Behemoth

¹Na e ka go lopa gantši, Goba na e ka bolela le wena ka boleta?"

²Na e ka dira kgwerano le wena, Gore o e tšee e be lekgoba go iša mehleng ya neng le neng?"

³Na o ka bapala le yona go etša nonyana, Goba na o ka e kgokela banenyana ba gago ba banyenyane?"

⁴Na barekišetšani ba ka ananya ka yona? Na ba ka e arolela bagwebi?"

⁵Na letlalo la yona o ka le tlatša ka dikamarumo, Goba na o ka hlaba hlogo ya yona ka marumo a dihlapi?"

⁶Bea seatla sa gago godimo ga yona. O gopole tlhabano. O se sa bušeletša."

⁷Bona! Seo motho a se letetšego ka yona e ka se be sona. Le gona motho o tla wišwa ke ge a e bona."

⁸Ga go yo a nago le sebete sa go e hlohla. Ke mang a ka ikemelago pele ga ka?"

⁹Ke mang a nneilego selo pele, moo ke swanetšwego ke go mo putsa? Tšohle ka tlase ga magodimo ke tša ka."

¹⁰Nka se homole ka lesa go bolela ka ditho tša yona Goba go bolela ka ga matla a yona le ka ga botse bja sebopego sa yona."

¹¹Ke mang a e hlobotšego diaparo tša yona? Ke mang a ka tsenago ka mehlagareng ya yona?"

¹²Ke mang a kilego a bula mehlagare ya yona e megolo? Meno a yona a go tlala legano a a tšhoša."

¹³E ikgogomoša ka dikgapetla tša yona tša go lokologana, Tšeo di tswaletšwego bjalo ka ge eka ke ka sekhurumelo se se tiišitšwego."

¹⁴Di kgohlagane gabotse, Gaešita le moya o ka se tsene magareng ga tšona."

¹⁵Di kgomarelane; Di swaragane gomme di ka se amologane."

¹⁶Go ethimola ga yona go phadimiša seetša, Mahlo a yona a etša mahlasedi a masa."

¹⁷Ka ganong ga yona go tšwa seetša sa legadima, E bile go tšwa le ditlhase tša mollo."

¹⁸Ka dinkong tša yona go tšwa muši, Go etša sebešo se se tšhumilwego ka mahlakanoka."

¹⁹Moya wa yona o tukiša magala, Gaešita le kgabo e tšwa ka ganong ga yona."

²⁰Molaleng wa yona go dutše matla, Ka pele ga yona go a boifiša."

²¹Dikgapetla tša letlalo la yona di swaragane; Di bjalo ka ge eka ke dilo tše di bopeletšwego go yona, ga di šišinyege."

²²Pelo ya yona e bopegile bjalo ka leswika, Ee, e bopegile bjalo ka lwala la go šila."

²³Ge e tsoga dinatla di a tšhoga; Ge e ferekana di a gakanega."

²⁴Ge e betšwa, tšhoša ga e kgone go e dira selo, Le ge e le lerumo, lerungwana goba ntlha ya mosebe."