Job Responds to Bildad

¹Waphendula uYobhi, wathi,"

²Okwenene, ndiyazi ukuba kunjalo; Ke angathini na umntu lo ukuba lilungisa phambi koThixo?"

³Ukuba uthe yena wafuna ukubambana naye, Ubengemphenduli namnye umbuzo kweliwaka."

⁴Ulumkile ngentliziyo, ukhaliphile ngamandla: Ngubani na okha agogotye kuye, aze asinde?"

⁵Uloshenxisa iintaba zingazi, Ukuba azibhukuqe ngomsindo wakhe;"

⁶Ulogungqisa ihlabathi, lisuke endaweni yalo, Zididizele iintsika zalo;"

⁷Ulothetha elangeni lingaphumi, Azitywine, azivingce, iinkwenkwezi ngeenxa zonke;"

⁸Ulotwabulula ixulu eyedwa, Anyathele emimangweni yolwandle;"

⁹Ulowenza iinkwenkwezi zeBhere, namaKroza, nesiLimela, Neengontsi zasezantsi."

¹⁰Ulowenza izinto ezinkulu ezingenakugocwagocwa, Nemisebenzi ebalulekileyo engenakubalwa."

¹¹Yabona, udlula phezu kwam, ndingamboni; Uthi phe, ndingamqondi,"

¹²Yabona, exwila, ngubani na ongamnqandayo? Ngubani na ongathi kuye, Wenza ntoni na?"

¹³UThixo akawunqandi umsindo wakhe; Bayasibekeka phantsi kwakhe abancedi bakaRahabhi."

¹⁴Ndingathini na ke mna ukumphendula, Ndiwakhethe amazwi am okuphendula kuye?"

¹⁵Nokuba bendililungisa mna, bendingemphenduli; Ndingatarhuzisa kuphela kumgwebi wam."

¹⁶Ukuba bendithe ndabiza, wandiphendula, Bendingekholwa ukuba ulibekele indlebe ilizwi lam;"

¹⁷Kanye ubeya kundityumza ngoqhwithela, Awandise amanxeba am ngelize,"

¹⁸Angandiphi nokuba ndiphefumle; Ke ubeya kundihluthisa ngobukrakra."

¹⁹Ukuba yinto yamandla ekhalipha, uthi, Ndim okhoyo! Ukuba yinto yomgwebo, uthi, Ngubani na oya kundimema?"

²⁰Ukuba bendithe ndalilungisa, umlomo wam ubuya kundigweba; Ukuba bendithe ndagqibelela, ubeya kundenza umjibilizi."

²¹Ndigqibelele; andiwukhathalele umphefumlo wam; Ndiyabucekisa ubomi bam."

²²Kunye oko; ngenxa yoko ndithi, Ogqibeleleyo nongendawo uyabatshabalalisa."

²³Ukuba iziniya ithe yabulala ngesiquphe, Uya kugculela ukuqotywa kwabamsulwa."

²⁴Ihlabathi linikelwe esandleni sabangendawo; Uyabugqubuthela ubuso babagwebi balo. Ukuba kanti akunjalo, kwenziwe ngubani na ke?"

²⁵Imihla yam ikhawuleze ngaphezu kwesigidimi; Ibalekile, ayibonanga kulungileyo;"

²⁶Ithe phe njengemikhombe yeengcongolo, Njengokhozi luxwila ixhoba."

²⁷Ndakuthi, Ndiya kuyilibala inkalazo yam, Ndibuyeke ubuso bam, ndincumeze,"

²⁸Ndisuka ndinxunguphale ziimbulaleko zam zonke, Ndazi ukuba akuyi kuthi ndimsulwa."

²⁹Kuthiwa ndingongendawo mna; Yini na le nto ndifumana ndizixhamla?"

³⁰Nokuba bendithe ndazihlamba ngamanzi ekhephu, Ndazihlambulula izandla zam ngesepha,"

³¹Ubuya kundithi gxwa emhadini, Ndibe lisikizi nakwiingubo zam."

³²Kuba akamntu yena, njengam nje, ukuba ndimphendule, Siye ndawonye ematyaleni."

³³Akukho mahluli phakathi kwethu, Wokubeka isandla sakhe phezu kwethu sobabini."

³⁴Makayisuse intonga yakhe kum, Isothuso sakhe masingandidandathekisi:"

³⁵Ndothetha ke ndingamoyiki; Kuba andivi kunjalo mna eluvalweni lwam."