The Day of the LORD

¹“Le gona ke tla dira dipontšho magodimong le lefaseng, go tla ba le madi, mollo le mekubego ya muši."

²Letšatši lona le tla swifala gomme kgwedi ya fetoga e khwibidu bjalo ka madi pele ga ge go etla letšatši le legolo le le boifišago la Jehofa."

³Yo mongwe le yo mongwe yo a bitšago leina la Jehofa o tla phologa; ka gobane Thabeng ya Tsione le Jerusalema go tla ba le baphologi go etša ge Jehofa a boletše gomme ba tla ba gare ga mašaledi ao Jehofa a a bitšago.”"

⁴“Tsebang gore mehleng yeo le nakong yeo ya ge ke tlo bušetša mathopša a Juda le a Jerusalema morago,"

⁵ke tlo ba ka kgobokanya ditšhaba ka moka ka di theošetša moeding wa Jehoshafate; ke tlo di ahlolela gona moo ka baka la batho ba ka le bohwa bja ka Isiraele, yeo ba e gašantšego ditšhabeng; ba arolelana naga ya ka."

⁶Ba direla batho ba ka matengwa; ba ananya ngwana wa mošemane ka mogweba-ka-mmele, ngwana wa ngwanenyana ba mo rekiša ka beine e le gore ba nwe."

⁷“Le gona, le na le taba mang le nna, lena Tiro le Sidone le ba dilete ka moka tša Filisita? Na ke tsela yeo le itefeletšago go nna ka yona? Ge e ba le ntira ka tsela ye, ke tlo bušetša seo ka bjako le ka go akgofa dihlogong tša lena."

⁸Gobane le tšere silifera ya ka le gauta ya ka gomme le išitše dilo tša ka tše dibotse ka ditempeleng tša lena;"

⁹bana ba Juda le bana ba Jerusalema le ba rekišeditše bana ba Bagerika, e le gore le ba iše kgole le selete sa gabo bona;"

¹⁰bjale ke ba tsošetša gore ba tle ba etšwa lefelong leo le ba rekišeditšego go lona gomme ke tlo bušetša ditiro tša lena dihlogong tša lena."

¹¹Ke tla gafela barwa ba lena le barwedi ba lena diatleng tša barwa ba Juda, bona ba tlo ba gafela batho ba Sheba, e lego setšhaba seo se lego kgole kudu; gobane ke nna Jehofa yo a boletšego."

¹²“Goeletšang gare ga ditšhaba le re: ‘Itokišetšeng ntwa! Tsošang banna ba matla! A ba batameleng! A bahlabani ka moka ba rotogeng!"

¹³Megoma ya lena e direng ditšhoša gomme disekela tša lena le di dire marumo. Ge e le yo a fokolago anke a re: “Ke nna senatla.”"

¹⁴Etlang le thuše, lena ditšhaba ka moka tša kgauswi, ikgobokanyeng.’” Wena Jehofa, fološetša madira a gago lefelong leo."

¹⁵“Anke ditšhaba di tsoge di rotogele moeding wa Jehoshafate; gobane ke tla dula moo go ahlola ditšhaba ka moka tša kgauswi."

¹⁶“Tsenyang sekela gobane puno e budule. Theogang gobane segatelo sa morara se tletše. Digatelo di a falala; gobane bobe bja bona bo atile."

¹⁷Mašabašaba a moeding wa kahlolo, gobane letšatši la Jehofa le batametše moeding wa kahlolo."

¹⁸Letšatši le kgwedi di tla swifala, le dinaledi di ka se phadime."

¹⁹Jehofa o tla rora a le Tsione, o tla ntšha lentšu la gagwe a le Jerusalema. Ke moka legodimo le lefase di tla šišinyega; eupša Jehofa o tla ba setšhabelo sa batho ba gagwe le sebo sa bana ba Isiraele."

²⁰Le tla tseba gore ke nna Jehofa Modimo wa lena, yo a dulago Tsione thabeng ya ka e kgethwa. Jerusalema e tla ba lefelo le lekgethwa; ge e le bašele ba ka se sa hlwa ba phatša go yona."

²¹“Mehleng yeo dithaba di tla rotha beine e bose, meboto yona e tla ela maswi, ge e le melapo ka moka ya Juda e tla ela meetse. Mothopo wa meetse o tla tšwa ntlong ya Jehofa, o tla nošetša moedi wa mafula wa Sithime."

²²Ge e le Egipita e tla ba lešope; Edomo yona e tla ba lešoka la mašope ka baka la bošoro bjo ba bo dirilego bana ba Juda, ka go tšholla madi a se nago molato nageng ya bona."

²³Eupša ge e le Juda go tla dulwa go yona go iša mehleng ya neng le neng gomme Jerusalema go tla dulwa go yona go iša melokong e sa felego."

²⁴Madi a bona ao ke bego ke a lebelela e le a nago le molato ke tla a lebelela e le a se nago molato; Jehofa o tla be a dula Tsione.”"

²⁵A ke mantšu ao Amose yoo a bego a le gare ga barui ba dinku ba Thekoa a a hweditšego ka pono. Ke a mabapi le Isiraele mehleng ya Usia kgoši ya Juda le mehleng ya Jeroboama morwa wa Joashe, kgoši ya Isiraele, nywaga e mebedi pele ga tšhišinyego ya lefase."

²⁶O itše: “Jehofa o tla rora a le Tsione, o tla ntšha lentšu a le Jerusalema; mafulo a badiši a tlo lla gomme tlhora ya Karamele e tlo omelela.”"

²⁷“Se ke seo Jehofa a se boletšego: ‘“Ka ge Damaseko e ile ya hlanoga leboelela, nka se gomiše se se phethilwego, ka ge ba fotše Gileada ka selei sa go fola."

²⁸Ke tla romela mollo ntlong ya Hasaele gomme o tla tšhuma dibo tša Bene-hadada."

²⁹Ke tla roba lepheko la Damaseko gomme ka fediša modudi Bikathe-abene le moswari wa molamo Bethe-edene; batho ba Siria ba tla ya Kiri e le mathopša,” o re’alo Jehofa.’"

³⁰“Se ke seo Jehofa a se boletšego: ‘“Ka ge Gatsa e ile ya hlanoga leboelela, nka se gomiše se se phethilwego, ka ge e tšere sehlopha sa mathopša ya se gafela Edomo."

³¹Ke tla romela mollo morakong wa Gatsa gomme o tla tšhuma dibo tša yona."

³²Ke tla fediša modudi Ashidodo le moswari wa molamo Ashikaloni; ke tla emišetša Ekirone seatla sa ka gomme mašaledi a Bafilisita a tla fedišwa,” o re’alo Mmuši Morena Jehofa.’"