³Ge e le tatagwe le mmagwe ba be ba sa tsebe gore seo se tšwa go Jehofa, ba sa tsebe le gore Simisone o be a nyaka sebaka sa go hlasela Bafilisita, ka ge nakong yeo Bafilisita ba be ba buša Isiraele."

²⁴Simisone a theogela Thimina a na le tatagwe le mmagwe. Ge a fihla dirapeng tša merara tša Thimina, a bona tawana ya mariri e rora e mo lebile."

²⁵Moya wa Jehofa wa theogela go yena moo a ilego a e gagola diripa tše pedi ka matsogo a gagwe go etša ge motho a gagola putšanyana diripa tše pedi. Ga se a botša tatagwe goba mmagwe seo a se dirilego."