Leviathan

¹E tšea tšhipi e le lehlokwana feela, Koporo e e tšea e le feela kota e bodilego."

²Mosebe ga o e rake; Go yona maswikana a seragamabje a fetogile mahlakanyana feela."

³Molamo e o bona e le lehlakanyana feela, Gomme e segišwa ke go gwašagwaša ga lerumo."

⁴Dimpa tša yona di etša mangeta ao a nago le dintlha; Godimo ga leraga e šia mehlala e etšago ya selei sa go fola."

⁵E bediša madiba go etša pitša; E dira gore lewatle le be bjalo ka pitša ya ditlolo."

⁶Mo e fetilego gona e šadiša tsejana ya go phadima; Motho o tla tšea bodiba eka ke bopududu bja moriri."

⁷Mo nageng ga go na sa go swana le yona, Seo se dirilwego gore se hloke letšhogo."

⁸Se sengwe le se sengwe se se lego godimo e a se bona. Ke kgoši ya dibata ka moka tše kgolo tša naga.”"

⁹Jobo a araba Jehofa a re:"

¹⁰“Bjale ke tsebile gore o kgona go dira dilo ka moka, Le gona ga go na kgopolo e sa fihlelelegego go wena."

¹¹O itše: ‘Ke mang yo yo a širago merero ya ka ka go hloka tsebo?’ Ka gona ke boletše, eupša ke be ke sa kwešiše Dilo tšeo di mmakatšago kudu, tšeo ke sa di tsebego."

¹²O itše: ‘Nkwe hle, nna ke tla bolela. Ke tla go botšiša gomme wena wa ntsebiša.’"

¹³Ke kwele ka wena ka mabarebare, Eupša bjale leihlo la ka le a go bona."

¹⁴Ke ka baka leo ke gomišago mantšu a ka, Le gona ke itshola ke le leroleng le meloreng.”"

¹⁵Eitše ge Jehofa a boditše Jobo mantšu a, ke moka Jehofa a iša pele a botša Elifase wa Themane a re: “Bogale bja ka bo tukela wena le bagwera ba gago ba babedi, ka gobane lena ga se la bolela therešo ka nna go etša ge mohlanka wa ka Jobo a dirile."

¹⁶Bjale itšeeleng dipoo tše šupago le dikgapa tše šupago le ye go mohlanka wa ka Jobo, le neeleng sehlabelo sa lena sa go fišwa; ge e le Jobo mohlanka wa ka yena o tla le rapelela. Ke tla amogela feela sefahlego sa gagwe e le gore ke se ke ka le hlabiša dihlong ka baka la bošilo bja lena, gobane ga se la bolela therešo ka nna go etša ge mohlanka wa ka Jobo a dirile.”"

¹⁷Ka gona Elifase wa Themane, Bilidada wa Shua le Tsofara wa Naama ba ya ba dira feela kamoo Jehofa a boletšego le bona; ke moka Jehofa a amogela sefahlego sa Jobo."

¹⁸Jehofa yena a hunolla Jobo boemong bja gagwe bja bokgoba ge a be a rapelela bagwera ba gagwe, ke moka Jehofa a okeletša Jobo tšohle tšeo a bego a na le tšona, a di oketša gabedi."

¹⁹Bana babo ka moka le dikgaetšedi tša gagwe ka moka le bohle bao ba bego ba mo tseba ba tla go yena, ba ja le yena ka ntlong ya gagwe, ba mo kwela bohloko ba ba ba mo homotša ka baka la bošula ka moka bjoo Jehofa a bego a dumeletše gore bo mo tlele; yo mongwe le yo mongwe wa bona a mo nea setseka sa tšhelete le lengina la gauta."

²⁰Jehofa yena a šegofatša tša mafelelo a Jobo go feta tša mathomong a gagwe, moo a ilego a ba le dinku tše dikete tše lesomenne (14 000), dikamela tše dikete tše tshelelago (6 000), dipane tše sekete (1 000) tša dikgomo le dipokolo tše ditshadi tše sekete (1 000)."

²¹A ba a ba le barwa ba šupago le barwedi ba bararo."

²²Morwedi wa pele a mo rea leina la Jemima, wa bobedi a mo rea la Ketsia gomme wa boraro a mo rea la Kerene-hapuka."

²³Le gona nageng ka moka go be go se na basadi ba babotse go etša barwedi ba Jobo; tatago bona a ba abela bohwa gotee le dikgaetšedi tša bona."

²⁴Jobo ka morago ga tšeo a tšwela pele a phela nywaga e mengwe e lekgolo-masomenne (140) gomme a bona bana ba gagwe le ditlogolo tša gagwe—go iša molokong wa bone."

²⁵Jobo a feleletša a hwile. O be a tšofetše gomme a khoše matšatši a bophelo."

²⁶Go thaba motho yo a sa kago a sepela ka keletšo ya ba kgopo, Yo a sa kago a ema tseleng ya badiradibe, Yo a sa kago a dula sedulong sa bakweri."

²⁷Eupša o kgahlwa ke molao wa Jehofa, Gomme o bala molao wa gagwe ka lentšu la tlasana mosegare le bošego."

²⁸O tla etša sehlare se se bjetšwego kgauswi le melapo ya meetse, Seo se enywago dienywa tša sona ka lebaka la gona Le seo matlakala a sona a sa ponego, Gomme se sengwe le se sengwe seo a se dirago se tla atlega."

²⁹Ba kgopo bona ga ba bjalo, Eupša ba swana le mooko wo o tšewago ke phefo."

³⁰Ke ka baka leo ba kgopo ba ka se emego kahlolong, Le badiradibe ba ka se emego moo go kopanego baloki."

³¹Gobane Jehofa o tseba tsela ya baloki, Eupša tsela ya ba kgopo e tla hwelela."

³²Ke ka baka la’ng ditšhaba di be di tsoša mpherefere Gomme merafo yona e be e duletše go dumaduma ka tša lefeela?"

³³Dikgoši tša lefase di a ema, Matona ona a kgobokane a ipopa ngatana e tee Go lwa le Jehofa le motlotšwa wa gagwe,"

³⁴Ba re: “A re kgaoleng ditlemo tša bona Gomme re lahleleng dithapo tša bona kgole le rena!”"